Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Erjabap Musa man TUHAN nina, "Tapi kuga adi bangsa Israel la tek man bangku janah la ibegikenna kai si kukataken? Kai arus kubahan adi ikatakenna maka labo pernah IcidahkenNdu DiriNdu man bangku?"
2 Emaka isungkun TUHAN ia nina, "Kai si cikepndu ena?" "Ciken," nina Musa erjabap.
3 Nina TUHAN, "Benterken ku taneh!" Kenca ibenterken Musa ciken ndai, minter salih jadi nipe, emaka lompat Musa.
4 Jenari nina TUHAN man Musa, "Dadaken tanndu, tangkap ikurna!" Itangkap Musa ikur nipe ndai, minter salih jadi ciken.
5 Nina TUHAN, "Bahanlah bagenda jadi sada bukti man bangsa Israel maka TUHAN, Dibata nini-ninina, Dibata Abraham, Isak ras Jakup nggo ncidahken bana man bandu."
6 Tole nina ka TUHAN man Musa, "Tamaken tanndu ku bas bajundu!" Ibahan Musa bage; jenari kenca ipedaratna, nggo kena penakit kulit tanna ndai, rupana mbentar bagi kapas.
7 Jenari nina TUHAN, "Ulihi ka tamaken tanndu ku bas bajundu." Ibahan Musa bage, janah sekali enda kenca ipedaratna, nggo sehat mulihken tanna ndai bali ras dagingna si deban.
8 Nina TUHAN, "Adi la ia tek man bandu ntah pe la ia tek arah tanda kuasa si pemena ndai, tentu arah tanda kuasa si peduaken e tek me ia pagi.
9 Adi kune arah tanda kuasa si dua e pe ia langa denga tek man bandu, janah adi la ia nggit megiken kai si ikatakenndu, buatlah lau i bas Lau Nil nari, jenari amburken ku taneh. Minter pagi salih lau e jadi dareh."
10 Tapi nina Musa, "Lang, TUHAN, ula kal suruh Kam aku. Aku labo kalak si beluh ngerana, nai pe lang, genduari kenca Kam ngerana ras aku pe lang, sabap mberat babahku, mberat dilahku."
11 Nina TUHAN man bana, "Ise kin si mereken babah man manusia? Ise erbahanca ia la beluh ngerana ntah pasek? Ise merekenca man bana pengidah ntah erbahanca ia pentang? Ma Aku, TUHAN?
12 Emaka laweslah! Kusampati kam pagi ngerana, janah Aku pagi ngajarisa kai si man katankenndu."
13 Tapi erjabap Musa nina, "Lang TUHAN, mindo kal aku gelah IsuruhNdu kalak si deban."
14 I je merawa kal TUHAN man Musa nina, "Ma lit kin seninandu Harun, kalak Lewi? Kuteh maka ia beluh ngerana, maka nggo itehndu, genduari ia sangana reh ngalo-ngalo kam janah meriah kal ukurna ngidah kam.
15 Banci kam ngerana ras ia janah turiken man bana kai si man katanken. Kusampati kam pagi duana i bas ngerana, janah Aku pagi ngatakenca kai si man bahanenndu.
16 Ia pagi jadi si ngeranandu man bangsa e i bas gelarndu. Emaka kam pagi bagi Dibata, nuriken man bana kai si man katanken.
17 Babalah ciken enda, sabap alu e pagi ibahanndu melala tanda kuasa."
18 Kenca bage mulih Musa ndahi mamana, Jetero, janah nina man bana, "Kuarap maka iberendu aku mulih ndahi kade-kadengku i negeri Mesir, ngenehenca ntah nggeluh denga maun ia." Jetero pe setuju, emaka nina, "Mejuah-juah kam i bas perdalanen."
19 Sanga Musa i taneh Midian denga nina TUHAN man bana, "Mulihlah ku negeri Mesir sabap kerina kalak si munuh kam atena nggo mate."
20 Jenari idilo Musa ndeharana ras anak-anakna, itamakenna ku das gurung kelede si maba ia, emaka ras ia berkat ku Mesir janahna maba ciken si isuruh Dibata.
21 Tole nina TUHAN man Musa, "Genduari erkiteken berkat me kam ku negeri Mesir, Kupersingeti man bandu gelah ibahanndu kerina tanda kuasa e i lebe-lebe raja, sabap nggo Kubereken bandu kuasa erbahan si e kerina.
22 Jenari arus ikatakenndu man raja Mesir maka Aku, TUHAN, ngataken, 'Israel eme kap anakKu sintua.'
23 Erkiteken si e Kukataken man bandu, 'Pelepaslah anakKu lawes, gelah banci Aku isembahna, tapi adi itulakndu Aku, ateKu munuh anakndu sintua.'"
24 I bas perdalanen ku Mesir, i bas sada ingan erberngi, ijumpai TUHAN Musa janah ibunuhna atena ia.
25 Minter ibuat Sipora sada batu si ntelap, isunatkenna anakna, jenari ikuitna alu jukutna ndai nahe Musa, emaka Musa la surung ibunuh TUHAN. Erkite-kiteken peraturen sunat e ikatakenna man Musa nina, "Si tuhuna kam kap perbulangen dareh man bangku."
26 (Kel 4:25)
27 Tupung si e nggo ikataken TUHAN man Harun nina, "Laweslah ku gurun pasir njumpai Musa." Emaka lawes ia njumpai deleng si badia; jenari kenca ia jumpa minter iemana Musa.
28 Ituriken Musa man Harun kerina si nggo ikataken TUHAN asum isuruhna ia mulih ku Mesir, kerna tanda kuasa sinisuruh TUHAN ia erbahanca pe iturikenna man bana.
29 Kenca e lawes me Musa ras Harun ku Mesir janah ipepulungna kerina peminpin-peminpin bangsa Israel.
30 Ituriken Harun man bana kerina si nggo ikataken TUHAN man Musa, janah kenca bage ibahan Musa kerina tanda kuasa i lebe-lebe bangsa e.
31 Tek ia minter kerina janah kenca ibegina maka TUHAN nggo ndahi ia ras nggo ngidah pe uga kiniseran bangsa e, minter mungkuk ia kerina ersembah.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA