Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mosa makompol sakabbinna bangsa Isra’il, laju adhabu, "Areya’ papakonna PANGERAN ka ba’na:
2 Badha nem are kaangguy alalakon, tape are se kapeng petto’ jareya are kaangguy istirahat, are raja se ekusussagi kaangguy abakte ka PANGERAN. Sapa se alalakon e are Sabat kodu eokom mate.
3 E are jareya, ba’na ngodhi’i apoy e bengkona bai ta’ olle."
4 Dhabuna Mosa ka sakabbinna bangsa Isra’il, "Areya’ papakonna PANGERAN:
5 Ngeba tor-ator ka PANGERAN. Pa’-sapa’a se akarep kodu ngeba tor-ator emmas, salaka ban paronggu;
6 kaen linen se alos, kaen wol bungo, bungo terrong ban mera; kaen dhari buluna embi’;
7 kole’na dumba lake’ se epabarna mera; kole’ se alos, kaju akasia,
8 mennya’na damar; racegan kaangguy mennya’na opacara ban kaangguy dupa ro’om;
9 mamatan dalima ban mamatan laenna se egabaya rarengganna efod ban totobba dhadhana Imam Agung."
10 "Sakabbinna oreng se ahli e antarana ba’na kodu entar agabay sabarang se epakonnagi PANGERAN, iya areya:
11 Kemah, ata’na ban totobba bagiyan lowarra, ke’-cangke’na ban barangkana, ju-kajuna se malang, pangpangnga labang ban panongko’anna;
12 Petthe Parjanjiyan ban kaju kol-pekolla, kodhungnga ban kaen bir-tabirra;
13 meja ban kaju kol-pekolla, sakabbinna parlengkabanna ban roti sasajin;
14 ko’-tongko’na damar kaangguy matera’ ban parlengkabanna, damar ban mennya’na;
15 mezba pangobbaranna dupa ban kaju kol-pekolla, mennya’na opacara, dupa se ro’om; bir-tabirra labangnga Kemah,
16 mezba kennengnganna kurban obbaran ban ca’-raca’na dhari paronggu, kaju kol-pekolla ban sakabbinna parlengkabanna; cemmong pabaccowan ban panongko’anna,
17 bir-tabirra taneyan, ga-cangga ban panongko’anna, bir-tabirra labang sakethengnga taneyan,
18 ji-pajina ban le-talena Kemah ban taneyanna;
19 pangangguyya kabakteyan kaangguy para imam e bakto ajalannagi kawajibanna neng e Rowangan Se Socce ban pangangguy se kusus kaangguy imam Harun ban na’-ana’na."
20 Reng-oreng Isra’il se akompol jareya laju bubar,
21 ban reng-oreng se akarep laju padha ngeba tor-ator ka PANGERAN se ekaparlo agabaya Kemah Socce. Salaenna jareya reng-oreng jareya ngeba sabarang se ekaparlo kaangguy kabakteyan ban se ekagabaya pangangguyya imam.
22 Sapa’a bai se kenceng, lalake’ otaba babine’, padha dhateng ngeba paniti, anteng, sello’, kalong, ban samacemma angguy dhari emmas ekagabay tor-ator ka PANGERAN.
23 Saneyap oreng se andhi’ kaen linen alos, kaen wol bungo, bungo terrong otabana mera, kaen dhari buluna embi’, kole’na dumba lake’ se epamera, otabana kole’ alos, ngeba rang-barang jareya egabay tor-ator.
24 Saneyap oreng se andhi’ salaka ban paronggu se ekenneng sombangngagi, ngeba rang-barang jareya egabaya tor-ator ka PANGERAN. Bariya keya reng-oreng se andhi’ kaju akasia se ekenneng angguy kagabay lalakon jareya.
25 Babine’an se penter atennon ngeba bennang linen alos ban bennang wol bungo, bungo terrong sarta mera, ollena gabayanna dibi’.
26 Salaenna jareya babine’an gella’ mente bennang dhari buluna embi’.
27 Para pamimpin ngeba mamatan dalima ban tan-mamatan laenna se etata’a egabaya rarengganna efod ban totobba dhadha,
28 ban racegan sarta mennya’na damar, mennya’na opacara ban dupa se ro’om.
29 Reng-oreng Isra’il se akarep padha ngeba tor-atorra ka PANGERAN kaangguy lalakon se epakonnagi PANGERAN ka Mosa.
30 Saellana jareya Mosa adhabu ka oreng Isra’il, "PANGERAN la mele Bezale’el ana’na Uri, kompoyya Hur dhari suku Yehuda.
31 Bezale’el jareya bi’ Allah eparenge kobasana, ban eparenge pangarteyan, kaahliyan ban kacakebban e dhalem samacemma karya seni,
32 kaangguy agabay rancangan se marlowagi kaahliyan, ban agabay rancangan jareya dhari emmas, salaka ban paronggu;
33 kaangguy agangse mamatan se etata’a; kaangguy ngoker kaju ban kaangguy samacemma karya seni laenna.
34 Ka Bezale’el ban Aholiyab, ana’na Ahisamakh dhari suku Dan, PANGERAN apareng kapenterran ngajarragi kaahliyanna ka reng-oreng laen.
35 Se kadhuwa jareya bi’ PANGERAN eparenge kapenterran e dhalem samacemma lalakon se elakone tokang ngoker, tokang rancangnga bangonan ban ahli tennonan linen alos, wol bungo, bungo terrong ban mera, ban kaen laenna. Reng-oreng jareya cakep alako apa’a bai sarta ahli e dhalem agabay rancanganna bangonan.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA