Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nina TUHAN man Musa, "Bahan dua papan batu seri ras si pemena mbarenda, gelah Kusuratken i je kata-kata si lit i bas papan batu si ipecahkenndu e.
2 Pagi erpagi-pagi arus nggo dung, jenari rehlah kam ku das Deleng Sinai njumpai Aku i tampuk deleng e.
3 Ise pe la banci ikut nangkih ras kam; ise pe la banci deher ras deleng e. Biri-biri ras lembu pe la banci nggagat i je."
4 Emaka minter ibahan Musa dua papan batu, seri ras si pemena, jenari pepagina lampas, ibabana ku das Deleng Sinai bagi si nggo ipedahken TUHAN man bana.
5 Emaka nusur me TUHAN ku teruh i bas sada embun, tedis Ia ras Musa i je, jenari IkatakenNa GelarNa si badia, eme TUHAN.
6 Kenca bage mentas TUHAN arah lebe Musa JanahNa erlebuh, nina, "Aku kap TUHAN. Aku kap Dibata si dem alu lias ate ras perkuah ate. Aku la sukah merawa, janah Kucidahken keleng ateKu si mbelin ras kesetianKu si tetap.
7 Kusehken padanku man meribu-ribu kesusuren janah Kualemi kejahaten ras dosa; tapi la banci la Kuukum anak ras kempu seh ku bas kesusuren si peteluken ras si peempatken erkite-kiteken dosa orang tuana."
8 Pedas-pedas Musa nembah erjimpuh, ayona seh ku taneh.
9 Nina, "TUHAN, adi tuhu-tuhu kin keleng AteNdu aku, kupindo gelah ras kita lawes. Bangsa enda tuhu mekeng, tapi alemi lah kejahaten ras dosa kami, janah alokenlah kami jadi BangsaNdu."
10 Nina TUHAN man Musa, "Genduari Kubahan sada perpadanen ras bangsa Israel. I lebe-lebe bangsa e Kubahan perbahanen-perbahanen si mbelin si la nggo pernah ilakoken bage i japa pe i babo doni enda i tengah bangsa apai pe. Kerina bangsa ngidah perbahanen si mbelin e pagi, si banci Kubahan, TUHANndu, sabap ateKu ngelakoken sada perbahanen si mejin man bandu.
11 Patuhilah undang-undang si ateKu Kubereken man bandu sendah, bangsa Amori, bangsa Kanaan, bangsa Heti, bangsa Peris, bangsa Hewi, ras bangsa Jebusi, kerina pagi kupelawes tupung kam ngasak ku je.
12 Ula kal ibahanndu perpadanen ras anak negeri si ibengketindu, sabap enda banci jadi sada siding si erbahanca kam bene.
13 Tapi arus iruntuhkenndu batar-batar inganna ersembah, perperken tugu-tugu berhalana, janah tabah lah binangun Dewi Aserana.
14 Ula sembah dibata si deban, sabap Aku, TUHANndu, tuhu-tuhu mecimberu kal.
15 Ula bahan perpadanen ras anak negeri e, sabap adi isembahna pagi dibata-dibatana, dibata perbegu, iundangna kam ikut ras ia, jenari tentu merincuh kam man pangan si isembahkenna man dibata-dibatana.
16 Banci jadi anak-anakndu si dilaki ngempoi diberu kalak asing e, si mabai ia lanai setia man bangKu, jenari isembahna dibata-dibata kalak perbegu e.
17 Ula bahan janah ula sembah dibata-dibata i bas besi nari.
18 Pestaken lah Wari Raya Roti si la itama ragi. Bagi si nggo Kupedahken man bandu, panlah roti si la itama ragi pitu wari dekahna i bas bulan Abip, sabap i bas bulan eme kam nadingken Mesir.
19 Tep-tep anak dilaki sintua ras anak si pemena daluna i bas asuh-asuhen, Aku empuna.
20 Tapi la banci la itebusindu tep-tep anak kelede si pemena alu mpersembahken anak biri-biri jadi sambarna. Adi la itebusindu, penggelkenlah kerahungna. Tebusilah tep-tep anak dilaki sintua. Ise pe la banci ngadap Aku adi la maba persembahen.
21 Enem wari ibereken kesempaten man bandu guna ndahiken dahinndu, tapi ula erdahin i bas wari si pepituken, aminna gia paksa si e paksa nenggala ntah rani.
22 Pestakenlah Kerja Rani tupung kam menaken peranin buah pagendu si pemena, janah pestakenlah Wari Raya Sapo-sapo i bas pendungi tahun, tupung iperanindu buah kayundu.
23 Telu kali setahun kerina si dilaki la banci la reh ersembah man bangKu, TUHANndu, Dibata Israel.
24 Kenca nggo Kupelawes bangsa-bangsa si i lebe-lebendu, janah Kupebelang daerahndu, ise pe la nggit ncubakenca erperang ras kam tupung wari raya si telu e.
25 Ula persembahken roti si tama ragi tupung ipersembahkenndu asuh-asuhen man bangKu. Ula tadingken sitik pe seh erpagi-pagi asuh-asuhen si igeleh asum Wari Raya Paskah e.
26 Tep-tep tahun babalah ku Rumah TUHAN buah gandum si pemena iperanindu. Ula tanggerken anak biri-biri ntah pe kambing alu susu indungna."
27 Kedungenna nina TUHAN man Musa, "Suratkenlah kerina kata-kata enda, sabap erpalasken si e Aku erbahan perpadanen ras kam bage pe ras bangsa Israel."
28 Musa ringan i das deleng e ras TUHAN empat puluh wari empat puluh berngi dekahna. La ipanna kai pe, la ia minem. Isuratkenna i bas papan batu e kata-kata perpadanen e, eme Sepuluh Pedah Dibata.
29 Tupung Musa nusur i das Deleng Sinai nari maba Sepuluh Pedah Dibata e, ayona ersinalsal sabap nggo ia ngerana ras TUHAN; tapi la ietehna e.
30 Harun ras kerina kalak si deban ngenehen Musa, janah idahna maka ayona ersinalsal, emaka mbiar ia kerina ndeherisa.
31 Tapi idilo Musa ia kerina, jenari Harun ras kerina peminpin-peminpin perpulungen bangsa Israel reh ndahi ia, emaka ngerana Musa man bana.
32 Kenca bage kerina bangsa Israel pulung engkeleweti ia, jenari iendesken Musa undang-undang si ibereken TUHAN man bana i das Deleng Sinai.
33 Kenca Musa nggo dung ngerana, itamburina ayona alu uis.
34 Adi lawes kenca Musa ku bas Kemah Perjumpan guna ngerana ras TUHAN, itangtangina tutup ayona e. Ndarat kenca ia i jenari, iturikenna man bangsa Israel asa kai si nggo isuruh ia ngatakenca,
35 janah idah bangsa ndai ayona ersinalsal. Kenca bage itutupina ka ayona, seh ngerana ka ia ras TUHAN mulihken.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA