Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ididah bangsa ai na madokahtu si Musa ase tuad hun dolog ai, martumpu ma bangsa ai marayak si Aron, nini ma dompaksi, “Eta bahen ma bennami naibata sibobahon hanami, halani seng ibotoh hanami atap na mahua do si Musa, halak ai, na mambobahon hanami luar hun tanoh Masir.”
2 Nini si Aron ma dompak sidea, “Tanggali nasiam ma anting-anting omas bani pinggol ni parinangon nasiam, anak nasiam pakon boru nasiam anjaha boban ma ai bangku.”
3 Jadi itanggali ganup bangsa ai ma anting-anting omas na bani pinggol ni parinangon ni sidea, anak ni sidea pakon boru ni sidea anjaha iboban ma ai bangku.
4 Ijalo ma ai hun tangan ni sidea, ibahen ma rumangni marhitei panurat, anjaha ai ma iusihi mambahen sada lombu tuangan; jadi nini sidea ma, “On ma naibatamu, ale Israel, na mambobahon ho tangkog hun tanoh Masir.”
5 Dob ididah si Aron ai, ipajongjong ma sada anjapanjap i lobeini, jadi martingting ma ia, nini ma, “Patar ma ari raya bani Jahowa.”
6 Jadi ipagirah sidea ma patarni ai puho, igalangkon ma galangan hatarimakasihon; dob ai hundul ma bangsa ai mangan minum anjaha jongjong ma sidea marguro-guroi.
7 Dob ai nini Jahowa ma dompak si Musa, “Tuad ma ho, ai domma maruhur magou bangsamin, na binobahonmin tangkog hun tanoh Masir.
8 Podas ni ai manimbil sidea humbani dalan na dob hupatuduhkon bani sidea. Domma ibahen sidea bani sidea lombu tuangan, domma pala marsombah anjaha manggalang sidea hujai, anjaha ihatahon, ʻOn ma naibatamu, ale Israel, na dob mambobahon ho tangkog hun tanoh Masir.ʼ”
9 Nini Jahowa ma use dompak si Musa, “Domma huidah bangsa on, bangsa na hengkeng maruhur do on.
10 On pe palopas ma gajag ringis-Ku bani sidea laho mansiapkon sidea; tapi Hubahen pe ho sada bangsa na banggal.”
11 Tapi ielek-elek si Musa ma Jahowa, Naibatani, nini ma, “Mase ma gajag ringis-Mu, ale Jahowa mangidah bangsa-Mu, na dob Binobahon-Mu luar hun tanoh Masir, marhitei kuasa bolon pakon marhitei tangan na marhagogohon?
12 Mase ma maningon hatahonon ni halak Masir sonon, ʻLaho mangagou sidea do ase ibobahon sidea luar, laho mamunuh sidea i atas ni dolog anjaha manripaskon sidea hun atas tanoh on?ʼ Pahombun Ham ma ringis-Mu na banggal in, marpangulaki ma uhur-Mu pasal hamagouan na sihol pasogopon-Mu hubani bangsa-Mu.
13 Ingat Ham ma si Abraham, si Isak pakon si Israel jabolon-Mu in, na dob pala marbulawan Ham bani diri-Mu mangkatahon bani sidea, ʻSai pabueion-Ku do ginomparnima songon bintang na i langit, anjaha ganup tanoh on na dob Huparbagah ai sai berehonon-Ku do hubani ginomparmu, bahen siteanon ni sidea sadokah ni dokahni.ʼ”
14 Jadi marpangulaki ma uhur ni Jahowa pasal hamagouan na dob Nilumbahon-Ni sibahenon-Ni hubani bangsa-Ni.
15 Dob ai marhusor ma si Musa anjaha tuad hun dolog ai rap pakon na dua batu panuratan hasaksian ai bani tanganni, na marsurat hadualopahsi; na salopah on pakon na salopah nari marsurat do.
16 Na binahen ni Naibata do batu panuratan ai, anjaha surat ai pe surat ni Naibata do, na niuhirhon-Ni hubani batu panuratan ai.
17 Dob ibogei si Josua sora ni bangsa ai marsurak-surak, nini ma dompak si Musa, “Adong songon sora ni na marporang ibagas parsaranan ai.”
18 Tapi nini si Musa ma, “Sedo sora ni surak-surak hamonangan ai, atap sora ni doruh-doruh hataluan, tapi sora ni doding na marsibalos-balosan do ai.”
19 Jadi dob dohor ia hubani parsaranan ai anjaha ididah lombu ai pakon tortor ai, gajag ma ringis ni si Musa, igijigkon ma humbani tanganni batu panuratan ai, gabe mabolah i toruh ni dolog ai.
20 Dob ai ibuat ma lombu na dob pinauli ni sidea ai; itutung ma ibagas apuy, iduda ma lumat tumang, itirtirhon ma hu atas bah anjaha ipainumkon ma ai bani halak Israel.
21 Nini si Musa ma dompak si Aron, “Aha gakni ibahen bangsa on bam, ase iparoh ho dousa na sonai banggalni bani sidea?”
22 Nini si Aron ma, “Ulang ma gajag ringis ni tuanku; ai itanda ham do bangsa on, na bajan do paruhur ni sidea.
23 Nini sidea do hu bangku, ʻPauli bennami naibata, na mambobahon hanami, ai seng ibotoh hanami atap na mahua do si Musa, halak ai, na mangarahkon hanami tangkog hun tanoh Masir.ʼ
24 Jadi ningku ma tongon, ʻBarang ise na maromas, itanggali ma anjaha ibere ma ai hu bangku; hugijigkon ma ai hubagas apuy, gabe luar ma lombu on.ʼ”
25 Dob ididah si Musa na so marrantei be bangsa ai, ai domma ipalopas si Aron gabe habadoron i tongah-tongah ni imbang ni sidea,
26 jadi jongjong ma si Musa i horbangan ni parsaranan ai, anjaha nini ma, “Ise hampit Jahowa? Roh ma hu bangku!” Jadi martumpu ma humbani ganup halak Levi.
27 Dob ai nini ma dompak sidea, “Sonon do hata ni Jahowa, Naibata ni Israel, ʻGanup ma mambahen podangni hu binongeini, mulak-ulak ma nasiam hun horbangan on hu horbangan ai ibagas parsaranan in, anjaha ganup ma mambunuh saninani, hasomanni pakon sindohorni.ʼ”
28 Jadi ibahen halak Levi ma hombar hubani na hinatahon ni si Musa, gabe rasei ma bani na sadari ai hira-hira tolu ribu halak.
29 Nini si Musa ma, “Domma iuras nasiam diri nasiam sadari on bani Jahowa, ai ganup do manlawan anakni pakon saninani, gabe boi ibere pasu-pasu bani nasiam sadari on.”
30 Patarni ai nini si Musa ma dompak bangsa ai, “Banggal tumang do dousa na binahen nasiam ai. Tangkog ma ahu sonari marayak Jahowa, andohar jumpah ahu pardearan pasal dousa nasiam ai.”
31 Jadi dob mulak si Musa hubani Jahowa, nini ma, “Ah, banggal tumang do dousa na binahen ni bangsa on; ibahen sidea do bani sidea naibata humbani omas.
32 On pe, sai marpangulaki ma uhur-Mu bani dousa ni sidea ai, anggo lang sasap Ham ma goranku gelah humbani pustaha na dob sinurat-Mu ai.”
33 Tapi nini Jahowa ma dompak si Musa, “Ise na mardousa dompak Ahu, goranni ai do sasapon-Ku humbani pustahang-Ku.
34 On pe, laho ma ho, arahkon ma bangsa in hu tanoh na dob Huhatahon bam. Tonggor ma, malekat-Kin do mardalan i lobeimu, tapi bani ari pambalason-Ku, balaskonon-Ku do hubani sidea dousa ni sidea ai.”
35 Jadi iajar Jahowa ma bangsa ai, halani isombah sidea lombu na pinauli ni si Aron ai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA