Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 “Anjaha pauli ma sada anjapanjap panutungan ni dahupa; maningon humbani hayu nangka do paulionmu ai.
2 Saasta ganjangni, saasta bolagni; maningon marompat suhi ai, anjaha dua asta gijangni; tandukni pe luar hunjai ma.
3 Lampis ma ai pakon omas pitah, sonai homa tutupni, dingdingni inggot pakon tandukni; maningon bahenonmu homa marlampis omas pitah inggot.
4 Bahen ma dua pinggol-pinggol omas i toruh ni laisni ai; maningon bahenonmu do ai bani lambungni na dua ai angkup, bahen panurukan ni lanja-lanja ase boi marhitei ai usungon.
5 Bahen ma lanja-lanja ai humbani hayu nangka, anjaha lampis ma ai bani omas.
6 Pajongjong ma anjapanjap ai i lobei ni tirei ai, na mangondingi poti hasaksian ai, i lobei ni tutup pardearan ai, na i babou ni hasaksian ai, hujai ma jumpahkononku ho.
7 Maningon manutung dahupa na misbou ma si Aron i atasni; ganup sogod sanggah na padearhon lampu ai ia, maningon manutung dahupa ia.
8 Sonai homa anggo sihol nahitan ni si Aron lampu ai sanggah bod ari, maningon tongtong ia manutung dahupa i lobei ni Jahowa torus marsundut-sundut.
9 Seng bulih galangkononnima i atasni dahupa na legan, sonai homa galangan situtungon, galangan sipanganon barang manguseihon galangan siinumon hujai.
10 Maningon si Aron mambahen pardearan i atas tandukni sahali satahun; marhitei daroh ni galangan pardearan maningon bahenonni pardearan sahali satahun torus marsundut-sundut, ai na pansing sahalian do ai bani Jahowa.
11 Ambah ni ai nini Jahowa ma dompak si Musa:
12 Anggo ibilangi ho buei ni halak Israel mangihutkon bilangan ni sidea, maningon ganup sidea mambere partobus ni hosahni bani Jahowa sanggah binilanganmin, ase ulang hona papa sidea sanggah na binilanganmin sidea.
13 On do na maningon sibereon ni ganup na tarbilang ai: Satongah sekel mangihutkon sekel bani ianan na pansing ai (sasekel mararga dua puluh gera); satongah sekel gabe galangan bani Jahowa.
14 Ganup na dob tarbilang ai olat ni na marumur dua puluh tahun hu atas maningon mambere galangan bani Jahowa.
15 Halak na bayak seng bulih gandaanni, anjaha halak na miskin seng bulih oruanni mambere sisatongah sekel ai bahen galangan bani Jahowa pajongjong pardearan bani hosahnima.
16 Maningon buatonmu duit partobus ai humbani halak Israel anjaha pakeionmu ai bani horja i lampolampo partumpuan ai; ai ma pardingatan i lobei ni Jahowa laho mardingat halak Israel, gabe pardearan bani hosahnima.”
17 Nini Jahowa ma use dompak si Musa,
18 “Bahen ma homa sada tong tombaga ampa onjolanni humbani tombaga bahen parburihan. Bahen ma ai i holangkolang ni lampolampo partumpuan pakon anjapanjap ai, anjaha nahi ma bah hujai.
19 Bah ai ma buaton ni si Aron pakon anakni mamurihi tangan pakon nahei ni sidea.
20 Anggo masuk sidea hubagas lampolampo partumpuan ai, maningon lobei marburih sidea, ase ulang matei sidea; sonai homa anggo idohori sidea anjapanjap ai sihol marugas, manutung galangan situtungon bahen dahupa hubani Jahowa,
21 maningon lobei burihan ni sidea tangan pakon nahei ni sidea, ase ulang matei sidea. Ai ma gabe aturan na totap bani sadokah ni dokahni ronsi bani ginomparni marsundut-sundut.”
22 Ambah ni ai nini Jahowa ma dompak si Musa,
23 “Tapi anggo ho, buat ma bam rompah-rompah sijengesan: Hamonan na manjalir lima ratus sekel, kulit manis satongahni, ai ma dua ratus lima puluh sekel pakon hasowor ampa halawas dua ratus lima puluh sekel,
24 anjaha jarangou lima ratus sekel mangihutkon sekel na bani ianan na pansing ai, ampa minak jetun sahin.
25 Masak ma hujai minak na pansing, manambahi minak pulung-pulungan na sinaor mangihutkon hapandeian ni tuhang pulung, minak pamminaki na pansing ma ai.
26 Maningon minakanmu ma marhitei ai lampolampo partumpuan ai, poti parpadanan ai,
27 meja ai ampa ganup parugasni, parpalitaan ai ampa parugasni, anjapanjap pardahupaan ai,
28 anjapanjap panggalangan ni galangan situtungon ai ampa ganup parugasni, tong parburihan ai ronsi onjolanni.
29 Maningon papansingonmu do ai ase gabe pansing sahalian; ganup na manjamah ai sai na gabe pansing do.
30 Maningon minakanmu do si Aron pakon ganup anakni ai, anjaha urasonmu do sidea gabe malim Bangku.
31 Hatahon ma hubani halak Israel sonon, ʻOn ma minak pamminaki na pansing Bangku torus marsundut-sundut.ʼ
32 Seng bulih useihononkon ai bani angkula ni atap ise jolma, anjaha seng bulih bahenonmu minak na legan na sonon parmasakni, ai na pansing do ai, anjaha maningon pansing do ai bannima.
33 Barang ise na mambahen minak na sonin parmasakni, atap na manguseihon ai hubani halak na legan, maningon siapkonon ia humbani bangsani.”
34 Dob ai nini Jahowa ma use dompak si Musa, “Buat ma bam rompah-rompah na misbou, gotah ni hamonan, banei batu, mangemange, rompah-rompah pakon dahupa na pitah, dos bei bueini.
35 Masak ma ai bahen dahupa, na sinampur mangihutkon hapandeian ni tuhang pulung, ginaraman, pitah anjaha pansing.
36 Giling ma ai deba lumat sahalian, anjaha nahkon ma deba hunjai hu lobei ni hasaksian ai ibagas lampolampo partumpuan ai, ase roh Ahu marayak ho hujai; na pansing sahalian ma ai bannima.
37 Ia dahupa simasakonmai, seng bulih bahenonnima sonai parmasakni bannima, maningon pansing do ai bam i lobei ni Jahowa.
38 Barang ise na mambahen sonai, bahen rium-riumanni, maningon rotaponkon ia humbani bangsani.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA