Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ I bas sada wari sanga Musa ermakan biri-biri ras kambing mamana Jetero, imam Midian, tupung igerana asuh-asuhenna ngepari gurun pasir, seh ia ku Deleng Sinai deleng si badia.

² I je, teridah man bana Malekat TUHAN bagi gara api i tengah-tengah rambah duri. Idah Musa rambah ndai gara, tapi lalap la meseng,

³ emaka mamang atena janah nina i bas ukurna, "Ngkai maka rambah e lalap la keri meseng? Kudeherilah, gelah kuperdiateken."

⁴ Kenca idah TUHAN maka Musa nggo reh deherna, erlebuh Ia i tengah-tengah rambah ndai nari nina, "Musa! Musa!" Ngaloi Musa nina, "Enda aku."

⁵ Nina Dibata, "Ula deheri ku jenda. Tangtangi selopndu, sabap kam sangana tedis i bas taneh si badia.

⁶ Aku kap Dibata nini-ninindu, Dibata Abraham, Isak ras Jakup." Minter itamburi Musa ayona, sabap mbiar ia natap Dibata.

⁷ Jenari nina TUHAN, "Nggo Kuidah uga serana akap bangsangKu i Mesir. Nggo Kubegi ia nderkuh man bangKu gelah ipulahi i bas mandur-mandur budak nari. Kuteh kerina kiniseranna.

⁸ Emaka Aku nggo nusur mulahi ia i bas kuasa bangsa Mesir nari, janah Kutaruhken ku taneh si mehuli dingen mehumur, taneh si genduari iingani bangsa Kanaan, Heti, Amori, Peris, Hewi, ras Jebusi.

⁹ Tuhu nggo Kubegi pertangis bangsangKu, janah Kuidah uga ia idehken bangsa Mesir.

¹⁰ Genduari Kusuruh kam ndahi raja Mesir, gelah ibabaindu bangsangKu ndarat i bas negeri e nari."

¹¹ Tapi nina Musa man Dibata, "La kap lit ergangku. Uga banci aku ndahi raja e janah mabai bangsa Israel ndarat i Mesir nari?"

¹² Erjabap Dibata nina, "Aku ras kam, janah kenca itaruhkenndu bangsa e ndarat i Mesir nari, isembahndu pagi Aku i das deleng enda. Em pagi tandana maka Aku nggo nuruh kam."

¹³ Tapi nina Musa njabapsa, "Adi kujumpai pagi bangsa Israel janah ningku man bana, 'Dibata nini-ninindu nuruh aku njumpai kam,' tentu isungkunna aku, 'Ise gelarna?' Jadi uga pagi ningku man bana kerina?"

¹⁴ Nina Dibata man Musa, "Enda me si arus ikatakenndu man bana, 'Si tergelar AKU TETAP AKU nggo nuruh aku njumpai kam.'

¹⁵ Kataken man bangsa Israel maka Aku, TUHAN, Dibata nini-ninina, Dibata Abraham, Isak, ras Jakup nggo nuruh kam njumpai ia kerina. Enda me gelarKu seh rasa lalap; bagenda me la banci lang Aku igelari i bas sundut ku sundut.

¹⁶ Berkatlah kam, dilo peminpin-peminpin bangsa Israel pulung janah turiken man bana kerina maka Aku, TUHAN, Dibata nini-ninina, Dibata Abraham, Isak, ras Jakup, nggo ncidahken bana man bandu. Turiken man bana kerina maka Aku nggo reh ndahi ia, janah nggo ngidah kai si ibahan bangsa Mesir man bana.

¹⁷ Nggo Kutetapken maka la banci lang Kutaruhken ia ndarat i i bas kimiseranna nari i Mesir, janah Kubabai ia ku taneh si mehuli ras mehumur, taneh bangsa Kanaan, Heti, Amori, Peris, Hewi, ras Jebusi.

¹⁸ Tentu ibegiken bangsangKu pagi kai si ikatakenndu man bana. Kenca bage, kam ras peminpin-peminpin bangsa Israel la banci la lawes njumpai raja Mesir, janah kataken man bana, nindu, 'TUHAN, Dibata bangsa Heber, nggo ncidahken bana man kami. Emaka genduari, pelepas kami lawes ku gurun pasir telu wari dekahna erbahan persembahen man TUHAN, Dibata kami.'

¹⁹ Kuteh nge maka labo ibere raja Mesir kam lawes, adi la kin ia ipaksa.

²⁰ Perban e Kucidahken pagi kuasangKu janah Kuukum Mesir alu erbage cilaka si mesangat i tengah-tengahna. Jenari pagi maka iberena kam lawes.

²¹ Kubahan pagi maka bangsa Mesir malang man bandu. Erkiteken si e adi berkat pagi bangsangKu, labo ia lawes ngambe-ngambe.

²² Tep-tep diberu bangsa Israel lawes pagi njumpai bangsa Mesir si ndeher rumahna ras, bage pe diberu kalak Mesir temanna serumahen, jenari ipindona pagi uis, perhiasen-perhiasen emas ras pirak. Ipakeken bangsa Israel pagi barang-barang enda man anakna si dilaki ras anakna si diberu. Alu bagenda me pagi iangkatna kebayaken bangsa Mesir."

Keluaran

Video Keluaran 3

Ikuti Kami:

KONTAK | PARTISIPASI | DONASI