Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sanga si e, sekalak suku Lewi erjabu ras sekalak diberu si sada suku ras ia,
2 jenari ipupusna me sekalak anak dilaki. Kenca idahna rupa anakna e mejile tuhu-tuhu, emaka ibunikenna telu bulan dekahna.
3 Tapi kenca lanai terbunikenca, ibuat nande anak e sada keranjang si ibahan i bas batang rengo nari, jenari ilapisina alu damar gelah ula ku bas lau. Itamakenna anakna ku bas keranjang e, jenari icibalkenna i tengah-tengah dukut si mbages i tepi Lau Nil.
4 I dauh-dauh nari tedis turang anak e ngenen tah kai kari jadi man bana.
5 Emaka reh me puteri raja ridi ku lau belin e. Sanga ia ridi, erdalan-dalan dayang-dayangna i tepi lau. Rempet idah puteri raja keranjang e i tengah-tengah dukut si mbages, emaka minter isuruhna sekalak suruh-suruhenna si diberu muatsa.
6 Italangi puteri raja keranjang e, idahna sekalak anak dilaki i bas. Tangis anak e, emaka mekuah atena. "Ugapa pe anak kalak Heber enda," nina.
7 Kenca bage isungkun turangna ndai puteri raja nina, "Ntah kulegiken atendu sekalak diberu bangsa Heber gelah ipepinemna anak enda?"
8 "Merandal, to legiken," nina. Emaka lawes singuda-nguda ndai ndilo nande anak e.
9 Ikataken puteri raja man nande anak e nina, "Baba anak enda, pekena-kena, kubereken pagi upahndu." Emaka ibabana ras ipekena-kenana anak e.
10 Kenca nggo cukup umur anak e, emaka itaruhkenna man puteri raja. Ibahanna jadi anak angkatna. Nina i bas ukurna, "Kuangkat ia i bas lau nari, emaka kubahanlah gelarna Musa."
11 I bas sada wari kenca Musa nggo dewasa, ndarat ia njumpai bangsana, bangsa Heber. Emaka idahina ku ingan bangsa e ipaksa ndahiken dahin si mberat. Tupung si e idahna pe sekalak bangsa Mesir munuh sekalak bangsa Heber, teman sebangsana.
12 Ipernehen Musa ku sekelewetna, janah kenca idahna maka ise pe la mperdiateken ia, ibunuhna kalak ndai, jenari itanemkenna i bas kersik.
13 Pepagina ndarat ka ia, idahna dua kalak Heber sangana rubat. Ikataken Musa man kalak si ersalah nina, "Ngkai maka ipekpekndu teman sebangsandu?"
14 Tapi erjabap ia nina, "Ise si ngangkat kam jadi peminpin ras hakim kami? Ntah atendu munuh aku bagi nggo ibunuhndu bangsa Mesir nderbih?" Emaka mbiar Musa janah nina i bas ukurna, "Tentu nggo iteh kalak kai si nggo kubahan."
15 Kenca ibegi raja kerna kai si nggo jadi, emaka idaramina dalan munuh Musa, tapi lompat Musa jenari lawes ia ringan i taneh Midian. I bas sada wari, tupung ia kundul deherken sada sumur, reh me pitu kalak singuda-nguda, atena muat lau man inemen biri-biri ras kambing bapana. Singuda-nguda si pitu e, eme anak Jetero, imam Midian.
16 (Kel 2:15)
17 Tapi ipelawes piga-piga kalak permakan ia pituna. Emaka keke Musa nampati ia janah iberena minem asuh-asuhenna ndai.
18 Kenca singuda-nguda e mulih jumpa ras bapana, isungkun bapana ia nina, "Ngkai maka bage lampasna kam mulih sendah?"
19 "Lit sekalak kalak Mesir reh nampati kami sanga kami iganggu permakan-permakan," nina erjabap. "Tambah si e itimbana lau man kami janah iberena minem asuh-asuhen kami."
20 "I ja ia?" nina nungkun man anakna. "Ngkai maka itadingkenndu ia i darat ah? Dilo ia man ras."
21 Bage me Musa pe setuju ringan i je. Jenari iserehken Jetero anakna, Sipora, man Musa.
22 Ipupusna sekalak anak dilaki. Nina Musa i bas ukurna, "Aku sekalak pertandang i bas ingan enda, emaka kubahanlah gelarna Gersom."
23 Kenca piga-piga tahun dekahna, mate me raja Mesir e, tapi kalak Israel tetap denga nge kesah-kesah perban perbudaken janah nderkuh pe ia mindo penampat. Penderkuhna e seh man Dibata,
24 si megi sorana tangis, janah iinget Dibata PadanNa ras Abraham, Isak ras Jakup.
25 Idah Dibata bangsa Israel iperbudak, janah IperdiatekenNa bangsa e.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA