Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Yitro, mattowana Mosa, imam e Midian rowa, meyarsa sabarang se la elampa’agi Allah kaangguy Mosa ban bangsa Isra’il e bakto ngaterragi bangsa jareya kalowar dhari Messer.
2 Daddi Yitro laju meyos ka Mosa, abakta Zipora rajina Mosa se edina e Midian,
3 ban pottra lalake’na se kadhuwa, iya areya Gersom ban Eliyezer. Pottra se nomer settong jareya enyamae Gersom polana Mosa adhabu, "Sengko’ reya e dhinna’ oreng manca";
4 dineng se nomer dhuwa’na enyamae Eliyezer polana Mosa adhabu, "Allah se esemba tang bangatowa la nolong ban masalamet sengko’ sampe’ sengko’ ta’ epate’e bi’ rato Messer."
5 Yitro ban rajina Mosa sarta pottrana se kadhuwa napa’ ka ra-ara kennengnganna Mosa akemah e seddi’anna gunong socce.
6 Mosa eparenge kabar ja’ reng-oreng jareya dhateng,
7 daddi laju entar ngamba’. Mosa asojud e adha’anna Yitro ban nyeyom mattowana jareya. Reng-oreng jareya kabbi padha saleng atanya parkara kabadha’anna bang-sebang, saellana jareya laju maso’ ka dhalem kemahna Mosa.
8 Mosa notorragi ka mattowana sabarang se elampa’agi PANGERAN ka rato ban bangsa Messer se terro masalamedda oreng Isra’il. Mosa notorragi keya sakabbinna kasossa’an se etanggung bangsa Isra’il e dhalem parjalanan, ban baramma PANGERAN masalamet bangsa jareya.
9 E bakto meyarsa jareya kabbi, Yitro arassa perak,
10 laju adhabu, "Molja’agi PANGERAN se masalamet ba’na dhari tanangnga rato ban bangsa Messer! Molja’agi PANGERAN se mabebas bangsa Isra’il dhari odhi’na se ekadunor oreng!
11 Sateya sengko’ tao ja’ PANGERAN lebbi raja dhari lah-illah laenna, sabab PANGERAN la masalamet ommat Isra’il dhari tanangnga oreng Messer se talebat ya-nyeya ka oreng Isra’il."
12 Saellana jareya Yitro abakta kurban obbaran ban kurban sambelliyan se eatorragi ka Allah. Harun ban pin-pamimpinna bangsa Isra’il se laenna padha meyos ka jadhiya ban adha’ar abareng ban Yitro menangka kabakteyan ka Allah.
13 Kalagguwanna Mosa ngadili reng-oreng Isra’il se padha atokar. Reng-oreng jareya manjeng e adha’anna Mosa dhari gu-laggu sampe’ malem.
14 E bakto Yitro ngoladi sabarang se kodu elampa’agi Mosa jareya, laju mareksane, "Epabaramma’a bi’ ba’na reng-oreng jareya? Arapa bi’ ba’na me’ elakone ekadibi’i, sampe’ reng-oreng reya kodu manjeng e jadhiya dhari gi’ laggu sampe’ malem pera’ menta’a babala’an?"
15 Dhabuna Mosa, "Reng-oreng paneka nyabis ka kaula terro onenga ponapa se daddi kasokanna Allah.
16 Manabi badha se atokar, reng-oreng paneka ngadhep ka kaula, nyo’on potose parkarana sareng nantowagi pasera se lerres pasera se sala, sareng kaula reng-oreng paneka laju eparenge oneng kon-papakonna sareng kom-hokomma Allah."
17 Dhabuna Yitro, "Jareya ta’ bagus.
18 Ba’na lesso, reng-oreng jareya lesso keya. Lalakon jareya berra’ gallu mon pera’ elakone oreng kasorang.
19 Mara bi’ sengko’ ba’na ebala’ana, ban Allah tanto apareng partolongan ka ba’na. Pajat teppa’ mon ba’na abakkele bangsa reya e ajunanna Allah ban ngeba orosanna ka ajunanna.
20 Ba’na kodu ngajarragi ka bangsa jareya kon-papakonna Allah ban nerrangngagi carana odhi’ se bagus ban pa-apa se kodu ejalannagi reng-oreng jareya.
21 Tape salaenna jareya ba’na kodu mele lalake’an se bicaksana, soro ngapalae oreng saebu, saratos, saeket, ban sapolo oreng. Se epele jareya kodu oreng se tako’ ban ta’at ka Allah, ekenneng parcaja, ban ta’ endha’ narema go’-sogo’.
22 Reng-oreng jareya padaddi hakimma bangsa reya, e dhalem kalompo’na bang-sebang. Lalakon jareya kodu ejalannagi pateptep. Ra-parkara se raja olle giba ka ba’na, tape parkara se ne’-kene’ ekenneng pamare dibi’. Jareya madhammang ka lakona ba’na sabab reng-oreng jareya noro’ nanggung lakona ba’na.
23 Mon ba’na ajalannagi kantha jareya, ban parkara akantha se epakonnagi Allah ka ba’na, ba’na ta’ kera kalessowen, ban reng-oreng padha ngenneng mole bi’ ate se legga kabbi lantaran parkarana lekkas epamare."
24 Mosa atoro’ ka babala’anna Yitro,
25 laju mele reng-oreng se bicaksana e antarana oreng Isra’il, se epadaddi pamimpinna oreng saebu, saratos, saeket ban sapolo oreng.
26 Reng-oreng jareya ajalannagi lalakonna, daddi hakimma bangsa Isra’il. Ra-parkara se raja egiba ka Mosa, dineng parkara se ne’-kene’ epamare dibi’.
27 Saellana jareya Yitro amet ka Mosa, terros gubar ka nagarana.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA