Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca bage Musa ras kerina bangsa Israel ngendeken ende-enden enda man TUHAN, "Ateku rende man TUHAN, sabap nggo menang Ia alu mulia; nggo IbenterkenNa ku bas lawit kerina kuda ras si ngersaksa.
2 TUHAN kap pengawalku si megegeh; Ia kap si nggo nelamatken aku. Ia kap Dibatangku, emaka ateku muji Ia. Ia kap Dibata bapangku, emaka kupebelin GelarNa arah ende-endenku.
3 TUHAN kap si mbisa; TUHAN, eme kap GelarNa.
4 IbenterkenNa ku bas lawit tentera Mesir ras gereta perangna; mate gedap bas Lawit Merah puanglima-puanglima pilihenna.
5 Lawit si mbages nutupi ia; gedap ku teruh desken batu.
6 TanNdu si kemuhen, o TUHAN, tuhu-tuhu seh kal gegehna; musuh IperperkenNa seh getem kerinana.
7 Alu kemenangen si mulia IkerapkenNdu si ngelawan Kam; RawaNdu luar desken api si gara, ngkeriken MusuhNdu seh meseng bagi nggala.
8 IembusNdu lawit, emaka launa erjerungjung ku datas; pajek desken lingling; janah kubang i bas lawit si mbagesna pe jadi piher.
9 Nina musuh i bas ukurna, 'Kuayaki lah ia maka kutangkap; kubagi-bagiken ertana, janah kubuat kerina si ngena ateku; kusintak pedangku, gelah kukernepken ia.'
10 Tapi sekali saja Kam erkumesah o TUHAN, nggo gedap bangsa Mesir, desken timah, gedap ia kerina ku bas lau si mejin bagesna.
11 O TUHAN, apai kin dibata-dibata si bali ras Kam? Labo lit ise pe bagi Kam badiana. Ise kin si ngasup erbahan tanda kuasa ras perbahanen si mbelin bagi si IbahanNdu?
12 Ipepinter Kam TanNdu si kemuhen, emaka musuh kami itelen doni enda.
13 Erkiteken setia Kam man PadanNdu, itaruhken Kam bangsa si nggo IpulahiNdu; alu GegehNdu itegu-TeguNdu ia ku TanehNdu si badia.
14 Bangsa-bangsa nggo megisa, emaka nggirgir ia ban biarna; kalak Pilisti ikuasai kebiaren.
15 Peminpin-peminpin kalak Edom gentar; kalak si mbisa bangsa Moap nggirgir; kalak Kanaan bene ukurna.
16 Kebiaren ras aru ate ndabuh man bana. Idahna GegehNdu, o TUHAN, emaka kote ia kerina iban biarna. Seh BangsaNdu nggo mentas, eme bangsa si IbebaskenNdu i bas perbudaken nari.
17 IbahanNdu ia, janah IsuankenNdu ia i bas DelengNdu, ingan si nggo IpilihNdu, o TUHAN, jadi RumahNdu, Rumah BekasNdu majekkenca.
18 Kam, o TUHAN, Kam kap Raja rasa lalap seh rasa lalap."
19 Bangsa Israel erdalan arah tengah lawit i babo taneh kerah. Tapi kenca gereta perang kalak Mesir ras kudana bage pe puanglima si maba gereta e bengket ku bas lawit e, ipemulih TUHAN ka lau lawit e, emaka gedap ia kerina.
20 Ibuat nabiah Miryam turang Harun, gendangna jenari kerina diberu-diberu ngikutken ia, ergendang janah landek.
21 Rende Miryam man kalak enda kerina, "Rende lah man TUHAN, sabap nggo IdatNa kemenangen si mulia nggo IbenterkenNa kuda ras kerina si ngersaksa ku bas lawit."
22 Jenari ibabai Musa bangsa Israel lawes i Lawit Merah nari ku gurun pasir Sur. Nggo telu wari dekahna ia erdalan arah gurun pasir, tapi lalap la jumpa lau.
23 Emaka seh me ia ku sada ingan, gelarna Mara, tapi lau si lit i je seh kal pagitna, emaka la terinem. Em sabapna maka igelari Mara.
24 Erkiteken si e jungut-jungut bangsa Israel man Musa janahna mindo nina, "Apai inemen kami?"
25 Meseksek kal pertoton Musa man TUHAN, jenari ituduhken TUHAN man bana sepenggel batang kayu. Ibenterken Musa kayu ndai ku bas lau e, emaka lau ndai nggo banci iinem. I bas ingan e ibereken TUHAN man bangsa Israel Undang-undang si man ikutenken, janah i je pe IujiNa bangsa e.
26 Nina TUHAN, "Adi tuhu-tuhu kam patuh man bangKu alu erbahan kai si payo Kuakap, janah iikutkenndu kerina si Kusuruh, la kam Kuukum alu penakit-penakit si Kubahan man bangsa Mesir. Aku kap TUHAN si erbahanca kam mejuah-juah."
27 Pepagina seh ia i Elim. I je lit sepulu dua ulu lau ras pitu puluh batang kurma; emaka ia erkemah i tepi lau ndai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA