Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dhabuna PANGERAN ka Mosa,
2 "Kabala ka reng-oreng Isra’il, soro abali, pas soro akemah e adha’anna kottha Pi-Hahirot, e antarana kottha Migdol ban Tase’ Galagas, e seddi’anna kottha Ba’al-Zefon.
3 Bi’ rato Messer reng-oreng Isra’il tanto esanggu alalana e nagara reya ban posang e ra-ara e nagara reya.
4 Bi’ Sengko’ rato jareya epacengkala, epanyerserra ba’na. Tape rato Messer ban pasukanna bi’ Sengko’ epakala’a; jareya bakal madhatengnga kahormadan ka Sengko’. Daddi oreng Messer me’ olle tao ja’ Sengko’ reya PANGERAN." Oreng Isra’il atoro’ ka papakon jareya.
5 E bakto rato Messer meyarsa kabar ja’ oreng Isra’il la ondur, rato ban ba-ponggabana pas aoba pekkeranna, ca’na reng-oreng jareya, "Baramma sengko’ ban ba’na reya? Me’ oreng Isra’il ebagi ondur, sateya Messer la ta’ andhi’ dunor pole!"
6 Rato pas mondhut kareta perrangnga, sarta makompol tantarana.
7 Rato pas mangkat abakta kareta perrang nem atos meggi’, iya areya sakabbinna kareta perrang se badha e Messer, genna’ ban para parwirana.
8 Bi’ PANGERAN rato jareya epacengkal, epanyerser oreng Isra’il se ajalan kalowar dhari nagara Messer sambi ejaga bi’ kobasana PANGERAN.
9 Dineng tantara Messer ban ran-jaranna, ta-karetana ban reng-orengnga se nompa’ ta-kareta jareya, nyerser oreng Isra’il. Se eserser ecapo’ e kennengnganna se akemah, e seddi’anna Tase’ Galagas e ma’-semma’na Pi-Hahirot e adha’anna Ba’al-Zefon.
10 E bakto oreng Isra’il padha nangale’e rato Messer ban tantarana dhateng, kabbi padha katako’en, laju aera’ menta tolong ka PANGERAN.
11 Ca’na reng-oreng jareya ka Mosa, "Ponapa e Messer tadha’ tana koburan, me’ daddi kaula egiba epamateya e sagara beddhi paneka? Paneka’ ollena sampeyan se abakta kaula dhari Messer!
12 Kaula gu ta’ ampon mator ka sampeyan ja’ masthe badha kadaddiyan kadi paneka? Kaula ampon ngoca’ diggal tekka’a ekadunor oreng Messer; kaula ja’ rok-erok. Lebbi becce’ daddi dunorra oreng Messer etembang mate e ra-ara paneka."
13 Dhabuna Mosa, "Ella, ja’ tako’! Tahan terros, dhaggi’ ba’na bakal taowa apa se bakal elampa’agiya PANGERAN se nolonga ba’na. Ba’na ta’ kera tatemmo bi’ reng-oreng Messer rowa pole.
14 PANGERAN se alabannagiya ka mosona ba’na, ba’na ta’ osa apa-rapa."
15 Dhabuna PANGERAN ka Mosa, "Arapa ba’na me’ ra’-era’an menta tolong? Soro ajalan terros reng-oreng jareya.
16 Angka’ tongkedda ba’na jareya, pangaceng e attasanna tase’ jareya. Aengnga tanto pas apesa madhuwa, reng-oreng Isra’il bakal ngennenga ajalan e dhasarra se kerreng.
17 Bi’ Sengko’ reng-oreng Messer epacengkala parana, terrosa nyerser oreng Isra’il. Sengko’ noduwagiya ja’ Sengko’ kobasa ka rato Messer, ka tantarana ban ta-kareta perrangnga ban ka reng-oreng se nompa’ ta-kareta jareya.
18 Mon reng-oreng Messer jareya epakala bi’ Sengko’, tanto Sengko’ pas ehormadi, ban reng-oreng Messer tanto pas tao ja’ Sengko’ reya PANGERAN."
19 Malaekadda Allah, se badha e adha’anna pasukan Isra’il, ngalle ka budhi. Pelar ondhem gella’ ngalle keya ka budhiyanna sampe’ badha
20 e antarana pasukan Messer ban pasukan Isra’il. Kennengnganna oreng Messer daddi petteng polana ondhem jareya, tape kennengnganna oreng Isra’il daddi tera’, daddi tantarana Messer ta’ ngenneng nyemma’e tantarana Isra’il samalem benteng.
21 Mosa mangaceng tongkedda e attasanna tase’. PANGERAN pas madhateng angen temor se santa’, aeng tase’ pas nyorot. Angen jareya ta’ endha’ ambu samalem benteng sampe’ tase’na daddi tana kerreng.
22 Aeng tase’ jareya meyak madhuwa, ban e bakto alengka tase’ oreng Isra’il jareya lebat e dhasar se kerreng, dineng aeng tase’ e kangan kacerra daddi pagarra.
23 Reng-oreng Messer ban ran-jaranna sarta ta-karetana nyerser oreng Isra’il sampe’ ka tengnga tase’.
24 Sabellunna moncar are PANGERAN ngoladi pasukan Messer gella’ dhari attas pelar apoy ban pelar ondhem; reng-oreng Messer jareya pas epasalebbudan.
25 Rodhana karetana epacekka’ ban epamereng, daddi malarat jalanna. Ca’na reng-oreng Messer jareya, "Mara nyorot kabbi. PANGERAN se aperrang nolonge oreng Isra’il!"
26 Dhabuna PANGERAN ka Mosa, "Pangaceng tanangnga ba’na e attasanna tase’, aengnga tase’ jareya tanto pas abali ka asalla, reng-oreng Messer ban ta-karetana sarta se nompa’ ta-kareta jareya tanto tasellem kabbi."
27 Daddi Mosa mangaceng astana e attasanna tase’. E bakto moncar are aeng tase’ jareya abali ka asalla. Oreng Messer aehteyar buruwa dhari aeng jareya, tape bi’ PANGERAN epatasellem kabbi.
28 Aengnga tase’ jareya abali ka asalla, notobi ta-kareta ban reng-orengnga se nompa’ jaran sarta sakabbinna pasukan Messer se nyerser pasukan Isra’il ka dhalem tase’ jareya. Oreng Messer jareya tadha’ karena settonga balakka’.
29 Tape oreng Isra’il ajalan e dhasarra tase’ se kerreng, e kangan kacerra ebatesse pagar dhari aeng.
30 E are jareya PANGERAN masalamet oreng Isra’il dhari tantara Messer; oreng Isra’il nangale’e reng-oreng Messer se mate tasellem, mayyidda ajalamperran e penggir tase’.
31 E bakto nangale’e saapa rajana kakobasa’anna PANGERAN se makala pasukan Messer jareya, oreng Isra’il pas padha tako’ ka PANGERAN, sarta pas parcaja ka PANGERAN ban ka Mosa, abdina.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA