Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sanga Musa ras Harun i Mesir ikataken TUHAN man bana nina,
2 "Bulan enda me jadi bulan si pemena i bas perkiran tahunndu.
3 Peseh lah perentah enda man kerina perpulungen bangsa Israel: I bas wari si pesepuluhken i bas bulan enda, tep-tep perbapan la banci la milih sada anak biri-biri ntah pe anak kambing guna keluargana.
4 Adi keluargana e la nterem janah la kerisa sada anak biri-biri, tah anak kambing iraskenna ras kalak si deher rumahna gelah terkeriken sada anak biri-biri tah anak kambing alu mperkiraken teremna kalak si manca ras si terpan sekalak-sekalak.
5 Banci ipilihndu biri-biri ntah pe kambing, tapi la banci la bajarna, umurna sada tahun, si la erpandangen.
6 Kenca bage, karaben i bas wari si pesepulu empatken i bas bulan e, kerina perpulungen bangsa Israel arus nggeleh asuh-asuhen si nggo isikapken e.
7 Darehna ibuat sitik, jenari tamaken ku binangun pintun si pajek duana ras ku beloti si berteng i babo pintun rumah ingan asuh-asuhen e ipan.
8 I bas berngina dagingna arus ipanggang, jenari ipan ras gule-gulen si pagit ras roti si la itama ragi.
9 La banci ipan matah-matah ntah pe itanggerken, tapi arus ipanggang kerina, subuk takalna, nahena ras isi beltekna.
10 La banci itadingkenndu sitik pe seh erpagi-pagi; adi lit denga tading, la banci la itutung seh meseng.
11 Pedas-pedas kam manca. Tupung si e arus kam make paken erdalan ndauh, pake sepatundu, cikep cikenndu. Eme Pesta Paskah guna enghamati Aku, TUHAN.
12 I bas berngi si e mentas Aku arah tengah-tengah negeri Mesir munuh kerina anak dilaki sintua, subuk manusia bage pe asuh-asuhen bage pe kerina dibata-dibata bangsa Mesir. Aku kap TUHAN.
13 Dareh si i bas pintun ndai, eme jadi sada tanda maka i je me kam ringan. Adi Kuidah dareh e, Kusilahi saja emaka la kam kena kai pe Kuban asum Kuukum kalak Mesir.
14 La banci la irayakenndu wari e jadi sada pesta agama, guna peringet-ingeten man bandu, maka Aku, TUHAN nggo erbahan si enda kerina. Rayakenlah e i bas kerina paksa-paksa si reh enda."
15 Nina TUHAN, "Pitu wari dekahna la banci ipanndu roti si itama ragi emaka si la erragi saja ngenca banci ipanndu. I bas wari si pemena la banci la iambekkenndu kerina ragi si lit i bas rumahndu, sabap kalak si man roti si itama ragi i bas si pitu wari e, ia lanai ikira bangsangKu.
16 I bas wari si pemena bage pe i bas wari si pepituken arus kam pulung erbahan kebaktin. La banci kam erdahin tupung e, tapi banci isikapkenndu nakan.
17 Rayakenlah rusur Pesta Roti si la tama ragi enda, sabap i bas wari eme suku-sukundu Kubaba ndarat i bas negeri Mesir nari. I bas kerina paksa-paksa si reh, la banci la irayakenndu wari enda alu erbahan pesta.
18 Mulai karaben i bas wari si pesepulu empatken i bas bulan si pemena seh ku bas karaben i bas wari sipeduapulusadaken la banci ipanndu roti si lit ragina.
19 Pitu wari dekahna la banci lit sitik pe ragi i bas rumahndu, sabap adi lit sekalak si man roti itama ragi, subuk ia kalak Israel asli ntah pe kalak pertandang lanai ia ikira bangsangKu."
20 (Kel 12:19)
21 Idilo Musa kerina peminpin-peminpin kalak Israel nina, "Sekalak-sekalak kam arus milih sada anak biri-biri ntah pe sada anak kambing, kenca bage gelehlah, gelah banci keluargandu ngerayaken Paskah.
22 Buat pe sada iket batang hisop, cebukken ku bas baskom si isin dareh biri-biri ntah kambing ndai, jenari sapuken dareh e ku duana binangun pintun ras ku beloti si berteng i babo pintun rumahndu. La banci ise pe kam nadingken rumahndu seh erpagi-pagi.
23 Tupung TUHAN mentas arah tengah-tengah negeri Mesir munuh kalak Mesir, IidahNa dareh si i bas beloti si berteng i babo pintun bage pe i bas binangun pintun e, maka la IbereNa Malekat Kematen mengketi rumahndu munuh kam.
24 Kam ras anak-anakndu la banci la patuh man peraturen enda seh rasa lalap.
25 Adi bengket kam ku bas negeri si nggo ipadanken TUHAN IberekenNa man bandu, la banci la tetap idalankenndu adat agama enda.
26 Adi isungkun anakndu kam nina, 'Kai ertina adat enda?'
27 Emaka nindu lah njabapsa, 'Enda kap persembahen Paskah guna pehaga TUHAN, sabap IbentasiNa rumah-rumah kalak Israel i negeri Mesir. IbunuhNa kalak Mesir tapi IselamatkenNa kita.'" Emaka, erjimpuh kalak Israel nembah.
28 Kenca bage lawes ia erbahan kai si nggo ipedahken TUHAN man Musa ras Harun.
29 Tupung tengah berngi ibunuh TUHAN kerina anak sintua i Mesir, mulai i bas anak raja nari, si mewarisi tahta kerajan, seh ku anak kalak tahanen i bas penjara bage pe kerina anak si pemena i bas asuh-asuhen.
30 I bas berngi e raja, pegawai-pegawaina, ras kalak Mesir si debanna, keke kerina. Sora nderkuh si megang terbegi i belang-belang Mesir, sabap la lit sada keluarga pe si la kematen anak.
31 Emaka i bas berngi e ka nge idilo raja minter Musa ras Harun nina, "To lawes kam ras bangsandu Israel! Tadingken negeringku enda; lawes lah, sembah lah TUHAN bagi pemindonndu.
32 Buat biri-birindu, kambingndu, ras lembundu. Tapi totokenlah maka aku daten pasu-pasu."
33 Alu mesek-sek ipindo bangsa Mesir man bangsa Israel, gelah pedas-pedas itadingkenna negeri e; nina, "Adi la kam lawes, mate nge kami kerina."
34 Emaka idemi kalak Israel kudinna salu cimpa matah si la itama ragi, ibalutina salu uis, kenca bage ipersanna lawes.
35 Ilakoken bangsa Israel sue ras si nggo ikataken Musa; nggo ipindoina man kalak Mesir perhiasen-perhiasen emas, pirak, ras pe uis.
36 Ibahan TUHAN maka melumbar kerina kalak Mesir man kalak Israel, emaka iberena kai si ipindo bangsa e. Alu bagenda iangkut kalak Israel kebayaken kalak Mesir.
37 Bangsa Israel mulai berkat i Ramses nari ku Sukot. Teremna lit kira-kira 600.000 kalak dilaki, langa ikira diberu ras anak-anak.
38 Bangsa si deban pe nterem ikut lawes, ras melala biri-biri, kambing, ras lembu.
39 Erkiteken bage rempetna ia ipelawes bangsa Mesir, bangsa Israel lanai sempat nikapken pangan ntah pe cimpa si itama ragi. Emaka itasakkenna roti si la itama ragi i bas cimpa matah si ibabana i Mesir nari e.
40 Kalak Israel ringan i Mesir 430 tahun dekahna.
41 I bas wari pendungi si 430 tahun e, kerina suku-suku bangsa TUHAN nadingken Mesir.
42 Berngi si e, eme sada berngi i ja TUHAN tetap erjaga-jaga mabai bangsa Israel ndarat i bas negeri Mesir nari. Emaka guna mperingeti kejadin e, kalak Israel pe arus erjaga-jaga tep-tep tahun i bas berngi e turun-temurun guna kemulian TUHAN.
43 Ikataken TUHAN man Musa ras Harun nina, "Enda me peraturen-peraturen Paskah: Bangsa si deban la banci man pangan si isikapken guna Paskah e,
44 tapi tep-tep budak si nggo itukurndu banci manca adi nggo isunatkenndu lebe.
45 Kalak si tandang-tandang ras kalak upahen la banci manca.
46 Pangan Paskah e arus keri ipan i bas rumah ingan erbanca; la banci ibaba ndarat. Tulan asuh-asuhen e sada pe la banci ipenggelken.
47 Kerina perpulungen kalak Israel la banci la ngerayaken pesta enda,
48 tapi kalak si langa isunatken la banci manca. Adi lit sekalak asing nggo tetap ringan i tengah-tengahndu, janah merincuh ia ngerayaken Paskah e guna kemulian TUHAN, la banci la isunatkenndu lebe kerina si dilaki i bas keluargana. Kenca bage ia arus ipeserindu ras kalak Israel asli janah banci ia ikut i bas pesta e.
49 Peraturen-peraturen man kalak asing si ringan i tengah-tengahndu ras man kalak Israel asli arus bali."
50 Kerina kalak Israel patuh ngikuti kai si nggo iperentahken TUHAN man Musa ras Harun.
51 I bas wari e ibabai TUHAN suku-suku bangsa Israel ndarat i bas negeri Mesir nari.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA