Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai nini Jahowa ma dompak si Josua, “Ulang ma ho mabiar anjaha bobor! Arahkon ma ganup siimbang munsuh, anjaha bingkat ma ho, tangkog dompak Ai! Tonggor ma, domma Huondoskon hu tanganmu raja ni Ai pakon bangsani, hutani pakon tanohni!
2 Anjaha bahen ma hu huta Ai pakon hubani rajani, songon na binahenmu hubani Jeriko pakon hubani rajani, pitah taban-tabanni pakon pinahanni do na bulih bagionnima bennima; bahen ma sada paronggopan i pudi ni huta ai.”
3 Jadi bingkat ma si Josua pakon ganup siimbang munsuh laho tangkog hu huta Ai; ipilih si Josua ma tolu puluh ribu halak na borani marmunsuh, anjaha isuruh ma sidea bornginni ai.
4 Anjaha iparentahkon ma hubani sidea, “Monggop ma nasiam hu pudi ni huta ai; tapi ulang madaohtu nasiam hun huta ai, anjaha tagam ma nasiam ganup.
5 Tapi anggo ahu pakon ganup bangsa na rap pakon ahu, dohorannami ma huta ai. Jadi anggo luar ma sidea manjumpahkon hanami songon na parlobei ondi, maporus ma hanami i lobei ni sidea;
6 jadi luar ma sidea mangayaki hanami, paima isirang hanami sidea hun huta ai; jadi hatahonon ni sidea ma, ʻMaporus do sidea i lobeita songon na parlobei ondi.ʼ Anjaha sanggah na maporus ai hanami i lobei ni sidea,
7 luar ma nasiam hun paronggopan ai, anjaha soluk nasiam ma huta ai; ai bereon ni Jahowa Naibata nasiam ma huta ai hubagas tangan nasiam.
8 Anjaha anggo domma itaban nasiam huta ai, tutung nasiam ma huta ai bani apuy, bahen nasiam ma songon na hinatahon ni Jahowa. Tonggor ma, ahu do mangkatahon in bani nasiam.”
9 Jadi isuruh si Josua ma sidea, laho ma sidea hu paronggopan ai, anjaha monggop ma sidea i holangkolang ni Betel pakon Ai, hampit hasundutan ni Ai; tapi marborngin ma anggo si Josua bani na saborngin ai i tongah-tongah ni bangsa ai.
10 Dob ai patarni ai ipagirah si Josua ma puho pasirsirhon balani ai, anjaha tangkog ma ia rap pakon pangituai ni Israel i lobei ni bangsa ai hu huta Ai.
11 Anjaha ganup siimbang munsuh na rap pakonsi tangkog ma anjaha das hulobei ni huta ai, anjaha marsaran ma sidea hampit utara ni huta Ai; habungan ai do holangkolang ni sidea hun huta Ai.
12 Anjaha ipapulig ma hira-hira lima ribu halak, anjaha ihatahon ma monggop i holangkolang ni Betel pakon Ai, hampit hasundutan ni huta ai.
13 Jadi ipabaris sidea ma bala, na marsaran hampit utara ni huta ai, pakon na monggop ai hampit hasundutan ni huta ai. Tapi i habungan ai do si Josua bani na saborngin ai.
14 Jadi dob iidah raja ni huta Ai ai, tarolos ma sidea, ipagirah dalahi ni huta ai ma luar manjumpahkon Israel laho marporang, raja ai pakon ganup bangsani bani raboyon ai i lobei ni Arabah, tapi lang ibotoh, na dob adong na monggop i pudi ni huta ai.
15 Jadi ipahulah si Josua pakon ganup Israel ma talu i lobei ni sidea, anjaha maporus sidea dompak halimisan.
16 Dob ai itingtingkon ma bani ganup parhuta ai, ase rap sidea mangayak-ayak, jadi iayak-ayak sidea ma si Josua, gabe sirang ma sidea humbani huta ai.
17 Sahalak pe lang adong na tading i huta Ai pakon i Betel, na so luar mangayak Israel, ngangang do huta ai itadingkon sidea laho mangayaki Israel.
18 Dob ai nini Jahowa ma dompak si Josua, “Pagostong ma tanja na i tanganmin dompak huta Ai; ai domma Huondoskon huta ai hu tanganmu.” Jadi ipagostong si Josua ma tanja na ibagas tanganni ai dompak huta ai.
19 Jadi tarolos ma na monggop ai jongjong humbani iananni, anjaha dob na pinagostongni ai tanganni, marpojong ma sidea masuk hubagas huta ai lanjar itaban, anjaha ioloskon sidea ma manutung huta ai.
20 Jadi sanggah na mangkawah dalahi na hun Ai dompak pudi, tonggor ma, domma martimpul timus ni huta ai dompak langit, seng dong be gogoh ni sidea maporus barang dompak ja pe, ai bangsa na maporus dompak halimisan ai pe domma marhusor use mangimbang sidea na mangayak-ayak ai.
21 Dob iidah si Josua pakon ganup Israel, na dob itaban na monggop ai huta ai, anjaha na dob martimpul timus ni huta ai, jadi marhusor ma sidea, anjaha ibunuh sidea ma ganup dalahi na hun Ai.
22 Luar ma pakon na legan ai hun huta ai manjumpahkon sidea, gabe tarhapit ma sidea ibahen Israel; jadi roh ma sidea hadualopahsi mamunuhi sidea ronsi seng dong be na tading humbani sidea age sahalak, na maporus barang na maluah.
23 Tapi itangkap sidea ma raja ni Ai manggoluh, anjaha iboan ma ia hubani si Josua.
24 Dob bois ibunuhi Israel ganup pangisi ni Ai bani pamah na i halimisan ai, bani iananni sidea mangayak-ayak ai, anjaha bois tumang sidea itampuli bani podang, jadi mulak ma ganup Israel hu huta Ai, anjaha itampuli ma pangisi ni ai bani mata ni podang.
25 Ia haganup na rasei bani na sadari ai, dalahi pakon naboru, sapuluh dua ribu halak do haganup pangisi ni huta Ai.
26 Ai seng ipasuang si Josua ope tanganni, na pagostong tanja ai, paima siap tumang pangisi ni huta Ai.
27 Pitah pinahan pakon taban-taban na hun huta ai ibagi halak Israel bani sidea, romban hubani hata ni Jahowa na tinonahkon-Ni hubani si Josua.
28 Jadi isurbuy si Josua ma huta Ai, anjaha ibahen ma ai gabe timbunan batu sadokah ni dokahni, ronsi sadari on.
29 Anggo raja ni huta Ai ai igantung do bani hayu ronsi bodari, anjaha laho sundutkonsi mata ni ari, ihatahon si Josua ma pasusuron bangkeini ai humbani hayu ai, anjaha igijigkon sidea ma ai hu babah ni horbangan ni huta ai, anjaha ibahen i atas ni ai sada timbunan batu na bolon, na adong ijai ronsi sadari on.
30 Ijia ipajongjong si Josua ma sada anjapanjap bani Jahowa, Naibata ni Israel, i Dolok Ebal,
31 songon na pinarentahkon ni si Musa, juakjuak ni Jahowa hubani halak Israel, songon na tarsurat ibagas buku titah ni si Musa, sada anjapanjap humbani batu na so binarbar, na so hona parugas bosi; jadi igalangkon sidea ma i atasni galangan situtungon bani Jahowa, anjaha igalangkon galangan pardameian.
32 Dob ai isuratkon ma ijai hubani batu ai, i lobei ni halak Israel, salinan ni titah ni si Musa, na sinuratni ai.
33 Anjaha ganup Israel rap pakon pangintuaini, pambobaini pakon panguhumni jongjong angkup i lambung ni poti ai i lobei ni malim marga Levi, na mangusung poti parpadanan ni Jahowa, halak dagang age partanoh ai hinan, satongah i raboyon ni Dolog Garisim, na satongah nari i raboyon ni Dolog Ebal, songon na tinonahkon ni si Musa, juakjuak ni Jahowa, laho mamasu-masu bangsa Israel ijia.
34 Dob ai ibasa ma ganup hata ni titah ai, pasu-pasu pakon papa-papa ai, haganup songon na tarsurat ibagas buku titah ai.
35 Seng dong age sada hata humbani haganup hata, na tinonahkon ni si Musa, na so binasa ni si Josua i lobei ni ganup tumpuan ni Israel, pakon puang-puang pakon dakdanak ampa halak dagang, na manginsolat i tongah-tongah ni sidea.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA