Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tapi tutup tumang do Jeriko jumpah halak Israel; seng dong na luar anjaha seng dong barang ise na masuk.
2 Dob ai nini Jahowa ma dompak si Josua, “Tonggor ma, domma Huondoskon hubagas tanganmu huta Jeriko, rajani pakon sagala siimbang munsuh.
3 Maningon inggotannima do huta ai, sagala siimbang munsuh manginggoti huta ai sahali. Sonai ma bahen hanima ibagas na onom ari.
4 Anjaha usungon ni pitu malim ma pitu tarompit tanduk ni biribiri tunggal i lobei ni poti ai, tapi papitu-arihon maningon pitu hali inggotannima huta ai, anjaha sompulon ni malim ma tarompit ai.
5 Jadi anggo dokah panompul ni sidea bani tarompit tanduk ni biribiri tunggal ai, ibogei hanima honsi sora ni tarompit ai, jadi gogoh ma marsurak ganup bangsa ai, jadi marumbak ma tembok ni huta ai, anjaha manaik ma bangsa ai, ganup mandorab hu lobeini bei.
6 Jadi idilo si Josua, anak ni si Nun ma malim-malim, anjaha nini ma dompak sidea, “Usung nasiam ma poti parpadanan in, anjaha suruh nasiam ma pitu malim, mangusung pitu tarompit tanduk ni biribiri tunggal i lobei ni poti ni Jahowa.”
7 Anjaha nini ma dompak bangsa ai, “Laho ma nasiam, inggoti nasiam ma huta ai, anjaha suruh nasiam ma parsinjata mardalan i lobei ni poti ni Jahowa.”
8 Jadi dob ihatahon si Josua sonai hubani bangsa ai, mardalan ma na pitu malim, na mangusung na pitu tarompit tanduk ni biribiri tunggal ai i lobei ni Jahowa, lanjar manompul tarompit; anjaha poti parpadanan ni Jahowa mangihut hun pudi ni sidea.
9 Anjaha mardalan ma parsinjata ai i lobei ni malim na manompul tarompit ai, anjaha mangihut hubani poti ai ma parjaga na hun pudi ai, anjaha tarompit ai marsora torus.
10 Tapi domma iparentahkon si Josua hinan hubani bangsa ai, “Ulang ma marsurak-surak nasiam, anjaha ulang ma tarbogei sora nasiam, anjaha seng bulih luar age sada hata humbani pamangan nasiam, paima jumpah arini, ahu mangkatahon nasiam marsurak-surak; dob ai pe ase marsurak nasiam.”
11 Jadi iinggoti poti ni Jahowa ma huta ai, sahali maringgot. Dob ai das ma sidea hu parsaranan ai anjaha marborngin i parsaranan ai.
12 Dob ai ipagirah si Josua ma puho patarni ai, anjaha iusung malim ma poti ni Jahowa.
13 Anjaha na pitu malim, na mangusung na pitu tarompit tanduk ni biribiri tunggal ai, mardalan do i lobei ni poti ni Jahowa, torus manompul tarompit, anjaha parsinjata ai mardalan i lobei ni sidea. Tapi parjaga na hun pudi ai mardalan i pudi ni poti ni Jahowa, anjaha tarompit ai marsora torus.
14 Padua-arihon pe iinggoti sidea do huta ai sahali, dob ai mulak ma sidea hu parsaranan. Sonai ma ibahen sidea ibagas na onom ari.
15 Tapi bani ari papituhon ipagirah sidea ma puho, bani parnaik ni sibalikkuning, anjaha iinggoti sidea ma huta ai songon na somal pitu hali; pitah bani ari ai do pitu hali iinggoti sidea huta ai.
16 Bani na papituhalihon, sanggah na sinompul ni malim ai tarompit ai, nini si Josua ma dompak bangsa ai, “Marsurak ma nasiam, ai domma ibere Jahowa huta in bani nasiam.
17 Tapi maningon siaponkon do huta in ronsi ganup na ibagas halani Jahowa; pitah si Rahab boru jalang ai do pagoluhon, ia rap pakon haganup na rap pakonsi i rumah, ai iponopkon do suruhan na sinuruhta.
18 Tapi ramotkon nasiam ma diri nasiam dompak ugas-ugas sisiapkonon ai, ase ulang siap nasiam, ase ulang ibuat nasiam humbani ugas-ugas sisiapkonon ai, gabe siap holi parsaranan ni Israel ibahen nasiam, anjaha iparoh nasiam hamagouan hujai.
19 Tapi sagala pirak pakon omas, ronsi parugas tombaga pakon bosi, papansingon ma ai bani Jahowa, pamasukon ma ai hu kamar parugasan ni Jahowa.”
20 Jadi marsurak-surak ma bangsa ai anjaha isompul ma tarompit ai. Jadi dob ibogei bangsa ai sora ni tarompit ai, ipagogoh sidea ma marsurak-surak gabe marumbak ma tembok ai, anjaha ipanaik bangsa ai ma huta ai, ganup mandorab hu lobeini, gabe itaban sidea ma huta ai.
21 Jadi isiapkon sidea ma sagala na i huta ai, dalahi age naboru, dakdanak pakon na ubanon, ronsi lombu, biribiri pakon halode itampuli bani podang.
22 Tapi hubani na dua halak, na mangkahapi tanoh ai ihatahon si Josua ma, “Masuki nasiam ma rumah ni puang-puang, boru jalang ai, arahkon nasiam ma luar naboru ai pakon ganup na rap pakonsi, songon na binulawankon nasiam bani.
23 Jadi masuk ma garama parkahap na dua ai, anjaha iarahkon ma luar si Rahab, bapani, inangni, sagala botouni, pakon sagala na rap pakonsi ronsi ganup ginompar ni ompungni, anjaha ipatuduh ma bani sidea sada ianan i darat ni parsaranan ni Israel.
24 Tapi itutung sidea ma huta ai bani apuy pakon ganup na ibagas ai; pitah pirak pakon omas, ronsi parugas tombaga pakon bosi inahkon sidea hu kamar parugasan ni rumah ni Jahowa.
25 Tapi anggo si Rahab, boru jalang ai, pakon ginompar ni bapani, ronsi sagala na rap pakonsi ipagoluh si Josua do; anjaha marianan i tongah-tongah ni Israel do ia ronsi sadari on, halani na pinonopkonni suruhan, na sinuruh ni si Josua mangkahapi Jeriko.
26 Jadi marbulawan ma si Josua ijia nini ma, “Maningon hona papa ma magira i lobei ni Jahowa, dalahi na jongjong pauli huta Jeriko on. Bunga tubuhni ma gantih ni onjolanni, anjaha sianggianni gantih ni horbangan na pinajongjongni ai.”
27 Jadi sai ihasomani Jahowa do si Josua, anjaha tarmurmur ia i sab tanoh ai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA