Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri matenamo Musa, iamintu atanNa Batara, a’bicarami Batara mae ri wakkele’na Musa, iamintu Yosua ana’na Nun.
2 Nakana Batara, "Matemi atangKu Musa. Jari baji’mi punna apparuru mako siagang sikontu umma’ Israel kamma-kamma anne, untu’ a’limbang ri Binanga Yordan, siagang ampantamakki pa’rasangang Kupassareanga mae ri ke’nanga.
3 Le’ba’mi Kupau mae ri Musa angkanaya sikontu anjo butta naonjoka bangkennu le’ba’mi Kupassareang mae ri kau siagang sikontu ummakKu.
4 Anjo daeranu la’la’baki battu ri parang lompoa timboro’ sa’genna mange ri pa’monconganna Libanon pawara’na, kammayatompa battu ri anjo Binanga Efrat lompoa iraya tulusu’ mae ri kabusu’na pa’rasanganna bansa Het sa’genna Tamparang Tangngaya pakalau’na.
5 Manna sitau tania’ lakkulle ambetako, Yosua, lalang tallasa’nu. Nasaba’ iNakke latuli anrurungangko ri sa’rinnu sangkamma riolo iNakke anrurungangi Musa ri sa’rinna. Tena nalaKubokoiko.
6 Paralluko tappa’ siagang barani, nasaba’ ikau lampimpingi anne bansaya ri wattunna napantamakki ke’nanga pa’rasangang Kupa’janjianga mae ri boe-boena ke’nanga.
7 Iaji bawang, paralluko tappa’ tojeng-tojeng siagang barani. Musti nujagai sollanna tuli nuturuki sikontu hukkung napassareanga anjo atangKu Musa mae ri kau; teako kaluppai manna sike’de’, sollanna a’jari usahanu.
8 Anjo kitta’ hukkunga musti tuli nubacakangi mae ri ummakKu. Pilajari anjo kittaka allo bangngi, sollanna tuli nugaukang sikontu apa niaka tattulisi’ lalang. Punna nugaukang ngaseng sikammaya anjo, lasalewangangko ri tallasa’nu siagang la’jari usahanu.
9 U’rangi, angkanaya le’ba’mi Kuparentakang mae ri kau sollannu tappa’ tojeng-tojeng siagang barani! Teako mallakki yareka teako naungi sumanga’nu, nasaba’ iNakke Karaeng Allata’alanu anrurungangko ri sa’rinnu, manna pole kemae lampanu."
10 Jari naparentakammi Yosua pamimping-pamimpinna umma’ Israel
11 sollanna a’lampa ke’nanga akkuliling ri sikontu pakkemaanna umma’ Israel siagang napabattu anne parentaya angkana, "Appasadiako bokong, nasaba’ tallungallo mami numusti a’limbang ri Binanga Yordan untu’ ampantamakki pa’rasangang Napassareanga Karaeng Allata’alanu mae ri kau."
12 Nakana Yosua mae ri suku Ruben, suku Gad, siagang tawaruana suku Manasye,
13 "U’rangi! Le’ba’mi napau Musa iamintu atanNa Batara mae ri kau angkanaya anne buttaya irayanganna Binanga Yordan Napassareangi Karaeng Allata’alanu mae ri kau untu’ a’jari pa’rasangannu.
14 Sikontu ana’nu, bainennu, siagang olo’-olo’nu akkullei ammantang anrinni, mingka sikontu tantaranu musti sadiai untu’ a’bundu’ a’jappa riolo ri dallekanna tu Israel maraengannaya a’limbang ri Binanga Yordan.
15 Musti nubantui ke’nanga, sa’genna napantamakki ke’nanga butta niaka ilaukanna anne Binanga Yordan, Napassareanga Karaeng Allata’alanu mae ri ke’nanga. Punna le’ba’mo Nasare Batara kaamangngang sikontu bansa Israel, nampa mako akkulle ammotere’ ri butta kalennu irayanganna anne Binanga Yordan, napassareanga Musa atanNa Batara mae ri kau."
16 Jari appialimi suku Ruben, Gad siagang bageruanna suku Manasye, angkana, "Apa-apa mamo nuparentakang mae ri kambe, tena tanagaukanna ikambe; siagang manna kemae nusuro a’lampa ikambe, tena ta’lampana ikambe.
17 Lamannuruki ikambe mae ri kau, sangkamma todong tuli mannurukinna ikambe mae ri Musa. Dasi-dasi naNarurungangko Karaeng Allata’alanu sangkamma todong Narurunganna Musa!
18 Inai-nai taeroka mannuruki ri kakoasannu, yareka taeroka mannuruki ri parentanu, lanihukkung matei. Paralluko tappa’ siagang barani!"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA