Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sesampun nike araq perayaan Yahudi, make Deside Isa lumbar ojok Yerusalem.

² Lẽq Yerusalem dẽkẽt Jebak Dombe araq sopoq telage, dalem base Ibrani tearanin Betesda. Lẽq derike araq lime sesangkok.

³ Lẽq sesangkok-sesangkok nike luwẽq dengan sakit tetindoqang, araq saq bute, araq saq dẽmpang, dait araq ẽndah saq kẽpaq. [Ie pade selapuq ngantih aiq telage nike beumbak-umbak.

⁴ Sẽngaq sewaktu-waktu malaẽkat Tuhan turun ojok telage nike terus miaq aiqne jari beumbak-umbak. Dengan sakit saq penembẽq tame lẽq dalem telage nike sewaktu aiqne beumbak-umbak, gen selah, napi juaq penyakitne.]

⁵ Lẽq taoq nike araq sopoq dengan mame saq sampun telung dase baluq taun ngonẽqne sakit.

⁶ Deside Isa cingakin ie tindoq lẽq derike, dait wikanang-Ne bahwe ie ngonẽq gati sakit; make Deside Isa bemanik lẽq ie, "Mẽlẽ side teselahang?"

⁷ Dengan sakit nike bejawab, "Guru, nẽnten araq dengan saq tamaq tiang ojok dalem telage sewaktu aiqne beumbak-umbak. Baruq tiang mẽlẽ tame, sampun araq dengan lain saq juluan tame."

⁸ Beterus Deside Isa lẽq ie, "Silaq ures, angkat tipahde, terus lampaq."

⁹ Lẽq waktu nike ẽndah ie langsung selah. Ie ngangkat tipahne terus lampaq. Hal nike telaksane lẽq jelo Sabat.

¹⁰ Keranaq nike penguase-penguase Yahudi bebase lẽq dengan saq baruq teselahang nike, "Jelo niki jelo Sabat. Ndẽq kanggo side ngangkat tipahde."

¹¹ Laguq jawab dengan nike, "Dengan saq nyelahang tiang, Ie saq suruq tiang ngangkat tipah tiang terus lampaq."

¹² Ie pade beketuan, "Sai dengan nike saq suruq side ngangkat tipahde terus lampaq?"

¹³ Laguq dengan saq sampun selah nike ndẽq nenaoq sai dengan nike, sẽngaq Deside Isa sampun telang lẽq tengaq dengan luwẽq nike.

¹⁴ Beterus Deside Isa bedait kance dengan nike lẽq dalem Gedẽng Allah, dait bemanik lẽq ie, "Mangkin side sampun selah, ndaq gawẽq dose malik, adẽq side ndẽq ndait saq lengẽan malik."

¹⁵ Beterus dengan nike lumbar, dait nyampẽang ojok pare penguase Yahudi bahwe Deside Isa saq nyelahang ie.

¹⁶ Dait nike lantaranne, ie pade mulai berusahe nganiaye Deside Isa sẽngaq Ie nyelahang dengan lẽq jelo Sabat.

¹⁷ Laguq Deside Isa bemanik lẽq ie pade, "Bapa Tiang terus bekarye jangke mangkin, maraq nike ẽndah Tiang terus bekarye."

¹⁸ Nike penguase-penguase Yahudi jari sayan berusahe gen nyematẽq Ie. Ie pade piaq maraq nike, ndẽqne cume lantaran Deside Isa ngelanggar aturan agame mengenai jelo Sabat, laguq ẽndah lantaran Ie badaqang bahwe Allah nike Bapa-Ne; artine Ie padeang diriq-Ne kance Allah.

¹⁹ Deside Isa jawab ie pade maraq niki, "Tiang badaq side, setetune Bije ndẽqne tao ngelaksaneang napi-napi lẽman diriq-Ne mẽsaq. Ie cume ngelaksaneang napi saq Ie cingakin telaksaneang siq Bapa-Ne. Sẽngaq napi saq telaksaneang siq Bapa, nike ẽndah saq telaksaneang siq Bije.

²⁰ Sẽngaq Bapa ngasihin Bije-Ne dait nyatayang tipaq Bije nike selapuq saq Ie laksaneang mẽsaq. Malahan Bapa gen nyatayang tipaq Bije nike karye-karye saq belẽqan malik, jangke side pade jari bengaq.

²¹ Bapa nike nguresang dengan ninggal, dait ngidupang ie pade, maraq nike ẽndah Bije ngidupang sai saq Ie kayunang.

²² Bapa mẽsaq nẽnten hakimin sai juaq. Selapuq kekuasean jari hakimin sai juaq sampun teserahang tipaq Bije.

²³ Bapa ngelaksaneang hal nike adẽq selapuq dengan hormatin Bije maraq ie pade hormatin Bapa. Dengan saq ndẽq hormatin Bije artine ie ẽndah ndẽq hormatin Bapa saq ngutus Ie.

²⁴ Tiang badaq side: Setetune dengan saq dengah Tiang, dait percaye lẽq Bapa saq ngutus Tiang, ie gen mauq idup sejati dait kekel, dait ie ndẽq gen tehukum; ie sampun ngalih lẽman ninggal ojok dalem idup.

²⁵ Tiang badaq side: Setetune gen dateng waktune -- malahan sampun dateng waktune -- dengan ninggal gen dengah suare Bije saq asalne lẽman Allah. Dait dengan saq dedengah gen idup.

²⁶ Pade maraq Bapa saq jari sumber idup, make Bapa jariang Bije nike ẽndah sumber idup.

²⁷ Bapa sampun ngicanin Bije-Ne kuase jari hakimin sai juaq, sẽngaq Ie Bije Manusie.

²⁸ Ndaq side pade bengaq dengah hal niki, sẽngaq gen dateng waktune bahwe selapuq dengan saq sampun ninggal dengah suare-Ne,

²⁹ dait ie pade saq gawẽq solah gen sugul dait idup malik jari mauq idup saq kekel, laguq ie pade saq sampun gawẽq jahat gen teidupang malik jari tehukum."

³⁰ "Tiang ndẽq tao ngelaksaneang napi-napi lẽman diriq Tiang mẽsaq, Tiang cume ngakimin sesuai napi saq Tiang dengah. Dait penghakiman Tiang adil, sẽngaq Tiang ndẽq turut kemẽlẽq Tiang mẽsaq, laguq pekayunan Bapa saq ngutus Tiang.

³¹ Lamun Tiang ngebẽng kesaksian mengenai diriq Tiang mẽsaq, kesaksian nike ndẽq bau tesaduq.

³² Laguq araq dengan lain saq ngebẽng kesaksian mengenai Tiang, dait Tiang nenaoq bahwe kesaksian-Ne nike kenaq.

³³ Side pade sampun ngirim utusan ojok Yahya, dait Yahya sampun ngebẽng kesaksian mengenai kebenaran.

³⁴ Hal niki Tiang sampẽang, ndẽqne lantaran Tiang merluang saksi lẽman manusie, laguq adẽq side pade teselametang.

³⁵ Yahya nike maraq dilah saq nyale dait becahaye. Semendaq doang side pade seneng nerimaq cahayene nike.

³⁶ Laguq kesaksian Tiang pentingan lẽman kesaksian Yahya. Napi saq mangkin Tiang laksaneang, niki karye saq tetugasang siq Bapa tipaq Tiang, jari bukti bahwe Bapa sampun ngutus Tiang.

³⁷ Dait Bapa saq ngutus Tiang ẽndah ngebẽng kesaksian mengenai Tiang. Side pade ndẽq uwah dengah manik-Ne atao serioq rue-Ne.

³⁸ Selapuq manik-Ne ndẽq side pade simpen lẽq dalem atẽnde, sẽngaq side pade ndẽq percaye lẽq Tiang saq Ie utus.

³⁹ Side pade berajah Kitab Suci sẽngaq side paran siq care nike side bedowẽ idup sejati dait kekel. Dait Kitab Suci ẽndah ngebẽng kesaksian mengenai Tiang.

⁴⁰ Laguq side pade ndẽq mẽlẽ dateng ojok Tiang adẽq side pade mauq idup.

⁴¹ Tiang ndẽq boyaq pujian lẽman manusie.

⁴² Tiang kenal side pade. Tiang nenaoq side pade ndẽq ngasihin Allah dalem atẽnde.

⁴³ Tiang dateng dalem pesẽngan Bapa Tiang, laguq side pade ndẽq nerimaq Tiang. Laguq lamun dengan lain saq dateng dalem pesẽnganne mẽsaq, side pade mẽlẽ nerimaq ie.

⁴⁴ Berembẽ side pade bau percaye, lamun side pade boyaq pujian lẽman sepade manusie, dait ndẽq berusahe boyaq pujian lẽman Allah saq Esa?

⁴⁵ Ndaq paran Tiang gen tuduh side pade lẽq arepan Bapa. Malahan Musa saq side pade harepang, ie saq tuduh side pade.

⁴⁶ Seandẽne side pade percaye lẽq Musa, side pade gen percaye lẽq Tiang, sẽngaq Musa saq nulis mengenai Tiang.

⁴⁷ Laguq lamun side pade ndẽq percaye lẽq napi saq tetulis siq Musa, berembẽ side pade bau percaye lẽq napi saq Tiang sampẽang?"

Yohanes

Video Yohanes 5

Ikuti Kami:

KONTAK | PARTISIPASI | DONASI