Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 No'iduduimai kon tua oyuíon Singgai Moḷoben intau Yahudi, daí ki Yesus minayak in Yerusalem.
2 Kon Yerusalem kon diug in tampat inta sinangoian "Ngara in Domba" oyuíon tobatuí tabang, inta aka kom bonu im bahasa Ibrani sinangoian "Betesda." Kon tua lima in tampat pobobarasanangan.
3 Kon tampat pobobarasanangan mita tatua nobayong intau mita mototakit inta mosiug makow; oyuíon bilog, oyuíon pelong, oyuíon lempeng. [Mosia tua komintan mogoḷat makow kon kolimbokan tubig in tabang tatua.
4 Sin oyuíon inta mo'iangoi im malaekat i Tuhan moponag kon tabang tatua bo molimbok kon tubignya. Bo intau motakit inta muna ḷumabuí kon tabang tatua wakutu i molimbok, mopia onukabií im panyakinya.]
5 Kon tampat tatua oyuíon doman tobatuí intau inta ain toḷu nopuḷuí bowaḷu notaong in notakit.
6 Inontong i Yesus in Sia mosiug makow kon tua, bo kinota'auanbií i Yesus kon totokdon no'onggot sia notakit, daí ki Yesus noliboí ko'inia, "Mo'ibog mopia in ikow?"
7 Intau notakit tatua notubag, "Amaí, diaí intau kon na'a im mopoponag ko'inakoí kon tabang aka molimbok in tubignya. Bo pomuḷoi in aku'oi moramiji mopobayak in tabang tatua, umuran ko'una'an in intau ibanea."
8 Daí ki Yesus noguman ko'inia, "Pobangondon, bingkatdon im boḷadmu bo bayakadon."
9 Dodaipa doman tua nopia intau tatua. Biningkatnya im boḷadnya bo minaya-mayak. Soaáḷ tatua nobalií kon singgai in Sabat.
10 Tuamai itoi mita intau Yahudi noguman kon intau inta bagu nopia tatua, "Singgai na'a singgai in Sabat, tuamai ikow diaíbií mota'au mobingkat kom boḷadmu."
11 Ta'e intau tatua notubag, "Intau inta ko'ina nongundam ko'inakoí in noki bingkat im boḷadku bo mayak."
12 Daí iliboí bui monia, "Ki ine intau inta noki bingkat im boḷadmu nion bo mayak?"
13 Ta'e diaí kinota'auan in intau inta bagu inundaman tatua mongo ki ine in nopotabaí ko'inia tua, sing ki Yesus minayakdon bo kino'olingoiandon in intau mobarong kon tua.
14 No'iduduimai kon tua ki Yesus bui noyodungkuḷ in intau tatua kom bonu im Baḷoi Tuhan, bo ki Yesus noguman ko'inia: "Pokotoropdon, nopiadon ikow tana'a. Dikadon bui mogaid kon dosa, simbaí diaí koaíntugan bui in inta lebe mora'at."
15 Daí iḷumuaidon intau tatua bo noguman kom ponguasa mita Yahudi kong ki Yesusbií intau inta nokopia ko'inia.
16 Daí tuamai, mosia mulaidon moramiji momogutuí ko'i Yesus, sin Sia monoaíidan kon singgai in Sabat.
17 Ta'e ki Yesus noguman ko'i monia, "Ki Amaí-Ku in umuranbií nogaid umaai in tana'a makow, daí Aku'oi im mogaidbií doman."
18 Singog-Nya mita tatua nokodugangdon kon ibog monia moramiji molimod ko'i-Nia. Mosia moroncana kon tua de'emandon tongaí lantaran Sia moḷawang kon atorang agama soaáḷ singgai in Sabat; ta'e lantarandon doman Sia noguman kong ki Allah tua ing ki Amaí-Nya; mangalenya kon tua Sia mokipotongkaidon ko'i Allah.
19 Tubag i Yesus kon intau mita tatua, "Poguman-Kudon ko'i monimu, Adií in diaíbií mokoaíid kon onu bo onu aka mopomakeí ing kawasa-Nya tontanií. Sia tongaíbií mogaid kon onu inta ain inontong-Nya inaidan i Amaí-Nya. Sin onu in inaidan i Amaí, tua doman in inaidan i Adií.
20 Sim motabibií ing ki Amaí kon Adií bo po'ontong-Nyabií ko'i-Nia im bayongan inta inaidan-Nya tontanií. Sedang bo po'ontongbií i Amaí ko'i-Nia in oaíidan mita inta lebe moḷoben nongkon oaíidan mita tatua, sahingga mo'ikow moherangdon.
21 Ki Amaí tua im momiag bui kon intau minatoi, bo mobogoi ko'i monia ing kobiagan mopia bo mononoi; naí tua doman in Adií mobogoi doman ing kobiagan mononoi ko'i monia inta mo'ibog ogoian-Nya ing kobiagan.
22 Bo ki Amaí in diaí bidon mohakim ko'i ineka, sim pinosarakan-Nya bidon intua ko'i Adií-Nya.
23 Pinomia i Amaí intua simbaí bayongan intau mohormat ko'i Adií naí mosia mohormat ko'i Amaí. Intau inta diaí mohormat kon Adií diaí doman mohormat ko'i Amaí inta nopotabaí mangoi ko'i Adií.
24 Totu'u totok in singog-Ku tana'a: Intau inta monarukira kon singog-Ku mita, bo mopirisaya ko'i-Nia inta nopotabaí ko'i-Nakoí, oyuíon kobiagan mopia bo mononoi. Sia in diaíbií hukumon; sia no'i pilatdon nongkon kinopatoian bo noko'uliídon kong kobiagan.
25 Pirisayadon: Mo'iangoibií in wakutunya, sedang bo no'iangoi bidon, kon intau minatoi im mokodongogbií kon singog i Adií Allah. Bo intau inta mokodongog mobiagbií.
26 Naí ki Amaí nobalií pangkoi ing kobiagan, daí binalií-Nya doman Adií pangkoi ing kobiagan.
27 Sia nobogoi in hak-Nya ko'i Adií-Nya mohakim, sin Sia ki Adií Intau.
28 Dika moherang mo'ikow mokodongog kon soaáḷ tana'a, sim mo'iangoibií i wakutunya kon intau inta aim minatoi mokodongog kon singog-Nya,
29 bo ḷumuai nongkon kubur. Intau inta nogaid kom mopia mobangon bo mobiag. Ta'e intau inta nogaid kom mora'at im mobangon sin hukumon."
30 "Aku'oi in diaíbií mota'au mogaid kon onu bo onu podudui in ibog-Ku tontanií.Aku'oi in tongaíbií mohakim podudui onu inta pinarentah i Allah. Bo moaídilbií im pononantuí-Ku, sin Aku'oi in diaíbií dinumudui kon ibog-Ku tontanií, ta'e dinumuduibií kon ibog i Amaí inta nopotabaí mangoi ko'i-Nakoí.
31 Aka kuma bo Aku'oi mongonguman kon soaáḷ ka'ada'an-Ku tontanií, yo onu in ino'uman-Ku tatua diaíbií mota'au pirisaya'an.
32 Ta'e oyuíonbií in intau ibanea in nongonguman soaáḷ Aku'oi, bo kinota'auan-Kubií kon totu'ubií in o'umannya tatua.
33 Mo'ikow nopotabaídon in intau minayak ko'i Yohanes, bo ino'umannyadon onu in totu'u soaáḷ Aku'oi.
34 Soaáḷ tana'a poguman-Ku, de'emanbií lantaran Aku'oi moparaḷu kon kosaksian nongkon intau, ta'e baí mo'ikow posaḷamaton.
35 Ki Yohanes tua in naonda bo togaí noyongkit inta moponindar im bayag. Bo samantara na'a mosanangpabií ing gina monimu motarima kon sindar tatua.
36 Ta'e ko'i-Nakoí oyuíon ing kosaksian inta moponti-ponting nongkon kosaksian inta pinoyaput i Yohanes, tuata in oaíidan inta pinokiaíid i Amaí ko'i-Nakoí. Oaíidan tatuata inta yogot-Ku aidan tana'a makow, tuata im mobalií bukti kong ki Amaíbií in nopotabaí ko'i-Nakoí.
37 Bo ki Amaí inta nopotabaí ko'i-Nakoí nobogoi doman ing kosaksian soaáḷ Aku'oi. Mo'ikow diaípa dodai onda nokodongog kon singog-Nya andeka noko'ontong kom pogot-Nya.
38 Pirman-Nya diaí no'itonop makow kong ginamu sim mo'ikow diaí mopirisaya ko'i-Nakoí inta pinotabaí-Nya.
39 Mo'ikow mobalajar kom Buk Mosuci sing kom bonu in raian monimu, aka natua yo moko'ulií kong kobiagan mopia bo mononoi. Bo umpakahbií Buk Mosuci tatua tontanií ain nobogoi ing kosaksian soaáḷ Aku'oi.
40 Ta'e mo'ikow doií mamangoi ko'i-Nakoí simbaí moko'ulií kong kobiagan mononoi.
41 Aku'oi in doiíbií mokidayow kon intau.
42 Kinota'auan-Kubií im mo'ikow. Kinota'auan-Kubií kon diaíbií in tabi monimu ko'i Allah.
43 Aku'oi namangoi takin kawasa i Amaí-Ku, ta'e mo'ikow doií motarima ko'i-Nakoí. Ta'e aka intau ibanea i mamangoi ko'i monimu takin kawasanya tontanií yo tarima'an monimu in sia.
44 Naondabií ing kopopirisaya monimu aka mo'ikow tongabií motayak kombaí dayowon intau ibanea, diaíbií moramiji kombaí dayowon i Allah inta totobatuí tua?
45 Dikabií mosangka kon Aku'oi mopotaḷaí ko'i monimu kon tayowon i Amaí. Sing ki Musabií inta i harap makow monimu i mopotaḷaí ko'i monimu.
46 Aka kuma bo mo'ikow mopirisaya ko'i Musa, yo mo'ikow im mopirisayabií ko'i-Nakoí, sin sia ain doman nomais soaáḷ Aku'oi.
47 Ta'e aka mo'ikow bo diaí mopirisaya kon onu inta pinais tatua, yo naondabií mo'ikow mota'au mopirisaya kon onu inta pinoguman-Ku?"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA