Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pada mulani, semakkung dunia dijadiko, Firman radu wat. Firman wat jejama Allah rik Firman gegoh jama Allah.

² Jak mula-mula Ia jejama Allah.

³ Sunyinni dijadiko liwat Ia, rik jak sunyin sai wat, mak sai pun dijadiko tanpa Ia.

⁴ Firman udi sumber hurik, rik hurik ngeni terang jama manusia.

⁵ Terang udi becahaya delom kekelaman, rik kekelaman mak dapok madamkoni.

⁶ Ratongdo jelma sai diutus Allah, Yohanes gelarni.

⁷ Ia ratong mewartako tentang terang udi, in sunyinni ulun percaya.

⁸ Ia tenggalan lain hak terang udi, ia angkah mewartako gaoh.

⁹ Terang sejati sai nerangi sunyinni manusia, ratong mik dunia.

¹⁰ Firman wat di dunia, dunia dijadiko liwat Ia, kidang dunia mak mengenal Ia.

¹¹ Ia ratong mik negeri-Ni tenggalan kidang bangsa-Ni mak nerima Ia.

¹² Kidang wat muneh jelma sai nerima Ia rik percaya jama Ia; tian dikeni-Ni hak jadi Anak Allah,

¹³ sai dilaherko lain hak jak manusia, mani hurik ampai seno jak Allah asalni.

¹⁴ Firman radu jadi manusia, Ia tinggal di hantara neram, rik ram radu ngeliak keagungan-Ni. Keagungan ano diterima-Ni injuk Anak tunggal Bapa. Liwat Ia ram ngeliak Allah rik kasih-Ni jama ram.

¹⁵ Yohanes ratong sebagai saksi-Ni, ia mewartako: "Injido Ia sai kuucakko: Ia haga ratong lebih duri jak nyak, kidang lebih balak jak nyak, mani semakkung nyak wat, Ia radu wat."

¹⁶ Ia penuh kasih; mak taru, Ia ngeberkati ram.

¹⁷ Hukum Tuhan ram terima liwat Musa. Kidang kasih rik kesetiaan Allah dinyatako liwat Isa Almasih.

¹⁸ Mak ngedok sai pernah ngeliak Allah, selain Anak tunggal Bapa, sai gegoh jama Bapa rik erat nihan jama Ia. Iado sai nyatako Bapa jama ram.

¹⁹ Jelma-jelma sai bekuasa Yahudi di Yerusalem ngayun imam-imam rik jelma-jelma Lewi mik jama Yohanes rik nanya jama ia, "Niku inji sapa?"

²⁰ Yohanes ngaku terus terang, "Nyak ajo lain hak Raja Penyelamat."

²¹ "Kik injuk reno, niku sapa?" tanya tian. "Api niku Elia?". "Lain," jawab Yohanes. "Api niku Sang Nabi?" tanya tian lagi. "Lain," jawabni.

²² "Kik injuk reno, ucakko jama sekam sapa niku inji," cawa tian, "in sekam dapok ngeni jawaban jama jelma-jelma sai ngayun sekam. Api cawamu tentang dirimu tenggalan?"

²³ Yohanes ngejawab, "Nyakdo ia sai diucakko ulih Nabi Yesaya: 'Jelma sai beseru di padang heni: Ratako renglaya untuk Tuhan.'"

²⁴ Jelma-jelma sai diutus ulih ulun Farisi

²⁵ betanya, "Kik niku lain hak Raja Penyelamat, lain hak Elia, lain juga Sang Nabi, mengapi niku ngebaptis?"

²⁶ Yohanes ngejawab, "Nyak ngebaptis jama way. Kidang di tengah-tengah keti wat jelma sai mak keti kenal.

²⁷ Ia ratong lebih duri jak nyak, kidang untuk ngebukak tali sepatu-Ni pun nyak mak layak."

²⁸ Sunyinni seno tejadi di Betania, kebelah timur Way Yordan rangni Yohanes ngebaptis.

²⁹ Jemoh ranini, Yohanes ngeliak Isa ratong jama ia. Kak radu Yohanes cawa, "Liak, Iado Anak Biri-biri Allah sai ngehapus dusa dunia.

³⁰ Iado sai kuucakko haga ratong lebih duri jak nyak, kidang lebih balak jak nyak, mani semakkung nyak laher, Ia radu wat.

³¹ Semakkungni, nyak mak pandai sapa Ia ano. Padahal nyak ratong ngebaptis jama way in bangsa Israel mengenal Ia."

³² Yohanes juga ngeni kesaksian inji, "Nyak ngeliak Ruh Allah regah injuk merpati jak langit raduni tinggal di atas-Ni.

³³ Waktu seno nyak makkung pandai sapa Ia. Kidang Allah sai ngayun nyak ngebaptis jama way radu cawa jama nyak, 'Kik niku ngeliak Ruh Allah regah, raduni tinggal di atas sai jelma, Iado sai haga ngebaptis jama Ruh Allah.'

³⁴ Nyak radu ngeliak-Ni tenggalan," cawa Yohanes, "rik nyak ngeni kesaksian bahwa Iado Anak Allah."

³⁵ Jemoh ranini Yohanes wat di rang seno lagi jama rua jelma sai nutuk ia.

³⁶ Waktu ia ngeliak Isa liwat, ia cawa, "Liak! Iado Anak Biri-biri Allah."

³⁷ Kerua jelma sai nutuk Yohanes ngedengi cawa seno, raduni mik nutuk Isa.

³⁸ Isa ngerilong mik kudan, rik ngeliak tian sedang nutuk Ia. Ia betanya, "Keti nyepok api?" Jawab tian, "Rabi, di dipa Rabi tinggal?" (Cawa 'Rabi' retini guru).

³⁹ "Ija liak tenggalan," cawa Isa. Tian mik jama Ia rik ngeliak di dipa ia tinggal. Waktu seno pukul epak dibi. Rani seno tian tinggal jama Ia.

⁴⁰ Salah sai jak kerua jelma sai radu ngedengi api sai diucakko Yohanes kak raduni mik nutuk Isa, iado Andreas, puari Simon Petrus.

⁴¹ Geluk-geluk Andreas nyepok Simon, puarini, rik cawa jama ia, "Sekam radu betungga jama Mesias!" (Mesias gegoh jama Almasih, yakdo: Raja Penyelamat.)

⁴² Andreas ngantakko Simon jama Isa. Isa nuntong Simon, raduni cawa, "Niku Simon, anak Yona. Niku haga disebut Kefas." (Kefas gegoh jama Petrus, retini: gunung batu.)

⁴³ Jemoh ranini Isa memutusko mik Galilea. Ia betungga jama Filipus, rik cawa jama ia, "Ija nutuk Nyak!"

⁴⁴ Filipus asalni jak Betsaida, yakdo rang tinggal Andreas rik Petrus.

⁴⁵ Filipus betungga jama Natanael rik cawa jama ia, "Sekam radu ngehalu jelma sai disebut ulih Musa delom Buku Hukum Allah, rik sai diwartako ulih nabi-nabi. Ia udi Isa jak Nazaret, anak Yusuf."

⁴⁶ Kidang Natanael ngejawab, "Mungkin kedo sai hal sai betik ratong jak Nazaret?" "Ija liak tenggalan," jawab Filipus.

⁴⁷ Isa ngeliak Natanael ratong, raduni cawa tentang ia, "Liak, udi jelma Israel sejati. Mak ngedok kepalsuan jama ia."

⁴⁸ "Repa Bapak kenal jama nyak?" tanya Natanael jama Isa. Isa ngejawab, "Semakkung Filipus ngurau niku, Nyak radu ngeliak niku di debah batang ara ano."

⁴⁹ "Bapak Guru," cawa Natanael, "Bapakdo Anak Allah! Bapakdo Raja bangsa Israel!"

⁵⁰ Isa cawa, "Niku percaya, mani Nyak ngucakko bahwa Nyak radu ngeliak niku di debah batang ara ano? Hal-hal sai jaoh lebih balak jak seno haga niku liak!"

⁵¹ Cawa Isa muneh, "Temon percayado, niku haga ngeliak langit tebukak, rik malaikat-malaikat Allah regah cakak jama Anak Manusia."

Yohanes

Video Yohanes 1

Ikuti Kami:

KONTAK | PARTISIPASI | DONASI