Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Yesus waki'asokoka 'o Filipus de 'o Natanael, de ma wange sa'angeka de 'o ngaamoko yosi'odomo 'o Kana ma kotaka 'o Galilea ma daeraaka. De 'o Yesus ma 'esa mita ge'enaka.

² 'O Yesus de wi do-domoteke mita yamake 'o ga-gasoko 'o ngaamoko ma ngodomino ge'ena.

³ Gedagee manga 'anggur 'ibootokau de 'o Yesus ma 'esa kamongosekau 'o Yesusika, "Manga 'anggur yakisidobootokau."

⁴ 'O Yesus wosango, "'Eme, 'uwasi noisuloko. Ma 'orasi koya'adonuawasi tomasidumutu 'ato ngoi ne'ena ma kia."

⁵ Ma 'o Yesus ma 'esa mongose 'o nyawa-nyawaka gee yole-leleani 'o ngaamoko ma ngodomoka go'ona, "Kaniamoteke 'okia naga bato wongose nginika."

⁶ Ge'enaka 'o 'akere ma ngii 'o ngai butangaka yadua-duanga ma ngale yomasi'iso-'isoko moteke 'o Yahudioka manga 'adati la bari yotebini ma Jo'oungu ma Dutu 'awi bionoka. 'O 'akere ma ngii ge'ena moi-moi ma doda poilia 'o literi ratusu moiku.

⁷ 'O Yesus wongose yole-leleanika go'ona, "Ma 'akere ma ngi-ngiiku ge'ena niokokidarisuku 'o 'akere." Ge'enaka de 'ona yodarisi yosi'oma-'omangie.

⁸ Ge'enaka de 'o Yesus wongose 'onaka, "Bika ne'ena nia'ese ma 'akere ge'ena ma eta de nia'asa ma rame ma dutuka." Ge'enaka de 'ona ya'asa ma 'akere ge'ena ma rame ma dutuka,

⁹ de ma rame ma dutu gu'una wataili ma 'akere gee 'imadadikou 'o 'anggur. ('Una kowosido-dogumuwa kiano 'o 'anggur ge'ena, yanako duga ka gee yole-leleani gee ma 'akere ge'ena yodari-darisi.) So ma rame ma balusu gu'una wi'asokino wonga-ngaamoko,

¹⁰ de kawongosekau, "'Etei, biasa 'o nyawa 'o 'anggur yosisupu ge'ena 'isira gee 'ifoloi yaowa-owasi de nako 'o nyawa yoboa-boano gee yakidugakau 'asa de gee biasali. Ma 'Esa moi ngona nadaotika 'o 'anggur gee 'ifoloi yaowa-owa sigado ne'ena."

¹¹ Ne'enau 'o no-nako 'ihera-herangi ma di-disiraka 'o Yesus wodiai. 'Una wodiai ge'ena 'o Kana ma kotaka 'o Galilea ma daeraaka. De 'o no-nako ge'enau 'una wosidumutu 'awi kuasa 'iamoko ma sala so wi do-domoteke wingaku.

¹² Ge'ena 'ipasa de 'o Yesus de ma 'esa, de 'awi dodo-dodoto, de mita wi do-domoteke yotagi 'o Kapernaum ma kotaka. 'Ona ge'enaka manga wange muruoka naga.

¹³ Gee 'o Yahudioka manga wange ma amoko 'isoriokau ge'ena la yosingano-nganonie Wakisisupu ma Wange, de 'o Yesus wotagi wosikaie 'o Yerusalemude.

¹⁴ 'O Yerusalemuoka ma Jo'oungu ma Dutu 'awi Woa ma ginitaroka 'o Yesus wakimake 'o sapi de 'o domba de 'o pombo yomawuku-wukunu, de mita 'o pipi yosita-tagali ge'enaka yogogerie.

¹⁵ 'O Yesus wodiai 'o be-besana moi 'o gumini de ge'enau wakisikiniiki yomawuku-wukunu go'ona de manga sapi de ma domba 'iodumu gee ma Jou wi Woa ma ginitaroka. 'O pipi yosita-tagali manga meja waleoto pagara so manga pipi ma 'ipiakorika.

¹⁶ Ge'enaka de wongose 'o pombo yowuku-wukunika, "Nia'aikika 'iodumu ne'enaka dau. 'Ai Dea 'awi Woa 'uwa niadiai nimawuku-wukunu ma ngii!"

¹⁷ So 'awi do-domoteke yonganonie 'o Buku 'Itebi-tebini ma bo-bulaka 'ingose konee, "'Ani Woa posironga toduaoka. 'Ai du-duaka 'ai singina ma dodaka ge'ena matero ka 'o 'uku 'ilala-lala."

¹⁸ 'O Yahudioka manga balu-balusu 'o Yesus wiba-baili yongose 'ato, "Bika nodiai 'o no-nako 'ihera-herangi ma ngale 'isidumutu ngomino 'ato ngona ma Jo'oungu ma Dutu wonikula 'o hak nodiai kone'ena."

¹⁹ 'O Yesus wosango wongose 'ato, "Niapiakorika ma Jo'oungu ma Dutu wi Woa ne'ena, de ka 'o wange sa'ange ma dodaka de ngoi tosigokokali!"

²⁰ De 'ona yosango, "'O taunu nagi soata de butangano yodiai ma Jou wi Woa ne'ena, de ngona nomau nosigokoli ka 'o wange sa'ange ma dodaka?"

²¹ Ma 'o Yesus 'awi dumutu ma ngale ma Jou 'awi Woa ge'ena, ge'ena la to 'una 'awi roese ma sirete.

²² So ge'enaka de gee 'o Yesus wisimomikoka 'o songenoka, de 'awi do-domoteke yonganonie 'ato ma ngale ge'ena, ge'ena wakisidemokau. So yongaku 'okia naga gee 'isilefoku 'o Buku 'Itebi-tebinoka de mita gee 'okia naga 'o Yesus wosidemokau.

²³ 'O Yesus ka 'o Yerusalemuokasi ma 'orasi Wakisisupu ma Wange ma Amoko ge'ena, de 'o nyawa manga gudai yongaku 'unaka sababu 'o no-nako 'ihera-herangi wokadiai.

²⁴ Ma 'o Yesus ma sirete kowakingakuwa, sababu 'una wakinako 'o nyawa 'iodumu.

²⁵ Ma ngale 'o nyawa manga singina, koiparaluuwa 'o nyawa yosiwaiti 'unaka, sababu 'una wanako 'okia naga 'o nyawa manga singina ma dodaka.

Yohanes

Video Yohanes 02

Ikuti Kami:

KONTAK | PARTISIPASI | DONASI