Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali yako etu, ojo kagananya dua mbengi, re’e paparongo nja’u kota Kana ri propinsi Galilea. Tempo roa mpaparongo etu nja’u indo i Yesu nja’u ria,
2 pasi nja’u seja i Yesu pasi kami to anaguruNya apa kami radinsi seja yau mantako.
3 Pei ri rayanya tau mantako etu, puramo tule anggur, see naka indo i Yesu mampobuuka Ananya bara maya mangansawang tau pue banua etu. Wali ia manganto’oka i Yesu, to’onya, “Sira tamo re’e tule anggur.”
4 Pei i Yesu manganto’oka ia, “Indo, to tao-tao komi ne’e mamporentangika Aku ewa wimba palaong to Aku damangika. Apa tawa rata temponya Aku damampaponsanika resi tau mangkonong kuasangKu.”
5 Pei indo i Yesu manganto’oka to papolaong ntau pue banua, ia manganto’o, “Kesaa to Ia manganto’oka komi mangika, ikam.”
6 Wali ane agama nto Yahudi, re’e ada mangkonong tau mampakayongongika koronya pasi ngaya-ngayanya, wali see naka tempo roa mpaparongo etu nja’u ono yongu tampa nue to bose to raika yako watu. Tampa nue etu soa pei kabaenya gana darabanangika ue satu liter samba’a pei samba’a.
7 Wali i Yesu manganto’oka to papolaong ntau pue banua, to’oNya, “Banangika ue la’u raya ntampa nue etu.” Wali sira mangabanang tampa nue etu naka buke.
8 Roo see i Yesu manganto’oka sira, “Oko sangkodi ue etu pei kenika tau to mampasilonga roa si’i.” Wali sira mangkenika tau to mampasilonga roa etu ue.
9 Wali tau to mampasilonga roa etu, ia taa nansani yako imbare anu to rainu to nakeni nsira etu, apa ojo to papolaong to nangoko ue etu semo to mangansani. Pei tempo ia mampeyaa ue etu, gete, ue etu roomo nawali yau tule anggur! Wali tau to mampasilonga roa etu ia ipu rayanya mangepe apa matao kojo tule etu. See naka ia mampokio tau langkai to rapaporongo.
10 Ia manganto’oka ngkai etu, “Biasanya ane tau mangika roa, ane to pantako owo rata sira rawaika ruyu manginu tule anggur to matao kojo, panewa yako etu, tempo sira roomo manginu-nginu see naka sira tamo maya mampasisala tule to matao pasi tule to taa, tempo etu sira rawaika manginu tule anggur to biasa. Pei si’a ewa wetu nuika ngkomi. Tempo si’i semo panewa komi mangawaika sira tule anggur to matao kojo.”
11 Wali tempo i Yesu mampapowali ue mawali tule anggur nja’u kota Kana ri propinsi Galilea etu, etu semo palaong to taa rapobiasa to uyunya kojo naika i Yesu. Wali yako palaong to etu re’e tau to mangkita kuasaNya, see naka sira mangansani Ia masipato rabarong. Wali yako etu maroso wo’u pangaya mami to anaguruNya resi Ia.
12 Wali ojo karoonya roa mpaparongo etu, i Yesu pei indoNya, tua’iNya, pasi kami to anaguruNya kami yau njo’u kota Kapernaum. Rata nja’u ria kami maroo-roo bara sawei mbengi.
13 Yako etu mosumo temponya roa rapangendo temponya bue-bue nto Israel naliunaka mpomakau to mangkeni kapate tempo ia mangkita raa to rapalasika ri wombo nsira la’u tana Mesir tempo owi. Roa etu rato’oka Roa Paskah. Wali see naka i Yesu pasi kami to anaguruNya yau ndeku Yerusalem damangansabi roa etu.
14 Rata nda’a ria kami yau masua ri tongonata banua i mPue Allah. Tempo i Yesu masua etu Ia mangkita tau to mampobalu sapi, domba, pasi tagou to danapake ntau mangika pampue resi i Pue Allah. Pasi Ia mangkita seja tau to matunda ri meja-meja mangabolos doi. Tau to ikitaNya etu ojo mangantipu tau to rata.
15 Wali Ia mangoko kiyoro pei mangika sampar, roo see Ia mangarubak samparia sira yako ri tongonata banua i mPue Allah. Sakowa domba pasi sapi Ia mangarubak seja. Panewa roo see Ia mampuka-mpukanaka meja ntau to mangabolos doi see naka doi nsira tarente yau ngkewanyamo.
16 Pasi Ia manganto’oka tau to mampobalu tagou, to’oNya, “Keni yau tagou etu! Ne’e mangampake banua mPa’angKu si’i mawali pasar!”
17 Wali ojo pangkita mami to anaguruNya palaong to etu, kami mangendo gombo i Makole parajanji i mPue Allah to natulis yami i Makole Daud ri raya ntuntu i mPue Allah tempo owi. Gombo etu manganto’o, “O Pue Allah, Aku mamporayang kojo Komi pasi Aku mamporayang seja banuaMu. PamporayangKu etu ewa apu to mangkoni yau rayangKu.” Ewa wetu gomboNya to ratulis yami ri raya ntuntu i mPue Allah.
18 Wali ojo karoonya i Yesu mangarubak tau etu, re’e to Yahudi to masusa rayanya see naka sira mampotanaka resi Ia, sira manganto’o, “Kesaa palaong to taa rapobiasa danuika ngKorom see damawali tondong to damampakanasaka resi kami Korom re’e kuasa mangarubak tau etu?”
19 Wali i Yesu mangansono sira, Ia mangaligi sira, to’oNya, “Pukanaka yau banua i mPue Allah si’i, panewa ri rayanya togo mbengi Aku damangawangu muni.”
20 Wali to Yahudi etu manganto’o wo’u, “Gete, opo mpuyu pei ono nto’u kasaenya tau mapalaong mangawangu banua i mPue Allah si’i, wali wimba danuika ngKorom mangawangu muni ri rayanya togo mbengi?” Ewa wetu nato’o nsira.
21 Pei kamonsonya tempo i Yesu manganto’oka sira Ia damangawangu muni banua i mPue Allah ri rayanya togo mbengi, batuanginya si’a banua i mPue Allah to nakanja’u nsira etu, batuanginya koro to si Ia semo.
22 Wali yako etu, tempo i Yesu roomo rawangu muni yako ri kapateNya, panewa tempo etu kami to anaguru i Yesu mangendo muni gombo to to’oNya etu. Wali kami mangaya anu to ratulis yami ri raya ntuntu i mPue Allah tempo owi to manganto’o i Kerisitu damambangu muni yako ri kapateNya. Pasi kami mangaya seja gombo to nato’o i Yesu.
23 Wali tempo i Yesu nda’a Yerusalem tempo Roa Paskah etu, tempo etu boros tau to mansarumaka kuasaNya apa sira mangkita palaong to taa rapobiasa to inikaNya.
24 Pei i Yesu taa mansarumaka tau etu apa Ia mangansani kojo pampobuuka nto lino samparia.
25 Nempo tare tau to mampakanasaka resi Ia mangkonong pampobuuka nto lino, Ia tiroo mangansani apa Ia mangansani yami ewa wimba raya ntau. Wali see naka Ia mangansani tau etu boros to tiroowa dua-dua rayanya mangkonong Ia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA