Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dua wari kenca si e lit kerja erdemu-bayu i kuta Kana i daerah Galilea. Nande Jesus ikut i bas kerja e.
2 Jesus pe ras ajar-AjarNa iundang ku kerja e.
3 Asum nggo keri lau anggur nina nande Jesus man Jesus, "Nggo keri lau anggur kalak si erkerja enda."
4 Ngaloi Jesus, "O nande, labo man aturenkendu kai si man bahanenKu. PaksangKu langa seh."
5 Tapi nina nande Jesus man serayan e, "Ikutken kai si IkatakenNa."
6 I je lit isikapken enem guci guna keperlun erburih rikutken adat Jahudi. Isi tep-tep guci lit kira-kira 100 liter.
7 Nina Jesus man serayan e, "Isi guci e alu lau seh dem." Emaka idemi kalak ndai guci e.
8 Jenari nina Jesus man kalak e, "Genduari jaruk lau e sitik jenari baba man sukut i bas kerja enda."
9 Emaka ibaba kalak ndai lau e man sukut kerja e, jenari inanamina lau si nggo salih jadi anggur e. (La ietehna i ja nari rehna; tapi serayan si njaruksa metehsa.) Emaka idilo sukut e si empo,
10 jenari nina man bana, "Biasana anggur si mehulina nge lebe ielaken kalak, janah kenca puas temue e minem, ielaken anggur si biasa. Tapi kam seh asa genduari lit i bas kam anggur si mehulina!"
11 Enda me tanda sengget si pemena ibahan Jesus i kuta Kana i daerah Galilea. IcidahkenNa KuasaNa si mbelin emaka ajar-AjarNa tek man BaNa.
12 Kenca bage lawes Jesus ras NandeNa, sembuyak-SembuyakNa bage pe ajar-AjarNa ku Kapernaum, janah i je me ia kerina ringan piga-piga wari dekahna.
13 Kenca Wari Raya Paskah kalak Jahudi nggo ndeher, lawes Jesus ku Jerusalem.
14 I bas Rumah Pertoton IdapetiNa kalak erbinaga lembu, biri-biri ras nderapati. Lit pe i je kalak kundul si dahinna nukari duit.
15 Jesus erbahan cambuk si idandan i bas nali nari. Alu e IligasiNa gelah ndarat asuh-asuhen e kerina i bas Rumah Peroton nari: subuk lembu, biri-biri. ItunggalingkenNa meja-meja kalak si nukari duit, seh maka merap duitna e kerina.
16 Man kalak si erbinaga nderapati nina Jesus, "Angkat ndarat barang-barangndu e! Ola bahan rumah BapangKu jadi ingan erbinaga!"
17 Perbahan si e inget ajar-ajar maka lit tersurat i bas Pustaka Si Badia, "O Dibata, keleng-ateKu nandangi RumahNdu, ngutkut desken api."
18 Jenari kalak Jahudi si erkuasa ngelawan Jesus nina, "Tanda sengget kai banci IbahanNdu guna nuduhken man kami maka lit HakNdu erbahan si enda kerina?"
19 Erjabap Jesus, "Runtuhkenlah rumah Dibata enda, maka i bas telu wari Kupajekken ka mulihi."
20 Ngaloi kalak e, "IpajekkenNdu AteNdu mulihi i bas telu wari? La mungkin, sabap empat pulu enem tahun nai dekahna majekken Rumah Dibata enda!"
21 Tapi Rumah Dibata si ikataken Jesus, e me KulaNa.
22 Emaka kenca Jesus nggeluh mulihi, iinget ajar-ajar kai si IkatakenNa enda; janah tek ajar-ajar e kai si isuratken i bas Pustaka Si Badia bage pe kai si nggo ikataken Jesus.
23 Paksa Jesus i Jerusalem denga tupung Wari Raya Paskah, nterem kalak tek man BaNa erdandanken tanda-tanda sengget si IbahanNa.
24 Tapi Jesus la tek nandangi kalak e, sabap kerina manusia tangkas itandai Jesus.
25 Labo perlu kalak nuriken kerna manusia man Jesus sabap ieteh Jesus nge kai si lit i bas pusuh manusia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA