Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dung dua ari, adong ma pesta ni na marbagas di kota Kana na di Galilea. Ro do tusi inang ni Jesus,

² jana diontang do Jesus rap dohot angka siseanNia tu pesta i.

³ Jadi dung abis sudena anggur, didok inang ni Jesus ma tuSia, "Madung abis anggur ni halahi."

⁴ Dialusi Jesus ma, "Aha do na dihagiotimu sian Au, inang? Napodo dapot dope hatihangKu."

⁵ Dung i didok inangNia i ma tu angka parkobas na disi, "Muda disuru Ia hamu mambaen sanga na aha, baen hamu ma songon i."

⁶ Adong do disi onom gunci ni aek na niparade, i ma sipakeon di na paias dirina halak dohot tu haporluan na asing-asing mangihutkon aturan ni ugamo Jahudi. Muat-muat saratus liter aek ma ganop gunci i.

⁷ Didok Jesus ma tu angka parkobas i, "Gohi hamu ma angka gunci i dohot aek." Jadi digohi halahi ma lopus sirnip be.

⁸ Dung i didok Jesus ma tu halahi, "Saonnari buat ma saotik aek i jana oban ma tu pangurus ni pesta on." Dioban halahi ma aek i tu pangurus ni pesta i.

⁹ Dung i didai pangurus ni pesta i ma aek i, na dung muba gabe anggur. (Nada diboto ia sanga sian dia ro anggur i, harana hum angka parkobas na mangusehon aek i sajo do na mamboto i.) Dung i dipiohon pangurus ni pesta i ma bayo pangoli i,

¹⁰ didok ia ma tu bayo i, "Anggo somalna anggur na dumenggan do parjolo dilehen halak. Jadi dung tarbahat diinum angka tamu i, i pe anso dilehen anggur na somal. Hape disimpan ho dope anggur na dumenggan, on dope anso diparuar ho!"

¹¹ I ma tanda hahomangan na parjolo dibaen Jesus; i ma na nibaenNia di Kana na di Luat Galilea. Dipatuduhon Jesus ma hasangapanNia markite-hite hahomangan i. Gabe porsaya ma tuSia angka siseanNia i.

¹² Dung i kehe ma Jesus, inangNia i dohot angka anggiNia rap dohot angka siseanNia tu Kapernaum, disi ma halahi piga-piga ari.

¹³ Donok noma hatihana anso dapot Pesta Paskah, jadi kehe ma Jesus tu Jerusalem.

¹⁴ Di Bagas Ni Debata na di Jerusalem, didapot Ia ma angka halak na manggadisi lombu, biri-biri dohot darapati; didapot Ia muse dope disi marjuguhan angka halak na manukarkon hepeng.

¹⁵ Dipature Ia ma sada sambok-sambok sian tali, diusir Ia ma sude angka pahan-pahanan i sian Bagas Ni Debata, biri-biri i sude dohot lombu i. Diparbalikkon Ia ma sude meja ni situkar hepeng i, gabe marsarsaran ma hepeng ni halahi.

¹⁶ Dung i didok Ia ma tu panggadis darapati i, "Oban hamu sude unggas i. Ulang baen hamu gabe inganan parjagalan Bagas Ni Damang!"

¹⁷ Dung i tarsingot ma tu roha ni angka siseanNia i ayat na di Buku Na Badia i songon on, "Holong ni roha maradopkon BagasMu, sai marsigorgor do songon api na mambaen mosok!"

¹⁸ Jadi dialo angka parkuaso ni halak Jahudi i ma Jesus. Didok halahi ma, "Baen ma jolo tanda hahomangan pabotohon tu hami paboa na adong hakMu mambaen songon on!"

¹⁹ Ninna Jesus ma mangalusi, "Rumpakkon hamu ma Bagas Ni Debata on, anso Hupajongjong mangulahi di bagasan tolu ari."

²⁰ Didok halak Jahudi i ma, "Opat pulu onom taon honokna anso sidung dipajongjong Bagas Ni Debata on, hape giot pajongjongonMu ma hum tolu ari sajo?"

²¹ Tapi pamatangNia sandiri do anggo na nidokNia Bagas Ni Debata.

²² Jadi dung mulak mangolu Jesus mangulahi sian na mate, tarsingot ma angka siseanNia i na dung unjung didok Ia songon i. Gabe porsaya ma halahi tu na tarsurat di Buku Na Badia i dohot tu pandohan na nidok ni Jesus.

²³ Hatiha di Jerusalem Jesus di Pesta Paskah i, bahat do halak na porsaya dung diida halahi angka hahomangan na nibaenNia.

²⁴ Tapi anggo Jesus nada pos rohaNia di halahi, angke ditanda Ia do sude halahi.

²⁵ Nada porlu baenon ni halak hatorangan tuSia taringot tu jolma, harana diboto Ia sandiri do sanga aha na adong di bagasan roha ni jolma.

Yohanes

Video Yohanes 02

Ikuti Kami:

KONTAK | PARTISIPASI | DONASI