Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dob ai nini si Bildad na hun Sua ma mambalosi,

² “Sadia dokah on nunutonmu sonai marsahap, anjaha songon logou madoras parsahap ni pamanganmu?

³ Mintor ra ma Naibata papeol uhum? Barang ra ma Pargogoh Na So Tarimbang in papeol hapintoron?

⁴ Anggo mardousa anakmu dompak-Si, jadi ihonahon ma bani sidea hajahaton ni sidea ai.

⁵ Anggo ra ho mangindahi Naibata, anjaha mangindo idop ni uhur ho humbani Pargogoh Na So Tarimbang in,

⁶ anggo pitah uhurmu anjaha bonar, sai hehe do Ia manatap ho, pasuangon-Ni do use ianan ni hapintoronmu.

⁷ Age pe etek pamungkahanni, sai banggal tumang do hadoharonmu bani ujungni.

⁸ Mahua papangkei ma sundut na basaia, anjaha pardiateihon ma podah na jumpah ompung ni sidea.

⁹ Ai jolma sinantuari do hita, seng dong na binotohta, anjaha halinoh tumang do ari-arinta i tanoh on.

¹⁰ Ai lang sidea do siajari ho, na patugahkon bam, anjaha na manluarhon hata podah hun bagas uhur ni sidea?

¹¹ Tumaram ma tubuh arung-arung, anggo lang adong paya-paya? Mintor tarbahen ma dulas ganjang poyon-poyon bah, anggo seng dong bah?

¹² Sanggah martumbor ope, lape isabi, tapi melus do ai, parlobei humbani poyon-poyon na legan.

¹³ Sonai do dalan ni ganup na mangkalupahon Naibata, maningon magou do pangarapan ni halak parjahat.

¹⁴ Mapuntar do hatengeran ni uhurni, doskon asar ni lawah-lawah do pos ni uhurni.

¹⁵ Mangunsandei ia bani rumahni, hape seng tahan jongjong ia, marsijoloman ia hujai, hape seng totap.

¹⁶ Gok gotah do ia namin ibagas milas ni mata ni ari, anjaha manggargar dangkahni i babou ni pohonni.

¹⁷ Manjulur do andorni bani timbunan batu, anjaha itolpusi longkit-longkit ni batu.

¹⁸ Tapi anggo niruntun ia humbani iananni, parnalangonni ai ma ia, nini, ʻSeng ongga huidah ho.ʼ

¹⁹ Tonggor ma, ai ma olob-olob ni goluhni, anjaha humbani orbuk ai martumbor use halak na legan.

²⁰ Tonggor ma, seng tumaram ambungkonon ni Naibata halak na daulat maruhur, barang tumpakon-Ni tangan ni parjahat.

²¹ Gok tawa do use pamanganmu bahenon-Ni, anjaha bibirmu gok parolob-oloban.

²² Pailaon-Ni do halak na marsogam ni uhur bam, anjaha boiskonon-Ni do lampolampo ni parjahat.”