Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ [Kenca bage ngerana ka Bildat man Jop nina,] "Uga, nggo kam dung melasken cakapndu si bagi angin erdeso?

² (Ayb 8:1)

³ Dibata la pernah mbelukken keadilen; Ia la pernah mbelukken kebenaren.

⁴ Ugapa pe anak-anakndu nggo erdosa man Dibata, janah erkiteken si eme maka iukum Dibata ia bagi patutna.

⁵ Tapi genduari erkusurlah kam, pindolah perkuah ate Dibata, si Mada Kuasa.

⁶ Adi bujur dingen bersihlah kam, ugapa pe reh nge Dibata nampati kam jenari IpesikapNa mulihken jabundu jadi pemere man bandu.

⁷ Kerina kebayakenndu si nggo bene la kai pe e, ertimbangken kai si nandangi ibereken Dibata man bandu.

⁸ Pepayo lebe kentisik kepentaren si adi; perdiatekenlah kebenaren si nggo ipelajari nini-nininta nai.

⁹ Geluhta gendek kap, emaka pemetehta labo kai pe; kita desken awih mentasi doni enda.

¹⁰ Tapi berelah kalak pentar si nai ngajari kam; begikenlah katana nina,

¹¹ "Rengo labo banci mehuli perturahna i bas taneh si la erlau; emaka labo lit rengo di la i bas taneh mehumur.

¹² Adi kerah launa, leben ia melus asa sinuan si deban, aminna gia kitiksa denga guna isabi.

¹³ Kalak si la erdibata bagi rengo kap; katawari ilupakenna Dibata, i je bene pengarapenna.

¹⁴ Penalemenna bagi selembar benang, benang asar lawah-lawah,

¹⁵ tertande ia kempak banto lawah-lawah, tapi e la tahan natang ia. Adi itangkapna selambar benang, tahan kin e man inganna cerawis?"

¹⁶ Kalak jahat perturahna mbur bagi dukut i bas las matawari, desken dukut si merap i belang-belang juma.

¹⁷ Uratna njoler arah batu-batu, leket ngeskes kempak batu-batu.

¹⁸ Tapi adi iruah, ise pe lanai lit si metehsa i ja gelgel inganna turah.

¹⁹ Sibar bage me ngenca keriahen si nidat kalak jahat; reh kalak si deban, jenari iciatina inganna.

²⁰ Tapi la ndigan pe itadingken Dibata kalak si patuh man BaNa, janah kalak jahat la ndigan pe IsampatiNa.

²¹ IbereNa ka kam mulihi ersurak ras tawa,

²² tapi IpeterukNa kalak si elem-elem man bandu, janah masap me rumah kalak jahat."