Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dob ai nini si Elihu ma use,

² “Ai sintong ma ai ninuhurmu? Nimu, ʻMarhapintoran do ahu i lobei ni Naibata,ʼ

³ gabe isungkun ham, ʻAha ma gunani ai bangku? Aha ma hasurunganku anggo seng mardousa ahu?ʼ

⁴ Ahu, ahu ma mambalosi ham, ampa huan-kuanmu na rapkon ham.

⁵ Mangkawah ma ham dompak langit, anjaha idah ham ma hombun ai, na gijangan ase ham.

⁶ Anggo mardousa ham, aha do na binahenmu bani Naibata? Anggo lambin bueini panlanggaronmu, aha ma ibahen ham Bani?

⁷ Anggo pintor ham, aha pamberemu Bani? Atap aha dong ijalo hun bamu?

⁸ Bani jolma na songon ham tumang mangonai hajahatonmu, anjaha bani anak ni sada jolma marguna hapintoronmu.

⁹ Doruh-doruh do namin halak binahen ni buei ni pangarsikon, anjaha doruh-doruh do sidea mangindo pangurupion halani kuasa ni halak na sangap-sangap.

¹⁰ Tapi seng dong na mangkatahon, ʻIja do Naibata Sitompa ahu, na mambere doding bangku borngin,

¹¹ na mangajari hita lobihan humbani binatang na i tanoh on, anjaha na papentar hita lobihan humbani manuk-manuk na i awang-awang?ʼ

¹² Dilo-dilo pe sidea, tapi seng ibalosi, halani hajungkaton ni halak parjahat.

¹³ Tongon, seng itangihon Naibata dilo-dilo na lumei, seng ikawahkon Pargogoh Na So Tarimbang in na sonai ai.

¹⁴ Lambin naha ma anggo ihatahon ham, seng ididah ham Ia? Botoh ham ma, domma das i lobei-lobei-Ni parkaramu. Paima ham ma putusan-Ni.

¹⁵ Sonari, halani seng marbalos ope Naibata ibagas ringisni, anjaha seng sadiha ipardiatei ope salah,

¹⁶ ibuha si Job do pamanganni mangkatahon hata na lumei, anjaha ipabuei sahap-sahap na so marpanimbangion.