Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 “Mase ma nani lang idalankon Pargogoh Na So Tarimbang in panorang paruhuman? Mase ma lang ididah na mananda-Si ari panguhumon-Ni?
2 Sai ipaosor halak parjahat do parbalogan, irampas do hulanan ni pinahan anjaha iparmahan songon rupeini.
3 Ialai sidea do halode ni na tading maetek, ipasikoramkon sidea lombu ni na mabalu.
4 Ijullakkon do halak na musil humbani dalan, na madorun i nagori ai marsiponopkon dirini bei.
5 Tonggor ma, songon halode harangan i halimisan laho sidea bani horja ni sidea, pindah-pindah bani sipanganon; humbani tanoh hondot jumpahan sipanganon sidea bani anakni.
6 Borngin isabi sidea juma ni halak, anjaha buat-buat sidea hun pohon anggur ni parjahat.
7 Talag, seng marhiou, ipapodom sidea dirini, anjaha seng marsabing sidea bani borgoh ni ari.
8 Taptap sidea ibahen udan dolog, dolog batu ipangunsandei, halani seng dong panisioanni.
9 Irampas sidea do na tading maetek hun abingan ni inangni, anjaha igadeihon dakdanak ni halak na musil.
10 Talag-talag do sidea laho, seng marhiou; anjaha age pe loheian itarui do radean.
11 Maningon i holangkolang ni tembok sidea mamoroh minak, ibagas pangilangan anggur sidea marhorja, anjaha horahan sidea.
12 Humbani huta ai tarbogei orong-orong ni halak na laho matei, anjaha dilo-dilo tonduy ni halak na ugahan bani pangurupion, tapi lang itangihon Naibata tonggo ni sidea.
13 Adong do halak na legan gabe imbang ni na siang, seng itanda sidea dalan ni Naibata, anjaha seng totap sidea bani dalanni ai.
14 Marayak siang ari jongjong ma halak pamunuh, laho mamunuh halak na musil ampa halak na masombuh, anjaha borngin suruk-suruk songon panangko.
15 Halak parbangkis paimahon samon ari, nini uhurni, ʻSeng dong na mangidah ahu!ʼ Palegan rupa do ia.
16 Masuk do ia ibagas golap ari hu rumah, ia arian i rumah do sidea marhurung; seng iharosuhkon sidea na lihar.
17 Na lotir ai do sogod bani sidea, ai marhuan-kuan do sidea pakon songgot-songgot na ibagas na golap ai,
18 podas do sidea lintun marayak siang ari. Hona papa do parbagianan ni sidea i tanoh in, seng dompakkononni be pohon anggurni.
19 Songon logou ni ari ampa milas ari mambahen sintak bah salju, sonai do nagori toruh bani halak pardousa.
20 Lupahonon ni abingan ni inangni do ia, pampanganon ni gilok-gilok, anjaha seng dong be na mardingatsi; ripukkononkon do hajahaton ai songon hayu.
21 Ihilang sidea naboru na lambang, anjaha seng layak bani naboru na mabalu.
22 Tapi tene sai ipaganjang Naibata do goluh ni halak parkuasa marhitei gogohni; jongjong do sidea use sanggah sosak goluh ni sidea.
23 Ibere do bani hatotapon, itungkoli do sidea; tapi ipardiatei panonggorni do dalan ni sidea.
24 Tongkin timbul do sidea, hape tongkin nari domma mogap; matei do sidea songon halak na legan; isabi do sidea songon buyur ni omei.
25 Anggo seng sonai, ise ma na pag mangkatahon seng sintong hatangku, anjaha manlangkon hatangku?”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA