Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 A’lampako alliliangi kalennu, he sikamma tu Benyamin! Bokoi Yerusalem! Pasa’rai tarompeka ri Tekoa, siagang apparinrako pepe’ ri Bet-Kerem salaku pammatei! Niaki battu wara’ balaya siagang bahaya lompoa lantujuko.
2 Sanna’ ga’gana kota Sion, mingka laNiancuruki ri Batara;
3 sikamma pamarentaya lakkemai anjoreng siagang tantarana. Lanapasangi tenda-tendana ke’nanga ri tammulilina anjo kotaya, ri tampa’ massing nangaia ke’nanga.
4 Lanakana ke’nanga, "Umba, nakipparuru untu’ ambunduki Yerusalem! Umba nanibuccuki anne alloa!" Mingka lanakana pole ke’nanga, "Ai, tarlambakki’! Appakkaramulami battu sassanga, appakkaramulami kacinikang taun-taunta.
5 Bajiki punna bangngipi kimange ambunduki, na niancuru’ sikamma tembo’ pattahanganna anjo kotaya."
6 Le’ba’mi Naparentakang Batara Kaminang Koasaya anjo sikamma pamarentaya sollanna anna’bang poko’-poko’ kayu nampa appaenteng pattahangngang ri sikamma bulu’-buluka untu’ antammulili Yerusalem. Nakana Batara, "LaKuhukkungi anne kotaya lanri jai sikali panggaukang anjallakkang ilalang.
7 Antekamma batena timbuseng je’neka tuli appasulu’ je’ne’, kamma tomminjo anjo kotaya tuli appa’niaki kaja’dallang. Poro kabara’ kapallakkang siagang pangngellakkang bawang Kulangngere’ battu ri anjo kotaya; kemae-kemae Kucini’ lokoka siagang garringa.
8 He pandudu’ Yerusalem, poro anjo sikontu kasukkaranga a’jari pappaingaki ri kau! Gassingka Kubokoiko siagang Kupinrai kotanu a’jari parang lompo tenaya nipammantangngi ri tau."
9 Nakana Batara Kaminang Koasaya, "Lanipa’jari gondoloki Israel sa’genna lanynying sanrapang koko anggoro’ lanynyinga rapponna le’ba’ nialle ngaseng. Lanri kammana, ilalang nia’na ija wattu, pasalamaki niaka tassesa."
10 Appialia’ angkana, "Batara, inai musti kupa’bicarai, siagang inai musti kupappakaingakki? Kapala batui ke’nanga siagang taerokai mappilangngeri. Nakakkali siagang nakabirisi ke’nanga pasanTa kupabattua mae ri ke’nanga.
11 Anjo larroTa mae ri ke’nanga a’bara tongi lalang ri kalengku, Batara! Sukkaraki lakuparrangngi." Nampa Nakana Batara, "Pa’betteseki anjo larroa mae ri ana’-ana’ niaka ri sikamma agang lompoa siagang mae ri sikamma tau rungka sitabanga a’rappung. Lanijakkalaki sikamma bura’nea siagang bainea, kammayatompa sikamma tau toa duduamo umuru’na tena todong nalata’lappasa’.
12 Balla’na ke’nanga lanipassareangi mae ri tau maraenga, kammayatompa sikamma kokonna siagang bainenna ke’nanga. LaKuhukkungi pandudu’na anne pa’rasanganga.
13 Yangasenna ke’nanga, ca’di lompo, massing kaparalluang kalenna naboya lalang panggaukang tenaya nalambusu’. Ba’lalo manna na’bia siagang imanga annipu tongi tau.
14 Anjo bokka’-bokka’na ummakKu nakanangi ke’nanga poro bokka’ ca’diji bawang. Nakana ke’nanga, ‘Ah, tenangngapa-apa, yangasenna baji’ji siagang amanji.’ Nampa tena sikali nakamma anjo.
15 Mustina siri’-siriki ke’nanga lanri le’ba’na nagaukang ngaseng anjo panggaukang tunaya. Mingka kapala’ rupai siagang tena siri’na ke’nanga. Lanri kammana, latu’guruki ke’nanga sangkamma tau maraenga; cappu’mi riwaya’na ke’nanga punna Kuhukkungi ke’nanga. INakke, Batara, anne akkana."
16 Nakana Batara ri umma’Na, "Ammentengko ri sikamma panyingkulu’na aganga, siagang parhatikangi baji’-baji’! Pakkuta’nangngangi sikamma agang-agang riolo-rioloa, siagang kereanga kaminang baji’ anjo aganga. Pinawammi anjo aganga, sollanna sannang katallassannu." Mingka angkanai ke’nanga, "Tena, tena naero’ ikambe ampinawangi anjo aganga!"
17 Nampa a’mole-molemo Batara angngangka’ pajaga untu’ ampakaingaki ke’nanga sollanna napilangngeri pammateina sa’ra tarompeka. Mingka nakana ummaka, "Taerokai ikambe ampilangngeri."
18 Lanri kammana Nakanamo Batara, "Pilangngeri, he ikau bansa-bansaya! Musti nuassengi apa lakajarianga mae ri ummakKu.
19 Parhatikangi, he ikau buttaya! Taerokai ummakKu antarimai pangngajarangKu siagang taerokai mannuruki ri Nakke. Lanri kammana anjo ero’na ke’nanga, Kupitujui ke’nanga bala lompo.
20 Apa matu-matunna ke’nanga ampangngerangngangA’ kamanynyang battu ri Syeba, yareka rampa-rampa battu ri pa’rasangang bellaya? Tena naKuero’ antarimai passarena ke’nanga. Tena Kungai koro’bang-koro’bang nitununa ke’nanga.
21 LaKupatatto’roi ke’nanga sollanna tu’guru’. Mangge siagang ana’, agang siagang siampi’ balla’, yangasenna lapanra’ ngasengi."
22 Nakana Batara, "Nia’ bansa kassa’ a’gio’ battu wara’ ri pa’rasangang bella. Battui mae ke’nanga untu’ a’bundu’.
23 Sanjatana ke’nanga iamintu pana siagang poke; sanna’ palla’na ke’nanga natena pangngamaseanna. Rapang bombang a’jalloka, kammaminjo sa’ra bangkeng jaranna nadongkokia untu’ maju a’bundu’, ambuccuki Yerusalem."
24 Nalangngere’na anjo kabaraka, naummi sumanga’na pandudu’ Yerusalem. Nibattuimi ri malla’, siagang sessami pakkasia’na ke’nanga rapang baine eroka ammana’.
25 Tenamo nabarani ke’nanga naung ri aganga yareka a’lampa mange ri kokoa, lanri kemae-kemaemi musua angngeranga sanjata appania’ karicuang siagang pammunoang.
26 Nakana Batara ri umma’Na, "Ammakeko pakeang karung nampa anggulung-gulungko ri aua. Susa tukamateang mako siagang angngarru’ mako pacce nyawanu, rapang tau appiraunga angkarruki ana’ sitau-tauna, nasaba’ ti’ring labattumi tulammanrakia ambundukiko."
27 Nampa Nakana Batara ri Yeremia, "So’ri sai ummakKu, rapang tau asso’ria bulaeng. Salidiki sipa’-sipa’na ke’nanga!
28 Yangasenna ke’nanga pabali-bali siagang kapala batui, kamma terasa’na tambagaya siagang bassia. Ra’masaki panggaukanna ke’nanga siagang pitijappa-jappai mange-mange appasiara’ kabara’ balle-balle untu’ ampanraki areng baji’na paranna tau.
29 Sanna’mi bambanna pappasolonganga, mingka taerokapi a’lesang ra’masa’na siagang tappela’ ra’masa’na anjo bulaenga. Tena matu-matunna ummakKu tuli niso’ri untu’ nipakati’no’, lanri sikamma tau ja’dala’na tena napabellai.
30 Lanigallaraki ke’nanga pera’ nipela’, nasaba’ iNakke, Batara ampelaki ke’nanga."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA