Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 O kalak Benyamin lompatlah gelah kam terkelin, kiamlah i Jerusalem nari! Embuslah terompet i Tekoa, jenari pegara api jadi tanda i Bet-Hakerem. Nandangi reh me cilaka ras mara i Utara nari.
2 Kota Sion si mejile e nandangi ikernepken me.
3 Bagi permakan ras rarasenna bage me raja-raja erkemah i je ras tenterana. Ipajekkenna kemahna i sekelewet kota e. Tep-tep kalak rate-ate i ja atena ipajekkenna kemahna.
4 Nina, "Ersikaplah nerang Jerusalem! Ersikaplah! Seranglah tupung pantek ciger." Tapi nina ka, "Nggo melawenca, sabap wari nggo nandangi ben, dingen awih-awih nggo reh gedangna.
5 Berngi saja gia siserang; siradasken benteng-benteng kotana."
6 TUHAN si Mada Kuasa si merentahken raja-raja gelah nabah batang-batang kayu dingen pegun-gun taneh jadi benteng Jerusalem. Nina, "Kuukum me kota e erkiteken dem i je penindasen.
7 Desken sumbul pedarat lau malem, bage me ia pedarat kejahatenna. Kubegi kekejamen ras kecedaan i bas kota e. Penakit, ugah, eme kerina si Kuidah i je.
8 O kalak Jerusalem bahan kerina kesusahen e jadi pelajaren man bandu, adi lang Kutundalken me kam. Kusalihken kota e jadi padang pasir, la lit sekalak manusia pe ringan i je."
9 Nina TUHAN si Mada Kuasa man Bangku "Nandangi ipelinang me Israel, bali ras batang anggur si nggo keri buahna iputiki." Emaka arus ipulahindu kerina kalak si banci ipulahindu tupung lit denga kesempaten."
10 Ningku njabapsa, "Ise kin megiken aku adi aku ngerana persingeti ia? Mekengsa pusuhna, labo ia ngasup megiken TenahNdu. Itawaina aku adi kubelasken KataNdu.
11 Pernembeh AteNdu man bangsa e, gara ka nge i bas pusuhku pe. Emaka lanai tertahanken aku." Kenca bage nina TUHAN, "Amburken pernembehKu ku babo anak-anak i bas gedang-gedang dalan, ras ku babo perpulungen anak perana. Perbulangen ras ndehara la banci la iangkut. Kalak si nggo metua kal pe labo tading.
12 Rumahna, ndeharana, jumana ibereken man kalak. Kuukum ateKu penduduk negeri enda.
13 Kerina kalak, subuk mbelin ras kitik, ndarami duit alu dalan si la bujur. Subuk nabi bage pe imam kerina nipu jelma si nterem.
14 Perbahanenna encidahken tempa-tempa ugah bangsangKu labo mekelek. 'Dame' nina, tapi si tuhuna labo lit dame.
15 Aturenna mela iakapna ngelakoken perbahanen si mbau e, kepeken labo iakapna mela. Sitik pe la ietehna mela. Emaka guling ia bagi perguling kalak si deban. Adi Kuukum ia emaka nggo dung kal ia. Aku TUHAN kap si ngerana."
16 Nina TUHAN kempak BangsaNa, "Tedislah i bas serpang-serpang jenari nehenlah. Daramilah dalan si nai, dalan si mehulina kal. Arah e lah erdalan, emaka dame man bandu." Tapi nina njabapsa, "Lang! Kami la nggit!"
17 Emaka itugasken TUHAN penjaga-jaga lako megiken sora terompet tanda persinget. Tapi nina kalak e, "La ate kami ibegiken kami."
18 Kenca bage ngerana TUHAN nina, "O bangsa-bangsa, erlajar kerna kai si jadi man bangsangKu.
19 O pertibi, dengkehkenlah! Kuukum me bangsangKu, erkiteken kerina sura-surana. Kuruntuhken me bangsa enda, erkiteken nggo itulakna pengajarenKu, janah la iikutkenna katangKu.
20 Kai kin gunana man bangKu si merim-merim si ibaba i Syeba nari! Man kadengKu kin rempah-rempah si ibabana i bas negeri si ndauh nari? La Kualoken persembahenna, la ngena ateKu persembahen tutungen.
21 Emaka Kubahan bangsa enda terantuk dingen guling. Parang-mbelin ras anakna, teman-teman ras anak kutana la banci lang mate kerina."
22 Nina TUHAN, "Bangsa si megegeh sangana reh i Utara nari. Erperang atena.
23 Senjatana panah ras lembing; bangsa e kejam janah la meteh mekuah. Bali ras pergeruhguh lau lawit bage me sora nahe kudana; irattuhna ku Jerusalem lako nerangsa."
24 Megi berita e nggirgir kalak Jerusalem. Perban biarna mesui akapna bagi persuina iakap diberu si nandangi mupus.
25 La ia pang ndarat ntah ku juma, sabap i japa pe musuh erbahan kebiaren.
26 Nina TUHAN man BangsaNa, "Uisken uis guni janah erguling-gulinglah i bas abu. Cedalah atendu dingen serkolah bagi kalak si nangisi kematen anakna si tonggal, sabap rempet me reh si engkernepi.
27 Emaka nina TUHAN man Jeremia, "Ujilah bangsangKu bali ras tukang nguji logam. Perdiatekenlah lagu langkahna.
28 Kerina ia pemberontak, metangkang, piher bagi tembaga ras besi. Pertaki pacik ia, dingen erdalan-dalan ku jah ku jenda lako pebau-bau kalak.
29 Logam nggo iuji seh melebur, tapi melketna lalap la bene. Percuma bangsangKu terus iuji gelah tulen, sabap kalak jahat lalap la tersirangken i bas ia nari.
30 Pirak si la terpake me ibahan gelarna, sabap Aku TUHAN nggo ngambengken ia."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA