Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Siari ma dalan-dalan na i Jerusalem, tonggor anjaha papangkei ma! Pareksa ma alamanni laho mangidah, atap dong do jumpah sahalak, sihorjahon na madear, sipindahi hasintongan, ase marpangulaki uhur-Hu bani sidea.
2 Age pe ihatahon sidea, ʻSongon sintongni maggoluh Jahowa,ʼ tapi ladung do bijani ai.
3 Ham Jahowa, ai lang dompak hasintongan do panonggor-Mu? Ilonsing Ham do sidea, tapi seng mangahap sidea; iboiskon Ham do sidea, tapi seng ra sidea manjalo ajar. Ipamapir sidea do bohini lobih humbani batu gingging, manjua do sidea paubah uhurni.
4 Tapi nini uhurhu, ʻNa masombuh-sombuh do sidea on, anjaha na oto, ai seng itanda sidea dalan ni Jahowa, sonai age titah ni Naibata ni sidea.ʼ
5 Laho ma ahu bani halak na banggal-banggal, sihol marsahap pakon sidea; tontu anggo sidea ibotoh do dalan ni Jahowa ampa titah ni Naibata ni sidea. Tapi sidea ai pe dos do, iparponggol do pasanganni, irotapi talini.
6 Halani ai sorohon ni singa na hun harangan do sidea, boiskonon ni gipul na hun halimisan. Begu do manggompangi huta ni sidea; sagala na mandarat hunjai sorohonni do, ai buei tumang do panlanggaron ni sidea, banggal do panundalini.
7 Sonaha ma boi marpangulaki uhur-Hu bam? Itadingkon anakmu do Ahu, anjaha marbija do sidea marhitei goran ni na so Naibata. Anggo domma Hubosuri sidea, laho do sidea marbangkisi, marurup do sidea hu rumah ni boru jalang.
8 Huda panjangan na mombur, na garang do sidea, na mariha-iha dompak jolma ni hasomanni.
9 Mintor lang ma luluhonon-Ku sidea halani ai? Nini Jahowa. “Mintor lang ma marbalas Ahu hubani bangsa na sonin?
10 Tangkog ma hanima hu pohon anggurni anjaha parseda ma, tapi ulang mintor bois; tuhtuhi hanima ma ranting-rantingni, ai sedo Jahowa simada ai.
11 Tongon, mangeluk do hun Bangku ginompar ni Israel ampa ginompar ni Juda,” nini Jahowa.
12 Iparnalang sidea do Jahowa anjaha ihatahon, “Aha pe lang bahenon-Ni, seng anjai dong hamagouan roh hu banta, podang atap lohei pe seng anjai idahonta.”
13 Sihatahon na so tongon do nabi-nabi ai; seng dong tongon hata ni Jahowa bani sidea; bani sidea sandiri ma masa na sonai ai!
14 Halani ai sonon do hata ni Jahowa, Naibata Zebaot, “Halani sonai hata ni sidea, tonggor ma, bahenon-Ku ma hatang-Ku gabe apuy ibagas pamanganmu, anjaha bangsa on gabe soban, gabe bois ma sidea ipangan apuy ai.
15 Tonggor ma, parohon-Ku ma bannima, sada bangsa humbani na daoh, ale ginompar ni Israel,” nini Jahowa, “Ai ma sada bangsa na so tartaluhon, bangsa na basaia, bangsa na so niarusanmu sahapni, na so niartihonmu atap aha na hinatahonni.
16 Songon tanoman na ngangang do parsumbianni, haganup do sidea puanglima.
17 Bois do panganon ni sidea na pinariamaanmu ampa sipanganonmu; panganonni do anakmu pakon borumu; bondutonni do biribirimu pakon lombumu; boiskononni do pohon anggurmu pakon hayu aramu; huta-hutamu na pinatoguhmu, na hinatengerhon ni uhurmu, parsedaonni do marhitei podang.
18 Tapi age pe bani ari ai,” nini Jahowa, “Seng mintor bois tumang hanima bahenon-Ku.
19 Anjaha anggo ihatahon sidea, ʻMase ma ibahen Naibata Jahowa Naibatanami haganupan ai bennami?ʼ Hatahon ma bani sidea, ʻSongon na tinadingkonnima Ahu, anjaha ibalosi hanima naibata na legan i tanohnima,ʼ sonai do balosannima halak na legan, bani tanoh na so nagorinima.
20 Patugah ma on bani ginompar ni si Jakob, anjaha tingtingkon ma ai i Juda,
21 ʻBogei ma on, ale bangsa na oto anjaha na so maruhur, na marmata hape seng marpangidah, na marpinggol hape seng marpanangar!ʼ
22 Ai seng mabiar hanima mangidah Ahu?” nini Jahowa. “Ai seng gobir hanima i lobei-Hu? Ahu do na mambahen buntu-buntu horsik gabe parbalogan ni laut, gabe olat-olat na manontong na so boi lopusanni; manggila pe gilumbangni seng monang sidea, marhasak pe sidea, seng boi diparanni ai.
23 Tapi bangsa on, paruhur na tendel anjaha na hengkeng do; manlembang do sidea, anjaha inunuti dalanni.
24 Seng ongga ihatahon ibagas uhurni, ʻHabiari hita ma Jahowa Naibatanta, na mambere udan parmulaan ampa udan pangujungi bani panorangni, na mangatur banta panorang pariama.ʼ
25 Tapi hajahatonnima do na papeletkon ai, anjaha dousannima do na mangambat na madear roh hu bannima.
26 Tongon, adong do jumpah parjahat i tongah-tongah ni bangsang-Ku; monggop do sidea manggompangi songon halak sisidingi manuk-manuk, laho manangkap jolma.
27 Songon harang-harang gok marisi manuk-manuk, sonai do rumah ni sidea gok bani barang tipuan; halani ai do ase sangap anjaha bayak sidea, mombur anjaha tambos do sidea.
28 Seng maralang-alang sidea mangkorjahon hajahaton; seng pintor panguhumion ni sidea: Pahara ni halak na tading maetek seng iapiti sidea, anjaha seng ipartahankon sidea hak ni halak na masombuh.
29 Mintor lang ma luluhonon-Ku sidea halani ai?” nini Jahowa. “Mintor lang ma marbalas Ahu bani bangsa na sonai ai?
30 Na majangin anjaha sihagigihononkon do na masa i tanoh in.
31 Nabi-nabi manjahai ibagas ladung, malim-malim manrajai uhur-uhur ni sidea; marosuh do bangsang-Ku bani sisonai ai, tapi aha do sibahenonnima, anggo marujung ai?”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA