Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 O kalak Jerusalem, kiamlah arah pasar-pasarndu! Pernehen kelewet, tatap alu matandu jine, pepayo kerina tiga inganndu erbinaga. Lit kin kam jumpa sekalak lah gia, si ngelakoken kai si mehuli, si ersura-sura patuh man Dibata? Adi lit kam jumpa sekalak lah gia, banci ialemi TUHAN kota Jerusalem.
2 Aminna pe nindu maka nembah nge kam man TUHAN, tapi si tuhuna lain si ibelaskenndu, lain i bas pusuhndu.
3 Tentu idarami TUHAN ketutusen kalak, IligasNa kam, tapi la diatendu pe. IripukkenNa kam tapi la kam nggit erlajar. Ibahanndu mekeng pusuhndu emaka la kam nggit nadingken dosandu.
4 Emaka nina ukurku, "Kitik kap kalak enda! Bodoh kap ia la ietehna sura-sura Dibata, si ngena ate TUHAN la ietehna.
5 Kudahi ateku kalak si erkuasa, ngerana ateku rassa. Pasti ietehna kai sura-sura Dibata, kai peraten TUHAN si man dalanenken." Tapi kerina nggo nulak kuasa TUHAN janah la nggit patuh.
6 Eme sabapna reh singa i bas kerangen nari munuh kalak enda, serigala i gurun pasir nari reh encaing-caing ia. Arimo gawah-gawah arah tengah kutana. Ise si ndarat la banci la ijerngemna perban melala kal dosa-dosana, dingen lalap la erngadi-ngadi itundalkenna Dibata.
7 Nungkun Dibata nina, "Ngkai maka arus Kualemi dosa bangsangKu? Itundalkenna kap Aku, nembah ia man dibata-dibata si la tuhu. Kubere nakan bangsangKu seh besur, tapi kenca besur lawes ia erlua-lua ikerikenna wari-warina ras diberu si pencarinna erlua-lua.
8 Desken kuda kiringen si dem kerincuhen, erngih-ngih man ndehara temanna.
9 Ngkai maka la arus Kuukum ia erkiteken kerina si e, ngkai maka la Aku erbalas man bangsa si bage?
10 Kusuruh musuh nabahi batang anggur bangsangKu, tapi la keri kal iradasken. Kukataken man musuh e gelah itastasina dahan-dahanna, sabap dahan-dahan e labo Aku empuna.
11 Kalak Israel ras Juda tuhu-tuhu nggo Aku itipuna. Aku, TUHAN, kap si ngerana."
12 Bangsa Israel nggo mersoken TUHAN nina, "Labo kai pe si IbahanNa. Labo kita ikenai paksa si mesera. Labo kita ngenanami peperangen ras kelihen."
13 Ikataken bangsa emaka nabi-nabi labo kai pe ertina; desken angin saja nge ngenca. Labo lit ibabana berita i bas TUHAN nari. Ngerana TUHAN si Mada Kuasa nina, "O Jeremia erkiteken nggo bage pengerana bangsa enda, Kubahan maka katangKu Kutamaken ku babahndu bali ras api. BangsangKu bali ras ranting, jenari ipan api e ia seh keri."
14 (Yer 5:13)
15 O bangsa Israel, ibaba TUHAN me sada bangsa i bas ingan si ndauh nari nerang kam. Bangsa e megegeh tuhu-tuhu dingen nai nari nggo lit janah la iantusindu cakapna.
16 Tukang pemanahna tentera si mbisa. Ibunuhina kalak, sitik pe la atena mekuah.
17 Itelenna kerina ulih jumandu ras panganndu; ibunuhina anakndu si dilaki ras si diberu. Igelehina lembu ras biri-birindu, jenari ikernepkenna batang anggur dingen batang ara. Kota-kotandu si erbenteng si jadi penalemenndu, ikernepkenna salu tenterana.
18 Nina TUHAN, "Tapi i bas paksa si e pe labo keri Kulesapken bangsangKu.
19 O Jeremia, adi isungkunna kam ngkai maka bagenda jadina, turiken man bana, maka si enda kerina jadi erkiteken nggo itundalkenna Aku, jenari jadi budak dibata-dibata si deban i bas negerina jine. Dage ia pe iperbudak me i bas negeri si labo negerina jine."
20 Nina TUHAN, "Kataken man kesusuren Jakup, turiken man kalak Juda.
21 Perdiatekenlah, o kam kalak longor, kam kalak bodoh! Lit matandu tapi la erpengidah. Lit cupingndu tapi la erpemegi.
22 Aku kap TUHAN; ngkai maka la kam mbiar man bangKu? Ngkai maka la nggirgir i adep-adepenKu? Kuamparken kersik jadi baleng lawit, jadi baleng si rasa lalap si la banci ikeparina. Aminna pe galumbangna ergalun dingen ergeruhguh tapi labo terlewatisa.
23 Tapi bangsa enda bangsa si mekeng pusuhna dingen pemberontak. Kam nggo erkusur jenari itadingkenndu Aku.
24 Aminna pe Kupesusur udan i bas paksana ras Kubereken pe man bandu paksa peranin tep-tep tahun, tapi labo pernah iukurindu uga erbahan mehamat man Bangku.
25 Tapi dosa-dosandu ngolangi si mehuli e i bas kam nari.
26 Kalak jahat nggeluh i tengah-tengah bangsangKu, nimai janahna nggempangi desken kalak si ngerewasken rewasna nangkap perik-perik, tapi itogengna ragumna lako nangkap kalak.
27 Bali ras perburu ndemi ranjangna alu perik, bage me pe kalak enda ndemi rumahna alu barang rampasen. Eme erbahanca maka ia erkuasa dingen bayak,
28 si erbahanca ia mbur dingen cukup panganna. La ersibar kejahaten si ibahanna. La iberekenna hak man anak melumang. La iberekenna keadilen man kalak si itindih.
29 Tapi erkiteken si e, Aku TUHAN la banci lang ngukum ia. Erbalas Aku man bangsa enda.
30 Kiniseran ras cilaka jadi i negeri enda.
31 Nabi-nabi melasken kata la tuhu, imam-imam merentah sue ras si iperentahken nabi-nabi, janah bangsangKu la melasken keberatenna. Tapi kai nari pagi ibahanna adi nggo seh paksa pendungina?"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA