Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 A’bicarai Batara ri nakke, ri sesena bansa-bansaya,
2 appakkaramula siagang Mesir. Napauanga’ ri passala’na tantarana Nekho karaeng Mesir, nibetaya ri Karkemis ri ampi’na Binanga Efrat ri Nebukadnezar karaeng Babel lalang taung makaappa’ pamarentahanna Yoyakim, karaeng Yehuda. Iaminne Napaua Batara ri sesena anjo passalaka,
3 "Perwira-perwirana tantara Mesir ammarrangi untu’ ampasadiai pasukanna nakana, ‘Pakatarangi pokea! Pakei baju bassia siagang topi bajaka. Pasadiai pa’lapa’ barambannu siagang antamako ri barisanga! Ikau, pasukang a’jaranga, patabai linta’ pa’lapa’ jarannu! Dongkoki jarannu, nampa majuko a’bundu’!’
4 (46:3)
5 Mingka inakke, Batara, Kuciniki ke’nanga ammunduru’ napakamma malla’. Sikamma tantarana nibetai, lari napakamma malla’ tamassaile mae ri boko.
6 Ia laccirika tanakulleai lari, ia barania takkulleai ta’lappasa’ battu ri musua. Tatto’roi ke’nanga siagang tu’guruki wara’, ri birinna anjo Binanga Efrat.
7 Inaika anjo naika rapang je’ne’na Binanga Nil, rapang binanga allumpaya je’ne’na mae ri biring-birinna? Iaminjo pa’rasangang Mesir. Nakana kalenna, ‘Lambangunga’ nai’ nakukoasai buttaya. Lakupanraki kota-kotaya siagang pandudu’na.
8 (46:7)
9 A’lumbako, he jarang! A’giokko, he kareta! Majuko, he tubarani angngeranga pannahang, battua ri Sudan siagang Libia. Kamma todong ikau, he sikamma tucara’deka ammake sanjata pana, battua ri pa’rasangang Lidia.’"
10 Mingka inakke, Yeremia kukanamo, iaminne allonNa Karaeng Allata’ala Kaminang Tinggia siagang Kaminang Koasaya; ri anjo alloa Napa’balassi sikontu musu-musunNa. Pa’danNa bassoroki angnganre tau siagang angnginung cera’. Anne alloa Batara Kaminang Koasaya, Nasamballei koro’bang-koro’banga wara’, ri anjo birinna Binanga Efrat.
11 He pandudu’na Mesir, a’lampako mange ri Gilead a’boya pa’balle! Mingka manna nakamma, tena nulanggappa pa’balle akkullea ampamolleko.
12 Katallassannu appakasirika, niassemmi ri bansa-bansaya. Sa’ra ammarrannu nilangngere’mi ri sikontu linoa. Tantara se’rea tatto’roi ri tantara maraenga; para tu’guruki ke’nanga ta’bentang naung ri buttaya.
13 Ri wattunna Nebukadnezar karaeng Babel battui ambunduki Mesir, a’bicarai Batara ri nakke, nakana,
14 "Yeremia, pa’la’bangi nupau anne kabaraka mae ri kota-kota Mesir, iamintu ri Memfis, Migdol siagang Tahpanhes, angkana, ‘Pasadiai kalennu untu’ attahang, lanri sikontu apa-apa niaka ri kau lanipanraki lalang pa’bundukang!
15 Angngapa nalari anjo Apis rewatanu makassaka? Lanri Nibetami ri Batara!’
16 Jai tantaranu latatto’ro siagang tu’guru’. Nakana ke’nanga massing para ia, ‘Umba kimmotere’ mange ri bansata sollanna kikkulle ta’lappasa’ battu ri bahayana pa’danna musua.’
17 Saremi areng beru karaeng Mesir, iamintu: ‘I tulompo bicara appalaloa kasampatang.’
18 INakke Allata’ala mattallasaka, iNakke Karaeng, Batara Kaminang Koasaya. Rapang Bulu’ Tabor ammenteng kassa’ ri alla’na sikamma buluka, rapang Bulu’ Karmel ammenteng kassa’ ri tompo’na tamparanga, kammami anjo kagassinganna ia battua ambundukiko.
19 Sadia mako pandudu’ Mesir, untu’ nitahang siagang nierang a’lampa! Memfis la’jari loroi — tampa’ sinoa lanri tenamo nipammantangngi.
20 Mesir rapangi ana’ sapi co’mo’, mingka niganggui ri katingalo lompo battu wara’.
21 Ba’lalo sikamma tantara sewana tena pakkullena sanrapang ana’ sapi co’mo’ dudua. Takkulleai ke’nanga attahang. Kabusu’na a’gilingi nampa lari sollanna salama’. Battumi allonna ke’nanga lanihukkung; narapi’mi wattunna ke’nanga nituju ri bala.
22 Larimi Mesir akkassu rapang ulara’, lanri pila’ a’reppese’mi musua. A’bakkami ke’nanga ambunduki siagang pangkulu’ rapang tau anna’banga poko’ kayu
23 siagang ambattasaki romang lompo tenaya nakkulle nipantamakki. Tantara musua takkulleai nibilang siapa jaina, la’bi jaiangngangi nakatimbanga. INakke, Batara anne akkana.
24 Pandudu’na Mesir laKupakasiriki, lanri nibetai ri bansa battu waraka. INakke, Batara, anne akkana."
25 Batara Kaminang Koasaya, iamintu Allata’alana Israel, Nakana, "LaKuhukkungi Amon, rewata battua ri Tebe, siagang sikontu Mesir kammayatompa rewata-rewatana siagang sikamma karaenna. Karaeng Mesir siagang sikontu tau ampattoangai
26 laKupassareangi mae ri Nebukadnezar karaeng Babel siagang tantarana eroka ambunoi ke’nanga. Mingka sallang, lanipammantangngi ammotere’ Mesir sangkamma riolo. INakke, Batara, anne akkana."
27 "UmmakKu, Israel, teako mallakki! AtangKu Yakub, teako annekkereki! Ikau siagang jari-jarinu laKupasalamakko battu ri pa’rasangang bella, ri tampa’nu nitahang. Lammoterekko nummantang ri pa’rasangannu siagang amang. Lattallasakko siagang sannang; tena parallu nukamallakkang.
28 Jari teako mallakki, he ummakKu, labattuA’ untu’ ampasalamakko. Bansa-bansa, tampa’nu Kupasiara’, laKupanraki kabusuki, mingka ikau tena Kupakammako. Memang, tena nulata’lappasa’ battu ri hukkungang mingka hukkungangKu mae ri kau adeleki situru’ katantuanga. INakke, Batara, anne akkana."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA