Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 PANGERAN makon sengko’ manapa’ dhabuna se kantha reya ka ra’yat, "Kottha reya bi’ Sengko’ ebagiya ka tantara Babil, ban tantara Babil bakal makala’a kottha reya. Pa’-sapa’a se badha e dhalem kottha bakal mateya e dhalem paperrangan, otabana polana kalaparan otabana wabah panyaket. Tape pa’-sapa’a se kalowar ban massra’agi aba’na ka oreng Babil, ta’ kera epate’e; nyabana bakal salamedda." Sefaca ana’na Matan, Gedalya ana’na Pasyhur, Yukhal ana’na Selemiya, ban Pasyhur ana’na Malkiya, ngedhing sabarang se ekoca’agi Sengko’ jareya.
2 (38:1)
3 (38:1)
4 Daddi ja-pangraja jareya entar ka rato pas ngoca’ kantha reya, "Oreng ka’dhinto kodu eokom mate. Sabab, kalaban ngoca’ kadi ka’dhissa’ oreng ka’dhinto makene’ samangattepon parjurit sareng oreng laen se gi’ badha’ e kottha ka’dhinto. Oreng ka’dhinto macalaka’ ra’yat, banne nolonge ra’yat."
5 Rato Zedekiya nyaot, "Iya! Epabaramma’a bai bi’ ba’na, sokana; sengko’ ta’ ngalanga."
6 Sengko’ pas egiba bi’ reng-oreng jareya, etale’e sarta pas epatoron ka dhalem somor andhi’na Malkiya pottrana rato, somor jareya badha e palataranna karaton. E dhalemmanna tadha’ aengnga, badha pera’ cellot, ban sengko’ pas nyellet ka dhalem cellot jareya.
7 E bakto jareya badha oreng Sudan kasorang se alako e karatonna rato. Nyamana Ebed-Melekh. Oreng jareya ngedhing ja’ sengko’ epamaso’ ka dhalem somor jareya. E baktona rato mimpin rapat e Labang Saketheng Benyamin,
8 Ebed-Melekh entar ka jadhiya pas mator ka rato,
9 "Guste, lalakonnepon reng-oreng ka’dhissa’ ta’ sae. Nabbi Yeremiya epamaso’ ka dhalem somor sareng reng-oreng ka’dhissa’; tanto nabbi ka’dhissa’ mate kalaparan, sabab e kottha ka’dhinto ampon tadha’ kareepon teddha’an."
10 Rato pas marenta’agi Ebed-Melekh, dhabuna, "Kassa’ ngeba oreng katello, Yeremiya pas pakalowar dhari somor jareya sabellunna mate."
11 Daddi Ebed-Melekh entar ka gudhangnga karaton abareng oreng se katello jareya, pas ngala’ en-kaen se laju dhari kennengngan jareya; en-kaen jareya pas epatoron ngangguy tale ka sengko’ e dhalem somor.
12 Bi’ Ebed-Melekh sengko’ esoro masang en-kaen jareya e tang kalemongan menangka langgan, sopaja sengko’ ta’ arassa’a sake’ polana talena. Daddi sengko’ atoro’ parentana Ebed-Melekh.
13 Sengko’ pas etaja’ ka attas epakalowar dhari somor bi’ reng-oreng jareya. Saellana jareya sengko’ etahan e palataranna karaton jareya.
14 E laen bakto, Rato Zedekiya makon oreng ngeba sengko’ ngadhep ka salerana e labang saketheng se kapeng tello’ e Padalemman Socce. Dhabuna rato jareya ka sengko’, "Kaula atanya’a ka sampeyan, ban sampeyan kodu ajawab sabendherra. Ja’ leng-ngaleng."
15 Sengko’ nyaot, "Manabi abdidalem mator salerressa, tanto abdidalem eokom mate sareng junandalem; sarengngan, manabi abdidalem ngatore babala’an, tanto ta’ etoro’ sareng junandalem."
16 Kalaban tek-ngetek Rato Zedekiya ajanji ka sengko’, dhabuna, "Bit asmana Allah se odhi’, Allah se apareng odhi’ ka kaula ban ka sampeyan, kaula asompa bi’ kaula sampeyan ta’ epateyana ban ta’ epassra’agiya ka reng-oreng se amaksod mateyana sampeyan."
17 Sengko’ pas abala ka rato jareya ja’ PANGERAN Se Mahakobasa, Allah se esemba oreng Isra’il, adhabu kantha reya, "Mon ba’na atellok ka ja-pangrajana rato Babil, ba’na ta’ kera epate’e, ban kottha reya ta’ kera eobbar. Ba’na sabala bakal salamedda.
18 Tape mon ba’na ta’ endha’ atellok, kottha reya bakal erebbu’a oreng Babil. Bi’ reng-oreng Babil kottha reya bakal eobbara sampe’ tadha’ karena, ban ba’na dibi’ ta’ kera lopot keya."
19 Rato nyaot, "Kaula tako’ ka bangsa kaula se ampon buru ka oreng Babil. Dhaggi’ kaula pas epassra’agi ka reng-oreng ganeka pas eseksa."
20 "Bunten," ca’na sengko’, "Junandalem ta’ kera epassra’agi ka reng-oreng gapaneka. Abdidalem nyo’ona sopaja junandalem atoro’ ka dhabuna PANGERAN; dhaggi’ sadajana tanto sae, junandalem ta’ kera epate’e.
21 Namong manabi junandalem ta’ poron atellok, PANGERAN ampon noduwagi ka abdidalem ponapa se bakal kadaddiyana.
22 Sareng Pangeran abdidalem epanengale sadajana babine’an se gi’ badha e karaton Yehuda eeret kalowar ebakta ka ja-pangrajana rato Babil. Sambi ajalan, reng-oreng gapaneka ngoca’ kadi paneka, ‘Rato eco-koco bat-sobadda, ban ekobasae reng-oreng jareya. Sateya, saellana sokona tacellet ka cellot, reng-oreng jareya kabbi padha ondur.’"
23 Sengko’ pas ngoca’ pole, "Sadajana pottra sareng rajiepon junandalem bakal ebakta’a ka adha’epon oreng Babil. Junandalem dibi’ ta’ kera lopot dhari oreng Babil gapaneka. Junandalem bakal etangkebba sareng rato Babil, sarengngan pole kottha ka’dhinto bakal eobbara kantos tadha’ karena."
24 Zedekiya pas adhabu, "Sadaja se ekacaca kaula sareng sampeyan paneka ja’ la-bala ka oreng, me’ olle nyabana sampeyan ta’ ngadhebbi babaja.
25 Manabi ja-pangraja ngedhing ja’ kaula acaca sareng sampeyan, tanto reng-oreng ganeka entar ka sampeyan pas atanya ponapa se ekacaca kaula sareng sampeyan. Reng-oreng ganeka tanto ajanji sampeyan ta’ epateyana mon sampeyan abala sabendherra ka reng-oreng ganeka.
26 Kabala saos ja’ sampeyan nyacae kaula sopaja sampeyan ta’ epamaso’ ka penjara pole sampe’ seda e ka’issa’."
27 Ta’ abit saellana jareya ja-pangraja jareya padha entar ka sengko’, pas padha atanya. Ka reng-oreng jareya sengko’ abala akantha se la edhabuwagi rato ka sengko’. Reng-oreng jareya ta’ bisa apa-rapa sabab tadha’ oreng se tao apa se ekacaca sengko’ ban rato.
28 Sengko’ paggun etahan e palataranna karaton sampe’ e are baktona Yerusalim erebbu’ moso.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA