Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ E settong bakto saellana Yoyakhin pottrana Yoyakim rato Yehuda ban para pangrajana pamarenta Yehuda, para tokang ban para panglako se ahli egiba dhari Yerusalim ka Babil egabay tawanan bi’ Nebukadnezar, rato Babil, PANGERAN apareng pangaton ka sengko’. Sengko’ epanangale’e budhak dhadhuwa’ aesse buwana ara se esaba’ e adha’na Padalemman Socce.

² Budhak se settong aesse buwana ara se gus-bagus, buwa se epolong dha’-adha’; dineng budhak settonganna aesse buwana ara se co’-bucco’, sampe’ ta’ ekenneng kakan.

³ PANGERAN laju adhabu ka sengko’, "Yeremiya, apa se etangale’e ba’na jareya?" Sengko’ nyaot, "Buwana ara, GUSTE. Se e-sae ce’ saena, se co’-bucco’ ce’ bucco’na kantos ta’ ekenneng teddha."

⁴ Daddi PANGERAN adhabu ka sengko’,

⁵ "Sengko’, PANGERAN, Allahna Isra’il, nganggep reng-oreng se egiba ka Babil rowa akantha buwana ara se bagus jareya, daddi Sengko’ becce’a ka reng-oreng jareya.

⁶ Bi’ Sengko’ reng-oreng jareya ejaga’a ban egiba’a abali ka nagara reya. Bi’ Sengko’ reng-oreng jareya epajaga’a, ta’ eparobbuwa, etamenna, banne edabu’a.

⁷ Bi’ Sengko’ epaterrowa ngarteya ja’ Sengko’ reya PANGERAN. Daddi reng-oreng jareya bakal daddiya Tang ommat, ban Sengko’ daddiya Allahna, sabab reng-oreng jareya abaliya ka Sengko’ kalaban gu-onggu ate.

⁸ Tape Zedekiya rato Yehuda ban ja-pangraja se semma’ ka aba’na, ban karena oreng Yerusalim se gi’ badha e nagara reya otabana se ngalle ka Messer, bi’ Sengko’ kabbi epakantha’a buwana ara se co’-bucco’ se ta’ ekenneng kakan rowa. Sengko’, PANGERAN, la ngoca’.

⁹ Bi’ Sengko’ reng-oreng jareya epacalaka’a ce’ berra’na sampe’ sa-bangsa e dunnya padha’a katako’an kabbi. E dhimma’a bai e kennengnganna reng-oreng jareya epabalessadan bi’ Sengko’, reng-oreng jareya bakal eya-seya oreng, ekala’-gella’ ban eco-koco; nyamana bakal egabaya babaston.

¹⁰ Reng-oreng jareya bi’ Sengko’ epadhatengngana paperrangan, kalaparan ban wabah panyaket sampe’ reng-oreng jareya kabbi padha’a mate ban tadha’ karena e nagara reya se bi’ Sengko’ la ebagi ka reng-oreng jareya ban ka bangatowana."

Yeremia

Video Yeremia 24

Ikuti Kami:

KONTAK | PARTISIPASI | DONASI