Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Manabi abdidalem aparkara sareng Junandalem, GUSTE, tanto Junandalem kabukte lerres. Namong abdidalem terro jugan atanya’a ka Junandalem parkara kaadilan: Aponapa oreng jahat me’ ma’mor? Aponapa me’ oreng se ta’ jujur se la’-mala’ ahasel?
2 Reng-oreng gapaneka sareng Junandalem etamen epakadi bu-tombuwan, kantos aramo’, tombu, sareng abuwa. Reng-oreng gapaneka ros-terrosan acaca se sae parkara Junandalem, namong e dhalem atena sanyatana ta’ parduli ka Junandalem.
3 Namong Junandalem, GUSTE, Junandalem ngagali ka abdidalem, Junandalem ngagali ponapa se elakone abdidalem, sareng ngagali kadi ponapa parasa’an abdidalem ka Junandalem. Giring reng-oreng jahat gapaneka kalowar, bakta ka pajagalan pakadi dumba; jaga pakantos napa’ baktona se esambelliya.
4 Kantos bilaepon nagara ka’dhinto se gi’ pagguna kerreng, sareng rebbana e teggal paggun elop? Mano’ sareng keban laenna mate lantaran kajahadanna bangsa abdidalem, bangsa se ngoca’, "Allah ta’ kera ngoladi ka tengkana sengko’ ban ba’na."
5 PANGERAN adhabu, "Yeremiya, mon ba’na la lesso abalaban ban manossa, baramma se bisa’a ba’na abalaban ban jaran? Mon e tana se aman ba’na katako’an, baramma’a ba’na mon badha e alas e penggirra Songay Yordan?
6 Ba’na ekiyanadi la’-mala’ bi’ la-balana ba’na dibi’, se padha noro’ nyerrang ba’na kabbi. Ja’ parcaja ka reng-oreng jareya, maske cacana manes."
7 PANGERAN adhabu, "Tang kennengngan bi’ Sengko’ la ta’ eparduli, Tang nagara bi’ Sengko’ la eonduri, ban ommat Tang kakase bi’ Sengko’ la epassra’agi ka tanangnga so-mosona.
8 Ommat Tang peleyan alaban ka Sengko’; akantha macan e alas reng-oreng jareya agaung ka Sengko’. Daddi Sengko’ baji’ ka reng-oreng jareya.
9 Reng-oreng jareya akantha mano’ se eserrang ellang dhari kangan kacer, dhari adha’ budhi. Olok sakabbinna burun alas me’ olle noro’ matadha’ reng-oreng jareya.
10 Bannya’ pangobasa manca marosak Tang kebbun anggur ban nyek-ngenyek Tang gal-teggal. Tang nagara se bagus bi’ reng-oreng jareya eoba epadaddi ra-ara se seppe.
11 Ongguwan, Sengko’ nangale’e Tang nagara epadaddi kennengngan se seppe se mangennes ate; kabbi ta’ karabat, tadha’ se ngoros.
12 Dhari penggirra sagara beddhi e pagunongan reng-oreng dhateng arampoga. Sengko’ madhateng paperrangan maancora saantero nagara, sampe’ tadha’ oreng settonga se bisa odhi’ taremtem.
13 Tang ommat nabur bigina gandum, tape se epolong dhuri; alako berra’ tape tadha’ ollena pa-apa. Sengko’ talebat peggella daddi men-tamennanna tadha’ hasella."
14 PANGERAN adhabu, "Reya’ Tang pessen ka ra-nagara tatanggana Isra’il se marosak nagara se bi’ Sengko’ la ebagi ka Tang ommat Isra’il. Reng-oreng jahat rowa bi’ Sengko’ epakalowara dhari ra-nagarana, epakantha’a men-tamennan se edabu’ dhari tana, ban Yehuda bi’ Sengko’ epaburuwa dhari pergemmanna tanangnga reng-oreng jareya.
15 Tape saellana epakalowar, bi’ Sengko’ reng-oreng jareya ekaneserrana pole; saneyap bangsa bi’ Sengko’ egiba’a abali ka nagarana dibi’.
16 Mon reng-oreng jareya kalaban gu-onggu ate endha’ narema agamana Tang ommat ban endha’ asompa kalaban, ‘Bit asmana ngoca’ ALLAH se odhi’,’ — akantha lamba’na mon reng-oreng jareya ngajari Tang ommat asompa bit nyamana Ba’al — reng-oreng jareya bi’ Sengko’ epamaso’a bagiyanna Tang ommat keya ban epama’mora.
17 Tape bangsa se ta’ endha’ atoro’ ka Sengko’, bi’ Sengko’ edabu’a epakantha’a men-tamennan ban epatompessa tadha’ karena. Sengko’, PANGERAN, la ngoca’."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA