Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E settong are Abimelekh pottrana Gideyon meyos ka Sikhem kennengnganna la-balana ebuna. E jadhiya Abimelekh adhabu ka la-balana ebuna jareya,
2 "Mangken tanya’agi ka sadajana pandhudhu’ Sikhem, ka’dhimma se langkong sae: Eparenta pottrana Gideyon se pettong polo oreng, otabana sareng oreng kasorang saos? Paemottagi jugan ja’ kaula gi’ balana reng-oreng gapaneka."
3 Daddi la-balana ebuna Abimelekh jareya entar ka reng-oreng Sikhem pas manapa’ sen-pessen jareya. Reng-oreng Sikhem pas motose noro’a Abimelekh, sabab Abimelekh gi’ tamaso’ balana dibi’.
4 Reng-oreng jareya pas ngala’ pesse salaka pettong polo meggi’ dhari bengko se ekagabay kennengnganna pamojja’anna ka Ba’al-Berit, sarta pas eatorragi ka Abimelekh. Pesse jareya bi’ Abimelekh epangopa reng-oreng jahat, eajak ngereng salerana,
5 saellana jareya Abimelekh pas meyos ka kampongnga eppa’na e Ofra. Neng e jadhiya tan-taretanna se pettong polo oreng rowa epate’e kabbi e attassa settong bato. Tape Yotam, pottra bungsona Gideyon, ta’ tanoro’ epate’e sabab ngetek.
6 Pandhudhu’ Sikhem ban Bet-Milo kabbi pas padha akompol, entar ka bungkana kajuwan karamat se badha e Sikhem. E jadhiya Abimelekh epadaddi rato bi’ reng-oreng Sikhem.
7 Saellana Yotam meyarsa parkara jareya, pas meyos ka konco’na Gunong Gerizim, sarta pas aera’ ka reng-oreng jareya, "Edhingngagi sengko’, reng-oreng Sikhem, sopaja ba’na epeyarsa’agi keya bi’ Allah!
8 E settong bakto ka’-bungka’an akompol parlo meleya ratona. Oca’na ka’-bungka’an jareya ka bungkana jaitun, ‘Ngereng panjennengngan daddi ratona ka’-bungka’an ka’dhinto.’
9 Saodda bungkana jaitun, ‘Enja’ sengko’ ta’ endha’, sabab mon sengko’ daddi ratona ba’na, sengko’ masthe ambu ngasellagi mennya’ se eangguy ngormat ba-diba sarta manossa.’
10 Ka’-bungka’an jareya pas ngoca’ ka bungkana ara, ‘Panjennengngan saos daddi ratona ka’-bungka’an ka’dhinto.’
11 Tape bungkana ara jareya nyaot, ‘Enja’, sengko’ ta’ endha’, sabab mon sengko’ daddi ratona ba’na tanto sengko’ ta’ ngenneng ngasellagi buwana ara se nes-manes pole.’
12 Saellana jareya, ka’-bungka’an gella’ ngoca’ ka bungkana anggur, ‘Panjennengngan saos daddi ratona ka’-bungka’an ka’dhinto.’
13 Tape bungkana anggur jareya nyaot, ‘Masa’ sengko’ ambuwa ngasellagi aeng anggur se ekadujane ba-diba ban manossa?’
14 Daddi ka’-bungka’an jareya kabbi ngoca’ ka but-ombut se bannya’ dhurina, ‘Manabi saka’dhinto, panjennengngan saos daddi ratona ka’-bungka’an ka’dhinto.’
15 Saodda ombut se bannya’ dhurina jareya, ‘Mon ba’na pajat terro meleya sengko’ epadaddiya ratona ba’na, mara ba’na kabbi padha ngaop e baba’anna sengko’. Mon ba’na ta’ endha’, dhari tang ka-cangka se adhuri reya bakal kalowara apoy se makatonona sakabbinna bungkana comara e Libanon.’"
16 "Daddi," Yotam nerrossagi dhabuna, "apa ba’na se mele Abimelekh epadaddi ratona ba’na jareya, atena ehlas onggu? Apa ba’na la ngalakone barang se patot ka Gideyon, tang eppa’, ban ka la-balana? Apa ba’na la males kabecce’anna tang eppa’
17 se la abillai ba’na? Kaenga’e, ra, tang eppa’ la abandha nyabana kaangguy mabebasa ba’na dhari kakobasa’anna bangsa Midian.
18 Tape sateya ba’na akiyanat ka la-balana tang eppa’. Tra-pottrana bi’ ba’na epate’e kabbi, pettong polo oreng sakaleyan e attassa bato settong. Abimelekh reya pottrana eppa’ ollena ban dunorra. Tape bi’ ba’na epadaddi rato, pera’ polana Abimelekh jareya gi’ balana ba’na.
19 Sateya, mon se ejalannagi ba’na ka tang eppa’ ban la-balana jareya pajat ejalannagi kalaban ate se ehlas, ba’na olle neng-sennengngan ban Abimelekh, ban Abimelekh me’ olle neng-sennengngan ban ba’na.
20 Tape mon enja’, mandar dhari Abimelekh kalowara apoy se makatonona sakabbinna pandhudhu’ Sikhem ban Bet-Milo sampe’ tompes kabbi. Ban mandar dhari pandhudhu’ Sikhem ban Bet-Milo kalowara apoy se makatonona Abimelekh sampe’ tompes keya."
21 Saellana jareya Yotam buru ka Be’er sarta pas enneng e jadhiya, sabab tako’ ka Abimelekh, taretanna jareya.
22 Tello taon abidda Abimelekh marenta Isra’il.
23 Bi’ Allah oreng Sikhem ban Abimelekh epamosowan, daddi reng-oreng Sikhem aberonta’.
24 Kan molana badha kadaddiyan se kantha jareya sopaja Abimelekh ban reng-oreng se nas-manase sampe’ Abimelekh mate’e pottrana Gideyon se pettong polo oreng rowa padha’a narema babalessa kajahadanna.
25 Reng-oreng Sikhem jareya nyaba’ reng-oreng se epangaddhang e co’-konco’na nong-gunong epamega’a Abimelekh. Saneyap oreng se lebat e jadhiya ebigal bi’ reng-oreng se ngaddhang jalan jareya. Parkara jareya bi’ reng-oreng Isra’il ekabala ka Abimelekh.
26 E bakto jareya Ga’al ana’na Ebed la dhateng abareng ban tan-taretanna padha ennengnga e Sikhem; reng-oreng Sikhem parcaja ka Ga’al jareya.
27 Ga’al ban tan-taretanna jareya entar molong anggur e bun-kebbun anggur, agabay nom-enoman aeng anggur, laju padha apesta. Kabbi padha kan-ngakan ban nom-ngenom e kennengnganna pamojja’anna dibana sambi mesowe Abimelekh.
28 "Sapa sengko’ ban ba’na reya me’ daddi ngabdiya ka Abimelekh?" oca’na Ga’al. "Sapa Abimelekh jareya sabendherra? Ana’na Gideyon! Gideyon se ban bakkella se anyama Zebul padha daddi kabulana Hemor, eppa’na Sikhem, bangatowana sengko’ ban ba’na!
29 Ja’ sakenga sengko’ se mimpin reng-oreng Sikhem reya, tanto Abimelekh reya epatompes bi’ sengko’! Bi’ sengko’ ekoca’a kantha reya, ‘Mara dha’ enna’! Pakalowar tantarana kabbi, mara ja’ aperranga!’"
30 Zebul, se neggu’ kakobasa’an e kottha Sikhem, peggel e bakto ngedhing oca’na Ga’al jareya.
31 Zebul pas ngerem otosan ka Abimelekh e Aruma. Otosan jareya esoro manapa’ pessen kantha reya, "Ga’al ana’na Ebed sareng tan-taretanna dhateng ka Sikhem nas-manase oreng Sikhem eajak alaban ka junandalem.
32 Daddi, junandalem sareng reng-orengnga dhaggi’ lem-malem kodu ngetek e gal-teggal.
33 Lagguepon gu-laggu saamponna moncar are, serrang kottha ka’dhinto dak-dadak. Manabi Ga’al sareng reng-orengnga kalowar alabana ka junandalem, ka’dhinto kasempadan ka junandalem; pokol saos!"
34 Daddi Abimelekh ban reng-orengnga maju e baja malem. Se maju apencar epadaddi pa’ pasukan sarta laju padha ngetek e sakalenglengnga kottha Sikhem.
35 E bakto Ga’al kalowar ban manjeng e labang sakethengnga kottha, Abimelekh ban ra’yat se ngereng pas padha kalowar dhari pangetegganna.
36 Ga’al nangale’e reng-oreng jareya, laju ngoca’ ka Zebul, "Oladi, ka’issa’ badha reng-oreng toron ka ka’dhinto’ dhari konco’na nong-gunong!" "Jareya banne oreng," saodda Zebul, "jareya jang-bajangan e gunong."
37 Ga’al laju ngoca’ pole, "Lerres! Badha oreng padha toron dhari erengnga gunong, jugan badha pole se padha ajalan ka ka’dhinto’ dhari kennengnganna bungkana terpentin karamat ka’issa’!"
38 Dhabuna Zebul ka Ga’al, "E dhimma sateya colo’na ba’na se raja rowa? Sabbanna ba’na ngoca’ arapa’a me’ ngabdiya ka Abimelekh rowa? Areya’ reng-oreng se eya-seya ba’na jareya. Mara sateya ba’na maju nyerrang reng-oreng jareya!"
39 Ga’al laju kalowar ngeba reng-oreng Sikhem ngadhebbi Abimelekh.
40 Tape Abimelekh nyerrang sampe’ Ga’al buru. Bannya’ kurban se gaggar sampe’ gan adha’na labang sakethengnga kottha.
41 Dhi-budhina Abimelekh abali ka Aruma, pas neptep e jadhiya. Zebul ngojuk Ga’al ban tan-taretanna dhari Sikhem, daddi reng-oreng jareya pas ta’ ngenneng neng e jadhiya pole.
42 Kalagguwanna reng-oreng Sikhem molae kalowar dhari kottha, entara ka teggal; Abimelekh narema reppodan parkara jareya.
43 Abimelekh laju makompol reng-orengnga, se pas ebagi epadaddi tello pasukan, kabbi padha ngetek e gal-teggal. E bakto ngoladi oreng kottha jareya ajalan ka teggal, Abimelekh laju kalowar dhari pangetegganna; oreng Sikhem jareya laju padha epate’e.
44 Sabatara Abimelekh ban pasukanna duli maju nyerrang labang sakethengnga kottha, pasukan laenna se dhadhuwa’ nyerser ban mate’e reng-oreng se buru ka gal-teggal.
45 Abimelekh terros aperrang saare benteng sarta ngobasane kottha jareya; pandhudhu’ kottha jareya epate’e, kotthana epaancor sarta pas etaburi buja.
46 E bakto reng-oreng se badha e dhalem binteng Sikhem ngedhing parkara jareya, kabbi laju padha maso’ ka dhalem lobang e babana candhi El-Berit nyare salamet.
47 Reng-oreng laju areppot ka Abimelekh ja’ reng-oreng e binteng Sikhem jareya la akompol e jadhiya kabbi.
48 Daddi Abimelekh ban ra’yadda se ngereng padha ongga ka Gunong Zalmon. E jadhiya salerana mondhut kapak pas ngetthok ranca’na kajuwan, laju epekol e bauna. Ra’yadda se ngereng laju padha epakon ngalakone kantha jareya keya.
49 Daddi kabbi padha ngetthok ranca’na kajuwan, pas padha ajalan noro’ bunte’ Abimelekh. Ca’-ranca’na kajuwan jareya laju etombuk e konco’na lobangnga candhi gella’, saellana pas eobbar, sabatara reng-oreng Sikhem gi’ badha e dhalemma lobang jareya. Daddi oreng kottha Sikhem padha mate kabbi, bannya’na ra-kera saebu oreng lalake’an ban babine’an.
50 Saellana jareya Abimelekh meyos ka Tebes. Kottha jareya ekeppong sarta laju ekobasae.
51 E nga’-tengnga’anna kottha jareya badha manara se koko. Oreng kottha jareya padha buru ka jadhiya. Reng-oreng jareya maso’ ka dhalem manara jareya. Labangnga ekonci, ban reng-oreng jareya laju ongga ka attas.
52 Saellana jareya Abimelekh napa’ ka jadhiya, nyerrangnga manara buru. E bakto napa’ ka labangnga manara jareya, se sajjana eobbara,
53 pas badha oreng bine’ magaggar bato pagilingan, teppa’ ka serana sampe’ serana tennar.
54 Abimelekh duli adikane oreng ngodha se teppa’na mekol sanjatana pas adhabu, "Mara onos peddhangnga ba’na, pate’e sengko’; sengko’ ta’ endha’ mon ekoca’ oreng ja’ sengko’ reya epate’e oreng bine’." Daddi oreng ngodha jareya nyocowagi peddhangnga ka Abimelekh sampe’ seda.
55 E bakto reng-oreng Isra’il nangale’e ja’ Abimelekh la seda, kabbi padha mole.
56 Kantha jareya carana Allah males kajahadanna Abimelekh ka eppa’na, e bakto salerana mate’e tan-taretanna se bannya’na pettong polo oreng.
57 Ban Allah ngokom keya reng-oreng Sikhem lantaran kajahadanna. Jareya cocok ban se edhabuwagi Yotam pottrana Gideyon parkara Abimelekh ban reng-oreng Sikhem e bakto Yotam jareya abasto reng-oreng jareya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA