Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Abimelek anak Gideon lawes ku Sikem, i ja ringan kerina kade-kade nandena. Ikatakenna man keluarga nandena e
2 gelah isungkunna kalak Sikem, "Apai kam pangen iperentah anak-anak Gideon si pitu puluh kalak asangken iperentah si sekalak? Ingetlah maka Abimelek eme dareh dagingndu."
3 Isingetken kade-kade nande Abimelek si enda man kalak kuta Sikem i bas gelar Abimelek, emaka iputusken kalak kuta Sikem ngikutken Abimelek erkiteken Abimelek kade-kadema.
4 Ibereken kalak enda pitu puluh duit pirak i bas rumah pertoton Baal-Perpadanen nari,janah alu duit e iupahina kalak gutul-gutul si la terpake nemani ia.
5 Lawes ia ku rumah bapana i Opra, janah i jah i babo sada batu ibunuhina pitu puluhna, seninana, anak Gideon. Tapi Jotam, anak Gideon si nguda cebuni, emaka la ia ibunuh.
6 Kenca bage kerina kalak Sikem ras Betmilo pulung ras-ras, emaka lawes ia ku batang kecing i Sikem. I je itangkuhkenna Abimelek jadi raja.
7 Kenca nggo ibegi Jotam kerna si e, lawes ia, tedis i das Uruk Gerisim janah erlebuh man kalak ndai, "Begikenlah aku, o kalak Sikem, maka ibegiken Dibata kam!
8 Sekali jadi, pulung kerina batang kayu milih rajana. Nina man batang saitun, 'Kamlah jadi raja kami.'
9 Erjabap batang saitun ndai nina, 'Adi jadi rajandu, arus kungadiken mereken minakku, si ipergunaken pehaga dibata-dibata ras manusia.'
10 Emaka nina batang kayu e kerina man batang ara, 'Mari, kam me jadi raja kami.'
11 Tapi nina batang ara njabapsa, 'Adi jadi rajandu, arus kungadiken erbuah si entebu.'
12 Kenca bage nina batang-batang kayu e man batang anggur, 'Mari kam jadi raja kami.'
13 Tapi nina batang anggur njabapsa, 'Adi jadi rajandu, arus aku ngadi mereken lau anggurku si erbahan meriah ukur dibata-dibata ras manusia.'
14 Erdandanken si e nina batang kayu e kerina man rambah duri, 'Mari, kamlah jadi raja kami.'
15 Nina batang duri njabapsa, 'Adi tuhu kin atendu aku jadi rajandu, mari dage cilinggem i teruhku. Adi la kam nggit, ndarat api i bas dahan-dahanku si erduri nari janah itutungna batang aras Libanon.'"
16 "Emaka genduari" nina Jotam nerusken cakapna, "Tuhu-tuhu kal kin bujur ras pinter ukurndu sanga ibahanndu Abimelek jadi raja? Ihamatindu kin Gideon janah patut kin perbahanenndu man keluargana, nginget perbahanenna si mehuli e?
17 Ingetlah maka bapangku erperang guna kam. Iasamkenna kesahna mulahi kam i bas bangsa Midian nari.
18 Tapi genduari nggo erkusur ukurndu ilawanndu keluarga bapangku. Ibunuhndu anakna pitu puluh kalak i babo sada batu, janah erkiteken Abimelek, anak gundik bapangku, keluargandu, ibahanndu ia jadi raja Sikem.
19 Emaka genduari, adi bujur ras pinter kin perbahanenndu man Gideon ras man keluargana, meriahlah ukurndu ras Abimelek dingen meriahlah akapna ras kam.
20 Tapi adi lang ndaratlah api i bas Abimelek nari maka itutungna kalak Sikem ras Betmilo. Ndaratlah api i bas kalak Sikem ras Betmilo nari, janah itutungna Abimelek."
21 Erkiteken mbiar Jotam man seninana Abimelek kiam ia janah lawes ia ringan i Beer.
22 Telu tahun dekahna Abimelek merentah Israel.
23 Kenca bage ibahan Dibata maka si musuhen ia ras kalak kuta Sikem. Berontak kalak e ngelawan Abimelek.
24 Enda jadi gelah kejahaten Abimelek ras kalak Sikem si ngajuk ia munuh anak dilaki Gideon si pitu puluh kalak e ibalasken man bana.
25 Itamaken kalak Sikem kalak si nggempangi Abimelek i das uruk-uruk e, janah irampokina kasa kai si mentas arah e. Kedungenna berita kerna si enda seh man Abimelek.
26 Kenca bage reh Gaal, anak Ebet, ku Sikem ras senina-seninana janah erkusur ka ukur kalak Sikem man bana.
27 Kerina ia lawes ku kebun anggurna sekalak-sekalak janah iperanina, ibahanna lau anggur, emaka erpesta ia kerina. Bengket ia ku bas inganna nembah man dewa, jenari man minem ia i je janahna numpah-numpahi Abimelek.
28 Nina Gaal, "Jelma si uga kin kita kalak Sikem enda? Ngkai maka sitami-tami Abimelek? Ise kin ia? Anak Gideon! Wakilna si Sebul! Tapi ngkai maka arus sitami-tami ia? Ikutkenlah ninindu Hamor si nggo majekken terpukndu!
29 Bicara aku siminpin bangsa enda tentu minter kuambengken Abimelek. Ningku man bana, 'Pepulung tenterandu. Ndaratken gelah kita erperang!'"
30 Sebul si merentah kota e, keke nembehna kenca ibegina kai si ikataken Gaal.
31 Isuruhna piga-piga kalak persuruhen ndahi Abimelek i Aruma alu tenah, "Gaal anak Ebet ras senina-seninana nggo reh ku Sikem, janah la atena iberena kam bengket ku kota enda.
32 Emaka, kam ras anak buahndu arus lawes berngi enda jenari cebuni i mbalmbal.
33 Pepagi erpagi-pagi kenca nggo pultak matawari, keke kam, rempet serang kota e. Jenari adi Gaal ras teman-temanna ndarat ngelawan kam, seranglah ia asa gegehndu."
34 Emaka berkat Abimelek ras anak buahna berngi-berngi, janah cebuni ia i darat Sikem i bas empat terpuk.
35 Sanga Abimelek ras anak buahna ngidah Gaal ndarat janah tedis i pintu gerbang kota e, luar ia i bas inganna cebuni nari.
36 Idah Gaal kalak enda emaka nina man Sebul, "Nen adah! Lit nterem jelma nusur i das uruk-uruk ah nari!" "Labo jelma ah," nina Sebul ngaloi. "Awih-awih saja nge ah ngenca i das uruk ah."
37 Nina ka Gaal, "Nen min ah! Lit nterem jelma nusur arah reben-reben ah, janah sada terpuk ah sangana reh i batang kecing pertendung ah nari arah dalan mbelin!"
38 Kenca bage nina Sebul man Gaal, "I ja genduari cakapndu si meganjang e? Kam kap mbarenda kalakna si nungkun, 'Ise kin Abimelek maka arus sitami-tami ia?' Ah kap kalakna si igombangindu mbarenda. Ndaratken, lawan dage."
39 Ipinpin Gaal kalak Sikem ndarat emaka ilawanna Abimelek.
40 Tapi iayaki Abimelek ia, emaka kiam Gaal. Nterem kalak luka aminna i pintu gerbang e denga pe.
41 Ingani Abimelek kuta Aruma, janah ipelawes Sebul si Gaal ras senina-seninana i Sikem nari, emaka lanai banci ia ringan i je.
42 Pepagina ieteh Abimelek maka kalak Sikem ku juma atena.
43 Emaka idilona anak buahna, ibagina telu terpuk, jenari cebuni i juma nggempangisa. Sanga iidahna kalak e reh i kota nari, ndarat ia i bas inganna cebuni nari munuh kalak e.
44 Sanga Abimelek ras terpukna pedas-pedas maju ngkawal pintu gerbang kota, temanna terpuk si dua nari ngelawan ras munuh kerina kalak si i juma.
45 Perang e terus sada wari dekahna. Italuken Abimelek kota e, ibunuhina kalakna, iruntuhkenna janah itamburina tanehna alu sira.
46 Kenca kerina peminpin Sikem i benteng e megi kerna si e, cebuni ia nelamatken bana ku liang-liang rumah pertoton Baal-Perpadanen.
47 Man Abimelek iberitaken maka kalak e cebuni i je.
48 Emaka lawes ia ku das Uruk Salmon ras anak buahna. I jah ibuatna anak buahna gelah pedas-pedas iikutkenna perbahanenna.
49 Emaka tiap kalak nektek sada dahan batang kayu, janah iikutkenna Abimelek. Ipegun-gunna kayu e i duru liang-liang e jenari icilukna si lit i bas, emaka mate kerina. Teremna si i bas benteng e lit kira-kira seribu kalak dilaki ras diberu.
50 Kenca bage lawes Abimelek ngepung kota Tebes, janah talu ibanna kota e.
51 I je lit sada menara si paguh, emaka kerina dilaki ras diberu ras peminpin-peminpinna kiam ku das tarum.
52 Sanga Abimelek seh i je, iserangna atena menara e; emaka ideherina pintuna icilukna atena.
53 Tapi sekalak diberu ndabuhken sada batu penggilingen si galang ku takal Abimelek emaka pecah takalna.
54 Emaka pedas idilona sekalak anak perana si mbaba senjatana janah minter iperentahkenna, "Sintak pedangndu bunuh aku. La ateku bage ikataken kalak diberu si munuh aku." Emaka itebak anak perana e ia, mate.
55 Kenca nggo idah bangsa Israel maka Abimelek nggo mate, mulih ia kerina ku rumah.
56 Alu e Dibata mbalas kejahaten Abimelek si ilakokenna man bapana i bas ia munuh pitu puluh kalak seninana.
57 Dibata pe mbalas kejahaten kalak kuta Sikem, sue ras si ibelasken Jotam anak Gideon asum isumpahina kalak.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA