Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nakana Batara, "Gassingi ammarrang! Pauangi sikamma dosana ummakKu.
2 Tunggala’ alloi anynyomba ke’nanga mae ri Nakke, siagang eroki naasseng erokKu, kamma nicini’ angkana bajiki apa nagaukanga ke’nanga, siagang majarreki mae ri hukkungKu. Nakana ke’nanga angkana sannangi nyawana anynyomba ri Nakke siagang nakellai adele’ hukkungKu."
3 Akkuta’nangi anjo bansaya angkana, "Apa matu-matunta taua appuasa punna tena Naciniki Batara? Apa matu-matunta nipakatuna kalenta punna tena Naparhatikangki’?" Nakanamo Batara, "Sikontutojenna, lalang appuasanu, nuboyami kaparalluang kalennu na nupacco’ sikamma tungnganre gajinu.
4 Lalang appuasanu, assiba’jiko siagang a’geakko, kammayatompa nugaukangi katerassanga. Nukapangi angkanaya lanri apuasanu nakkulle nupagio’ atingKu untu’ ampilangngeri sikamma pappala’ doannu?
5 Punna appuasako, nusessai kalennu; nupadundui ulunnu rapang ruku’ ta’layuka. Akka’rangko kaeng karung nampa nukiori au, nampa attinroko rateanna. Iakaminjo nukanaya appuasa? Nukapangi angkana sannangi nyawaKu ancini’ anjo panggaukang kammaya?
6 Iaminne puasa Kukaerokia: La’gasi sikko’ panjallakkanga siagang battala’na gau’ tenaya naadele’, siagang lappassangi tau nijallakkanga.
7 Bagei kanrenu siagang tau cipuruka, tarimai sikamma tau tenaya balla’na ri balla’nu. Sarei care-care tau assolaraka, siagang teako tollaki sari’battannu punna parallu nitulung.
8 Na lammumbamo singaraka mae ri kau rapang ammumbana alloa, siagang lammollemi linta’ sikamma bokka’nu. LaKururungangko untu’ ampasalamakko. LahaderekKa’ untu’ anjagaiko battu ri tammulilinu.
9 Punna appala’ doangko, laKuturukiangko pappala’nu. Punna akkiokko mae ri Nakke, lappialiA’ mae ri kau. Tea’ mako jallakkangi parannu tau, pammarimi passimusuanga siagang pitinaya.
10 Sarei kanre tau cipuruka siagang tulungi sikamma tau nijallakkanga. Punna nugaukang anjo kammaya, la’jari singara’mi sikamma sassanga ri tammulilinu, rapang singara’na alloa.
11 INakke tuli lampimpingko siagang lampakabassorokko ri butta kalotoroka; iNakke lanjagaiko sollannu tuli akkamale siagang kassa’. Larapangko koko anggannaka ri je’ne’, rapang timbuseng je’ne’ tenaya nale’ba’ a’jari kalotoro’.
12 Kota salloamo rumbanna lanubangungi ammotere’ irate ri pundasi sallona. Lanigallarakko ‘Bansa ambangungai ammotere’ sikamma tembo’ kallika siagang ampakabajikai sikamma balla’ ancuruka.’"
13 Nakana Batara, "Pakalompoi allo Pammari-marianga, a’jari allonNa Batara. Teako urusuki kaparalluang kalennu ri anjo alloa. Pakalompoi anjo alloa a’jari allo mate’ne; pakalompoi anjo allonNa Batara iamintu teako a’lampai; teako anjamai yareka a’bicara tenaya matu-matunna.
14 Na nularannu lanri nugaukanna ibadanu mae ri Nakke. LaKupa’jari tunipakalompoko ri sikontu linoa. Lasannangi tallasa’nu lanri wassele’ tana pisaka battu ri Yakub, boenu. INakke, Batara anne le’ba’ a’bicara."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA