Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nina TUHAN, "Ngeranalah asa gegehndu! Turiken man bangsangKu Israel kerna dosa-dosana.
2 La erguna isembahna aku tep-tep wari, janah ngaku maka mesikel kal ia meteh dalanKu janah ngikutken undang-undangKu. Ikatakenna maka mesikel kal ia Kubereken undang-undang si bujur man bana, janah nina tole meriah kal iakapna rembak ras Aku."
3 Nungkun bangsa e nina, "Kai gunana kam erpuasa adi labo idah TUHAN? Kai gunana kita la man adi labo IperdiatekenNa?" Nina TUHAN man bangsa e, "Situhuna, tupung kam erpuasa keuntungenndu saja nge idaramindu janah si erdahinndu idedehindu.
4 Puasandu e mahanca kam erjengil saja ngenca, rubat dingen ninjui kalak. Akapndu kin arah puasa si bage banci ipaksandu Aku megiken pertotonndu?
5 Asum kam erpuasa isuhsahindu bandu; mungkuk bahanndu takalndu bali ras bulung bero, jenari ikimbangkenndu uis guni ras abu inganndu medem. E kin ikatakenndu puasa? Akapndu kin ngena ateKu perbahanen si bage?
6 Enda kap puasa si ngena ateKu: Osarilah rante pengiket janah agui baban kinibujuren, janah bebaskenlah kalak si idehkendu.
7 Raskenlah panganndu ras kalak si kelihen, janah berelah kalak musil si la lit rumahna kesilang i bas rumahndu. Berelah uis man kalak si la lit uisna, janah ula itulakndu kade-kadendu si mindo penampat.
8 Adi bage perbahanenndu, ersinalsal me lias ateKu i babondu bali ras matawari erpagi-pagi, janah luka-lukandu lampas malem. Aku tetap rembak ras kam lako ngkelini kam, janah sinalsal kemulianKu tetap ngarak-ngarak kam.
9 Adi ertoto kam, Kudengkehken pertotondu, janah adi erlebuh kam, minter Kualoi. Olanai idedehndu kalak, olanai kam megombang, janah olanai belaskenndu kata si la tahu kerna kalak;
10 adi iberendu nakan man kalak si kelihen, janah isampatindu kalak si lit i bas kesusahen, adi bage kegelapen si lit sekelewetndu salih jadi terang seri ras ciger wari.
11 Aku tetap negu-negu kam dingen mesuri kam alu si mehuli. Kubahan kam tetap megegeh ras mejuah-juah. Kam desken peken si la kurang lau, desken sumbul lau si la pernah kerah.
12 Kai si nai nggo runtuh, ipajekken bangsandu ka mulihi i babo palas si nuria. Terberita me kam pagi jadi si mpekena mulihi benteng-benteng e, dingen ngumban rumah si nggo runtuh."
13 Nina TUHAN, "Adi ipebadiakenndu wari Sabat janah adi i bas wari e la kam ndarami kepentingenndu jine; adi iergaindu waringKu si Badia e, janah ihamatindu alu la erdalan ndauh, la erdahin, tah pe ncakapken si sia-sia,
14 adi bage idatndu me keriahen i bas kam ersembah man bangKu. Kubahan maka kam ihamati i belang-belang doni enda janah senang akapndu nggeluh i bas negeri si nai Kubereken man nini-ninindu, Jakup." Bagenda me nina TUHAN.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA