Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nina TUHAN, "Begikenlah Aku, o kam si mesikel ikelini, o kam si ndarami penampat i bas Aku. Ingetlah lingling batu asalndu nai lubang pemuaten batu ingan asal mulandu.
2 Ingetlah nini-ninindu Abraham, ras Sarah; tupung Kudilo Abraham, langa lit anakna. Jenari Kupasu-pasu janah Kubereken anak man bana; Kubahan nterem kal sinursurna.
3 Kucidahken me perkuah ateKu kempak Jerusalem, kempak kerina kalak si ringan i bas runtuh-runtuhenna. Taneh si kerah janah i je la kai pe turah. Kubahan jadi peken bali ras Pardis. Lit i je keriahen ras kemalemen ate, radu ras ende-enden pujin ras pengataken bujur pe.
4 Begikenlah Aku, o bangsangKu, begikenlah kai si Kukataken bandu. Kubereken pengajarenKu man bangsa-bangsa; undang-undangKu mereken terang man bana.
5 Pedas Aku reh, lako ngkelini ia; paksa kemenangenKu nggo reh deherna. Aku jine pagi ngerajai bangsa-bangsa kerina; tertima-tima ia, sabap Aku me pengarapenna.
6 Tarelah ku langit, tatap kempak doni, masap me langit desken cimber api. Doni enda getem bagi uis male, desken rengit, jelma si ngianisa keri mate. Tapi kemenangenKu la erpeltep-peltep.
7 O bangsangKu si meteh bujur, begikenlah Aku, i bas pusuhndu kap rurat pengajarenKu. Ula mbiar adi isaling-saling ras igombangi kalak kam,
8 sabap lesap me pagi ia desken uis ipan nget-nget! Tapi keselamaten si Kubereken tahan rasa lalap, kemenangenKu la erpeltep-peltep."
9 Kekeken min TUHAN, kekekenlah, sampati kami! Pakelah KuasaNdu, kelini kami. Pakelah e bagi si IbahanNdu i bas paksa si nai tupung IperperkenNdu Rahap, naga lawit si adi.
10 Kam ka nge si ngkerahi lawit si mbages si erbahan dalan arah tengah lau. Emaka kalak si IkeliniNdu, banci ngepar alu selamat.
11 Kalak si nggo IpulahiNdu e seh me i Jerusalem alu meriah ersurak ras rende. Keriahen si rasa lalap ndemi pusuhna, suhsah ras ndele ate, rasa lalap lanai inanamina.
12 Bagenda nina TUHAN, "Aku, Aku nge si ngapuli kam. Ngkai maka kam mbiar man manusia si ermasap-masap, si bali saja nge ras dukut-dukut?
13 Nggo kin kam lupa man TUHAN si Nepa kam, si ngkimbangken langit, ras si namaken palas doni enda? Ngkai maka kam mbiar la erngadi-ngadi, nandangi kalak merawa si nindas kam ras kalak si atena ngkernepken kam? Situhuna keganasen e lanai banci ngkenai kam.
14 Kalak si tertaban pedas me ipulahi; la ia mate, janah la ia kurang nakan.
15 Aku kap TUHAN Dibatandu; Kugawer lau lawit, emaka ergeruhguh sora galumbang. GelarKu eme TUHAN si Mada Kuasa!
16 Kukimbangken langit, janah Kupajekken palas doni. Kukataken man Jerusalem, 'Kam kap bangsangKu! Nggo Kubereken bandu pengajarenKu, janah Kukawali kam alu tanKu.'"
17 O Jerusalem, kekeken, tediskenlah. Ukumen pernembeh ate TUHAN nggo inemndu tare calung si IberekenNa man bandu. Nggo inemndu seh keri, emaka nggo mbewat-mbewat kam ibahanna.
18 Anak si ipupusndu la lit sada pe si mabai kam, i bas anak si ipebelin-belinndu la lit sada pe si negu-negu kam.
19 Kam nggo kedabuhen dua erbage mara: La lit ise pe si ngapuli kam; negerindu nggo radas ibahan perang, janah bangsandu kelihen mesangat.
20 I bas serpang dalan, anak-anakndu guling perban kotena bali ras belkih kena banto perburu. Nggo igejapna uga sangatna pernembeh ate Dibata.
21 O kam anak kota Jerusalem si i bas kiniseran si mberat, seh maka kam mbewat-mbewat bagi kalak mabuk!
22 Bagenda nina TUHAN Dibata sikapitndu, "Calung pernembeh ateKu si Kubereken bandu Kubuat me genduari. Anggur si erbahanca kam mbewat-mbewat, lanai pada inemndu.
23 Kubereken me calung e man kalak si nindas kam mbarenda, kalak si mahan kam ampar i bas dalan, si ndedehi kam bali ras kubang."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA