Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sihol mandoding do ahu pasal na hinaholonganku, doding ni na hinaholonganku pasal pohon anggurni. Dong do pohon anggur bani na hinaholonganku bani dolog-dolog na lambutan.
2 Isangkuli ma ai, ipulliti batuni anjaha isuani ma bani hayu anggur pilihan; ipajongjong ma menara panjagaan i tongah-tongahni, anjaha ipauli homa sada pangilangan. Mangarap do ia bani buah anggur na dear, hape simarbuah-buah anggur do ibere bani.
3 “Ai pe ale par Jerusalem ampa halak Juda, padalan hanima ma partimbangan pasal Ahu ampa pohon anggur-Hu.
4 Aha ope sibahenon bani pohon anggur-Hu, na so Hubahen hinan hujai? Mangarap do Ahu bereonni buah anggur na madear, hape mase ma ibere simarbuah-buah anggur?
5 Ai pe patugahon-Ku ma bannima atap aha na sihol bahenon-Ku bani pohon anggur-Hu: Dokdokon-Ku ma hondorni, ase hona gagatan ai; parsedaon-Ku ma tembokni, ase hona lotlotan.
6 Paturuton-Ku ma ai halong; seng be hona ranggason ai barang hona sangkul, tubuhan duri-duri ma ai ampa poyon-poyon. Parentahkonon-Ku ma hombun, ase ulang iparoh udan hujai.”
7 Tongon, ia pohon anggur ni Jahowa Zebaot, ai ma ginompar ni Israel, anjaha halak na i Juda, ai ma suan-suanan haudunganni. Iarapkon do hasintongan hape daroh maruseian, sonai hapintoron hape na so uhum do.
8 Bursik ma, halak na patambah-tambah rumah, na patambah-tambah ladang, gabe seng dong be ianan na lumei, jadi hanima tumang mando mangiankon tanoh in.
9 Domma ipatangarhon Jahowa Zebaot bani pinggolhu, “Tongon, maningon tadingkononkon do rumah na buei in, na banggal age na jenges, seng be dong na mangiankon.
10 Sapuluh lambar pohon anggur, mambere gogohni sada tapongan, anjaha sabantei bonih, mambere gogohni sada tumba tumang.”
11 Bursik ma halak na pagirahkon puho, laho mangayaki siinumon na pamabukkon, anjaha na hundul-hundul ronsi bagas borngin, marmabuk-mabuk ibahen anggur.
12 Mangan-mangan do sidea marhasoman husapi pakon arbap, tambur ampa sulim, anjaha minum-minum anggur; tapi pambahenan ni Jahowa seng ipardulihon sidea, anjaha jadi-jadian ni tangan-Ni seng ididah.
13 Halani ai tarbuang ma bangsang-Ku ibagas na so binotohni; matei ma na sangap-sangapni halani gayuran anjaha halak na mabuei matei horahan.
14 Ipangangang nagori toruh do tolonanni, anjaha tanggak tumang babahni ibahen, jadi tuad ma hujai hajengeson ni Jerusalem ampa harameionni, hariahonni ampa olob-olob na ijai.
15 Jadi jut ma uhur ni jolma, tunduk ia dalahi, anjaha mata na mangenjeng i patoruh.
16 Tapi gabe timbul ma Jahowa Zebaot halani uhum ai, anjaha Naibata na pansing in pataridahkon hapansingon-Ni ibagas hapintoron.
17 Jadi manampal ma anak ni biribiri songon na bani sampalan, anjaha hambing manggagat bani na mangkareong ai.
18 Bursik ma halak na mangaitkon hasalahan marhitei tali ni hajahaton, anjaha na mangaitkon dousa songon marhitei tali ni gareta,
19 na mangkatahon, “Ipodaskon, ioloskon ma horjani, ase ididah hita ai; sai roh ma tongon, sai saud ma sura-sura ni Na Pansing ni Israel, ase ibotoh hita.”
20 Bursik ma halak na mangkatahon bani na bajan, ai do na dear, anjaha bani na dear ai do na bajan, na mambahen na golap gabe na siang, anjaha na siang gabe na golap, na mambahen na mapaet gabe matobu, anjaha na matobu gabe na mapaet.
21 Bursik ma halak maruhur ia nini ibagas uhurni, anjaha na pentar ia iagan uhurni.
22 Bursik ma halak na beteng minum anggur, anjaha na garang mangagu minuman koras,
23 na paluahkon halak parjahat halani sisip, anjaha na padaohkon hapintoron humbani halak parpintor.
24 Halani ai, songon dilah ni apuy na mangankon anggala, anjaha songon poyon na mosog ibahen gajag ni apuy, sonai ma uratni gabe abuan, bungani habang songon orbuk, ai itulak uhur ni sidea do titah ni Jahowa Zebaot, anjaha mapas uhurni bani Na Pansing ni Israel.
25 Halani ai gajag do ringis ni Jahowa dompak bangsa-Ni, anjaha ipagostong tangan-Ni mangimbang sidea; ibogbog do sidea, pala dugur dolog-dolog anjaha radag bangkei ni sidea songon tompoh-tompoh i dalan. Sonai pe ganupan ai, seng surut ope gila-Ni, anjaha tong ope gostong tangan-Ni.
26 Anjaha pajongjongon-Ni ma sada partanda bani bangsa na marianan daoh, anjaha idilo sidea hun ujung ni tanoh on; anjaha tonggor ma, podas, doras do sidea roh.
27 Seng dong na loja, seng dong na jiris, sahalak pe seng dong tartunduh atap modom; seng dong gondit na tanggal barang tali ni sipatu na rotap.
28 Marot do panah ni sidea, anjaha pasang siorni ganup; tambirik ni huda ni sidea songon batu, anjaha galapang ni garetani songon logou sibungkar hasowor.
29 Aum ni sidea songon singa, songon anak ni singa do sidea maraum; maraum do sidea lanjar manoroh, iluahon ma ai seng dong na boi paluahkon.
30 Marhasak ma sidea roh bani ari ai, songon parhasak ni laut; anjaha anggo na kawahkon tanoh in, tonggor ma, golap anjaha gobir, anjaha na lihar, golap do ibahen hombunin.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA