Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Edhingngagi tang nyanyeyan reya parkara kebbun anggurra tang kanca. Tang kanca andhi’ kebbun anggur e erenganna gumo’ se landhu.
2 Tang kanca jareya alandhu’ tanana ban mowang to-batona. Tanana pas etamenne anggur peleyan, sarta epobuwi manara panjaga’anna. Saellana pas ngale tanana kaangguy kennengnganna merres anggurra. Buwana enante’ sampe’ massa’na, tape anggurra celo’ rassana.
3 Daddi sateya tang kanca jareya ngoca’, "Ba’na kabbi, oreng Yerusalim ban Yehuda, mara adili Sengko’ ban Tang kebbun anggur reya.
4 Apa pole se koduna elakone Sengko’ ka Tang kebbun anggur reya, tape bi’ Sengko’ gi’ ta’ ejalannagi sampe’ sateya? Arapa buwana me’ celo’ rassana, ta’ akantha se earep Sengko’ re-saarena?
5 Tang kebbun anggur reya sateya bi’ Sengko’ epakantha’a reya: Pagar e sakalenglengnga bi’ Sengko’ edabu’a, geddhung se ngaobi epagujura. Bi’ Sengko’ pas epannengnga erosak ban enyek-enyek burun alas.
6 Dina me’ olle etombuwi but-ombut alas. Bungkana anggurra bi’ Sengko’ ta’ etottowa, ban rebbana ta’ eraowa. Dina me’ olle etombuwi rebba ban ombut se bannya’ dhurina, la’-mala’ bi’ Sengko’ ondhem ta’ ebagiya magaggar ojan ka attasanna."
7 Sabab kebbun anggurra PANGERAN Se Mahakobasa jareya ommat Isra’il ban reng-oreng Yehuda reya bungkana anggurra se etamen e tana jareya. Dhari ommadda jareya Pangeran ngarep kaadilan, tape se badha pera’ kakejjemman. Pangeran ngarep ommadda ajalannagi barang se teppa’, tape se badha coma serrona oreng menta kaadilan.
8 Palang ba’na se melle ko-bengko ban nyarobot gal-teggal polana namba’ana dhi’-andhi’na dibi’! Sakejja’ aggi’ reng-oreng laen pas ta’ andhi’ kennengngan, daddi pas pera’ kare ba’na malolo se badha e nagara reya.
9 Sengko’ ngedhing PANGERAN Se Mahakobasa asompa, "Ko-bengko se raja ban bagus jareya bakal kosonga ta’ ekennengnge oreng.
10 Hasella bume rosak, bun-kebbun anggur se lebarra sapolo hektar coma bakal ngasellagiya aeng anggur sapolo liter. Bibit saratos liter bakal ngasellagiya gandum pera’ sapolo liter."
11 Palang ba’na! Sabab dhari gu-laggu sampe’ malem lakona ba’na coma ngenom nom-enoman kerras ban bu’-mabu’an.
12 E dhalem ta-pestana ba’na badha monyena calempong, gambus, terbang ban soleng sarta nom-enoman aeng anggur. Tape ba’na ta’ parduli ka karyana Allah ban sabarang se elampa’agi Salerana.
13 Daddi Tang ommat se ta’ tao pa-apa bakal egiringa epadaddi tawanan. Para pamimpin ban ra’yat bakal mateya kalaparan ban pelka’.
14 Congorra maot abukka’ ce’ lebarra ngontal reng-oreng penting e Yerusalim ban ra’yadda se teppa’na mabadha men-rammen.
15 Saneyap oreng bakal epamalowa ban se sombong eaebbagiya.
16 Tape PANGERAN Se Mahakobasa noduwagi kaagunganna kalaban alampa’agi sabarang se bendher. Pangeran bakal noduwagiya kasocceyanna kalaban ngadili bangsana.
17 E jur-gujuranna kottha budhu’na embi’ ban dumba bakal ngamba’a ban ta’ kakorangan kakan.
18 Palang ba’na se ros-terrosan agabay dusa!
19 Ca’na ba’na, "Dina GUSTE Allah se socce se esemba Isra’il me’ olle duli madhateng okoman! Dina Guste Allah me’ olle alampa’agi apa kasokanna sopaja sengko’ ban ba’na nangaleyana."
20 Palang ba’na se alik-balik se bagus ban se jahat, se petteng ban se tera’, se pae’ ban se manes!
21 Palang ba’na se nganggep aba’na bicaksana ban ce’ penterra!
22 Palang ba’na se daddi jago ngenom anggur. Ba’na bangalan mon esoro nyampor nom-enoman kerras!
23 Tape pera’ lantaran terro narema’a pesse go’-sogo’ ba’na mabebas oreng se sala, ban lang-ngalange oreng se ta’ sala narema kaadilan.
24 Ba’na nolak pangajaranna PANGERAN Se Mahakobasa ban ya-nyeya papakonna Allah se socce se esemba Isra’il. Lantaran jareya, akantha darameyan ban rebba kerreng se obus ekello’ apoy, bariya keya mo’-ramo’na ba’na bakal bucco’a, bang-kembangnga bakal kerrenga ban obus eabber angen.
25 PANGERAN duka ka bangsana; astana la epangaceng se ngokoma reng-oreng jareya. Nong-gunong bakal gundhegga; yit-mayyit bakal ajalamperrana akantha rombu e rong-lorong. Tape dukana gi’ ta’ terep, ban astana gi’ paggun epangaceng se ngokoma.
26 PANGERAN adikanana bangsa se jau ban reng-oreng jareya bakal duliya dhateng!
27 Reng-oreng jareya terros asadhiya se aperranga ban ta’ tao lesso. Ta’ tao tedhung otaba ngantok.
28 Panana tajem ban gandhibana la esadhiya’agi. Kokona jaranna akantha batona korek, rodhana karetana apoter akantha ola’ taon.
29 Rit-parjuridda agaung akantha macan se gi’ buru nyargep keban kakananna, se pas egiba buru ka kennengngan se kerana tadha’a se bisa arebbu’ kakanan jareya.
30 E are jareya e saantero nagara Isra’il bakal ekaedhinga cerrengnga paperrangan se kajana akantha garudhu’na tase’. Abas, saantero nagara jareya petteng sarta possa’ ban karekongan. Terrang aoba daddi petteng calemodan.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA