Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Begikenlah ende-enden si kuendeken enda, sada ende-enden kerna temanku ras peken anggurna: Temanku lit peken anggurna i das uruk-uruk si seh kal mehumurna.
2 Icangkulna tanehna, iambekina batu-batuna; jenari isuanna batang anggur si mejilena. Ipajekkenna pantar man ingan njagasa, janah ibahanna lubang ingan ngerik buahna. Itimaina buah anggur ndai seh tasak kerina, tapi kepeken macem kerina nanamna.
3 Dage genduari nina temanku e, "O kam kalak si ringan i Jerusalem ras Juda, cuba kam ertimbang kerna aku ras kebun anggurku.
4 Kai nari kin si kurang kubahan nandangi kebunku e? Di la lit si kurang, kuga maka macem buahna, janah ulihna la buah si mehuli bagi si kuarapken?
5 Erkiteken si e, bagenda me ateku kubahan nandangi kebun anggurku e: Kurontasken bidena, kuruntuhken tembokna. Jenari kupulahi rubia-rubia simeliar nggagati ras merjakisa.
6 Kupelepas ia rambahen, dahan-dahanna lanai kubersihken, janah tanehna lanai kugaburi. Tapi kupelepas i je turah rambah duri ras rih. Embun pe la kubere ndabuhken udan ku je."
7 Israel kap peken anggur TUHAN si Mada Kuasa, kalak Juda me batang anggur si ngena AteNa. IarapkenNa bangsa e ngelakoken si mehuli tapi munuhi kepeken perasatna. Itimai-timai kebujuren idalankenna kepeken nderkuh kalak itindasna.
8 Cilaka me kam, o kam si nukur rumah ras taneh nambahi si nggo lit i bas kam. Keutisik nari lanai lit i japa pe ingan kalak si deban, emaka kam nari ngenca pagi nggeluh i bas negeri e.
9 Nggo kubegi kai si ikataken TUHAN si Mada Kuasa nina, "Kerina rumah belin si mejile enda jadi lume janah meruntuh me.
10 Peken anggur si belangna sepuluh hektar, empat tumba lau anggur ngenca pagi ulihna; siwah ayan benih, lima tumba ngenca pagi buahna."
11 Cilaka me kam, o kam si lampas medak erpagi-pagi ngayakken samsu, janah seh mbages berngi mabuk-mabuk ngenca dahinndu.
12 Ibahanndu minem-minem lau anggur. Tapi la diatendu perbahanen TUHAN ras kai si IlakokenNa.
13 Erkiteken si e ibahan kalak me kam jadi tabanen sabap kai pe la iertindu. Peminpin-peminpinndu mate lumben, janah jelma si nterem mate muas.
14 Doni kematen nggo merincuh nelen kam, nggo ingangakenna pe babahna. Ibendutna kerina peminpin Jerusalem radu ras jelma si nterem si pinger sorana e.
15 Kerina kalak mela akapna, janah kerina si rukur meganjang idabuhken.
16 Tapi TUHAN si Mada Kuasa encidahken KemulianNa alu ngelakoken si benar, janah IpetangkasNa KebadianNa alu ngadili BangsaNa.
17 I bas kota si nggo runtuh e nggagat anak biri-biri ras anak kambing.
18 Cilaka me kam, o kam si la ngasup erleka ras dosa-dosandu.
19 Nindu, "Pedas-pedaslah TUHAN ngelakoken kai AteNa IbahanNa, gelah banci si idah. Pelepaslah Dibata si Badia nu Israel nehken sura-SuraNa, maka sieteh kai si lit i bas UkurNa."
20 Cilaka me kam, o kam si ngataken maka kejahaten mehuli janah si mehuli ikatakenndu jahat. Isalihkenndu kegelapen jadi terang janah terang jadi kegelapen. Ibahanndu si pagit jadi ntebu, janah si ntebu jadi pagit!
21 Cilaka me kam, o kam si pentar janah pantas akapndu bandu!
22 Cilaka me kam, o kam si ketagihen minem anggur. Tuhu merawa kam minem janah la kam mbiar minem si uga gia campurenna!
23 Tapi adi ibere sisip man bandu, minter ipulahindu kalak jahat si ersalah, janah kalak si la ersalah iambatindu ndatken sikerajangenna.
24 Emaka genduari, kam bagi nggala ras dukut si nggo kerah keri ipan api. Uratndu keri macik, bungandu kerah jenari nartar iembus angin, erkiteken nggo itulakndu pengajaren TUHAN si Mada Kuasa, dingen megombang man pedah si Badia, Dibata nu Israel.
25 Merawa ate TUHAN man BangsaNa, emaka IawatkenNa TanNa lako ngukumsa. Deleng-deleng mundu-undu; janah mait kalak si mate ipelepas amparen i dalan bagi karap-karap. Tapi kenca bage pe pernembeh ate Dibata langa ngadi, IawatkenNa denga TanNa guna ngukum kam.
26 Ibahan TUHAN pagi tanda ndilo bangsa si ndauh. Ersiwel Ia ndilosa gelah reh bangsa-bangsa i tampuk doni nari. Nehenlah enam ia reh, pedas dingen meter!
27 La lit si meteh latih, la lit si jurembat. La pernah madat matana, la pernah ia tunduh. Genditna la sada pe longgar, tinali sepatuna la lit retap.
28 Anak panahna ntelap kerina, janah panahna nggo ipegestengna. Cekili kudana bali piherna ras batu api, roda gereta perangna pendeh ersiu-siu bagi angin kalinsungsung.
29 Tenterana erdengum bagi singa si mbaru njerngem panganna, dingen ikiamkenna kempak ingan si la ise pe ngasup muatca.
30 Adi nggo seh paksa si e, desken singa si merawa erdengum ia i belang-belang Israel, bali gangna ras sora lawit si ergeruhguh. Nehenlah, negeri enda, dem alu kegelapen ras aru ate; terang itelen kegelapen.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA