Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nina TUHAN, "Enda me suruh-suruhenKu si Kupegegehi; Ia me pilihenKu, si ngena ateKu. KesahKu nggo Kubereken man bana, gelah ibabana kebujuren man kerina bangsa-bangsa.
2 La ia nergangi, la megang sorana ibahanna; janah i bas pasar pe la terbegi sorana ngerana.
3 Buluh si punggur, la itabahna, lampu si milep-ilep la inimpetina. Alu tutus ate, keadilen ibabana.
4 La ia erleja-leja, la ia ngelabuh, seh nggo paguh ipajekkenna keadilen i doni enda. Erkiteken si e, negeri-negeri si ndauh tertima-tima nandangi pengajarenna."
5 Dibata kap si njadiken langit ras si ngkimbangkenca; doni enda ras kasa kai si ringan i je, Ia si nepasa; IberekenNa kesah ras kegeluhen man manusia. Janah genduari nina TUHAN Dibata man suruh-SuruhenNa,
6 "Aku, TUHAN, nggo ndilo kam lako ndalanken sura-surangKu. Kutegu-tegu janah Kukawali kam. Arah kam Kubahan perpadanen ras kerina bangsa, arah kam Kubereken terang man bangsa-bangsa.
7 Kam me Kusuruh pemedakken mata kalak pentang, ras mulahi kalak si tertutup i bas penjara si gelap.
8 Aku kap ngenca TUHAN Dibatandu. La Kupelepas ise pe ndatken kemulianKu; la Kubere maka gana-gana dat puji-pujin si jadi kerajangenKu.
9 Kai si Kukataken nai, genduari nggo jadi. Janah genduari Kuturiken man bandu perkara-perkara si mbaru, aminna pe si e langa bo ibenai."
10 Endekenlah ende-enden si mbaru man TUHAN, i belang-belang doni, penangkihlah man BaNa puji-pujin. Ergeruhguhlah muji Ia, o lawit ras kerina isina, rendelah o negeri-negeri si ndauh ras si ngianisa.
11 Pujilah TUHAN o gurun pasir ras kuta-kutana, o kalak Kedar, pujilah Ia. Pujilah ia, o kerina kalak si ringan i kota Sela, i bas tampuk deleng-deleng nari ersurak meriahlah man BaNa.
12 Kasa kai kalak si ringan i bas negeri si ndauh, ipujinalah TUHAN dingen pemuliakenlah.
13 TUHAN berkat desken puanglima si mbisa, merincuh erperang dingen nggo sikap pe Ia. IserkokenNa surak-surak perang, IcidahkenNa KinimbisanNa man kerina imbang.
14 Nina Dibata, "Nggo ndekah Aku sinik saja; kem Aku, la Kualoi bangsangKu. Tapi genduari seh me paksana Aku ngerana, desken diberu si nandangi mupus serko Aku.
15 Deleng-deleng ras uruk-uruk Kukernepken, dukut ras batang kayu, kerah Kubahan. Baluren lau Kusalihken jadi gurun pasir, janah paya-paya Kukerahi jadi taneh piher.
16 BangsangKu si pentang Kutegu-tegu, Kubabai ia arah dalan si la pernah ibentasina. Kegelapen si arah lebena Kusalihken jadi terang, taneh si bongkak-bangkik Kubahan jadi kendit. Eme si Kubahan man bana, la banci lang Kusehken e kerina.
17 Kerina kalak si ernalem man berhala-berhala, kalak si ngataken maka gana-gana me dibatana, la banci lang ihina janah mela akapna."
18 Nina TUHAN, "O kalak pasek, begikenlah! O kam kalak pentang, perdiatekenlah!
19 Ise kin lit bagi suruh-suruhenKu e pentangna? Ise kin lit bagi pertenahenKu e pasekna?
20 O Israel, tuhu nggo mbue si niidahndu, tapi si e kerina la iperdiatekenndu. Erpemegi nge tuhu pinggelndu, tapi la kai pe IdengkehkenNdu."
21 TUHAN Dibata tuhu-tuhu ersura-sura ngkelini manusia, emaka IpeganjangkenNa undang-undang ras PengajarenNa janah mesikel Ia, gelah undang-UndangNa i pehaga BangsaNa.
22 Tapi genduari BangsaNa e irampasi, ikurung i bas liang janah itutup i bas penjara; keri ia irampuk dingen irampasi, janah ise pe la lit si reh nampatisa.
23 Ise kam nggit megiken kata mulai genduari nari iperdiatekenndulah si enda.
24 Ise kin akapndu ngendesken Israel man si ngerampasisa? TUHAN jine kap, sabap erdosa kita BaNa. La kita nggit nggeluh rikutken sura-SuraNa, la kita patuh man undang-undang si IberekenNa.
25 Erkiteken si e IdabuhkenNa ukumen si mberat man banta, kesusahen perang ngkenai kita. I belang-belang Israel gara pernembeh AteNa, tapi kerina si e la siperdiateken, la siangka.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA