¹ Kristen bose omka de kwasang gwibirida gwenna bahem golzausuk gwen, sap zen san de hen ere mae mo iye tanganna kiye.
² Emki hen ere mae mo tame tabin srem Kristen bose wal omka gola kon lup gulin gwen, sap orep ahakon hen ki tame tabin sremkam Alap mo dam taha nakore zini lup nulin gwek– zen kim zi tangan mo kim ejowe gwe zakye. Zep kire zi mae mes ebon hatanan zala.
³ Men zen hen bwinak lowehe gweꞌan emki enlala gwibirida tine gwen– men ki hen en de ze lowe henna. Men desa Alapsa de tame tan srem wenya karek da gwibirin, desa hen em kwasang gwibirida gwen– san de enaka de karek tabinni kiye.
⁴ Emki anakan eenlala gwe-gwen: “We-zi dare de zenaka leisyanna, Zen mes Alap aha-en soka.” Zep we walya barena hen zini bare wenya, em kime enaka kap lak, em ema Alapsa hen en guk gweblak, “Ëe an deban en asa e gwer.” Zep ere mae mo Alapsa de gu-gublunna insa bahem ekahalo gwenkam gulmun gwen. Men zen zere mae mo hole-hle san ang ta gwenan hen kahalo soson wenya, desa Alap molya karek tabir srem gweka.
⁵ Te-ala beya gwen hap de enlalana bap zen emsa bi gwibirida gwen. Emki anakan eenlala gwe-gwen, “Mensa ap Alap gol gwizimnira, zen syake.” Sap Alap Zena man emsa gu-gubiridaꞌara, “Ëe molye emsa kwasap walas mo kim da tasibik.”
⁶ Zen in zep Alapsa de taibliblan naban nen egu gwen, “Bian Zen Zen– asa de mas gwe-gweblan hap de Zi niye. Ëe ba hap de zi bosyansa airibirida gwen hap? Sap zi mo sosonna hom– asa de banakan mae gweblan hap denaye.”
⁷ Men zen nonol Alap mo olkam emsa tawa da gwibik, emki desa enlala gwibirida gwen, “Zen kirekam lowehe gwek, hen Alapsa de taibliblannak de tatem ezauk gwennak kirekam juwek.” Zep em hen zeno mae mo kim em tatem ezauk gwen,
⁸ sap Kristus Yesus Zen hom wet gwesik gwenda– sap orep, angkam, hendep denaban.
⁹ Totore tawa tabin ese san bahem ang ta nasen gwen. Diki Alap mo kwasang-kwasang ennak em tatem ezauk gwen, hen kwasang-kwasangna in dikire eno mae mo enhonak bol-zaun gwek. Zi de emsa titi tabinni Alap hap de tweran blom ta gwibinsi de twinbin hip, ahaksa tembane maesa de Alap hap elwa gwen hap, bahem desan ang ta gwen. Sap men zen desan ang ta gwenan, zeno mae mo lowe henna dekam hom mae dawem san dep wet gwesik gwenan.
¹⁰ Okamanak men zen Alap mo golak syal ta gwenan, Alap hap de otweran tru tase gweblanna zena hen man ahakore hlikna dwenblanda gwenan. Hwena nebe mae hap de Alap mo ngatan zi mo langnak de kalsna– men zewe Yesus nebe mae hap de syala sul soneka, dekon molya zini in ba maena nulin gwek.
¹¹ Emki eenlala gwen, Musa mo titi tabin ola insa kim zere mae mo karek-kareksa dikim ngan gulsuzimdin hip syal nei gwibirin, dekam sapisa Alap mo gol e nakore lilikin alpnak zip noso gweblanan. Hwena kal en naka zep Alap mo golak de teipsin tangan zini in Alap zere en tangan hap de teksonnak goltil gwenda. Sapina in mo tokna e san dep nerhal gwenan– zao de langa tolak syauknuk ang tasin hip.
¹² Zen in zep hen kirekam, Yesussu tan hap e nakon nerhak. Zen dekam Yesussu saherak nennek, hen Zen dekon zep zere mo kalkam zere mo hlil irin zini neno mae mo karek-kareksa aha-rokꞌnen ngan gulsuzimki.
¹³ Zen in zep, nen hen Yesussu nen saher san dep zertron. Zep neno mae mo enlalana anakan zen lwa gwen, “Sap sa nesa hen Yesus hup de jal hap lamang da gwibir hen langa dasik gwibir.”
¹⁴ Sap auhu-kamanak awe, neno mae mo dakal ena hom. Hwena nen ema nere mae hap de dakal esa esblaꞌan.
¹⁵ Nen angkam sapi-kambingsi home Alap hap tru lasikse gweblaꞌan. Hwena men desae angkam ol gweblaꞌan, zen in kime Yesus mo bosekam enho aha-erekam Alap mo bosena teip ulsuk gweblanan. Dekam neno mae mo ola man nwe-mase gwe-gweꞌan– san de otweransa de tru ta seblanna kiye. Zen in zep Alap ensa nen boltere ta tine gwen, hen Yesus de kitak teipsibiridan hap de olsa nen gol halada gwen.
¹⁶ Hen aha zisi de mas gwibirida gwenna bahem eeititi gwe-gwen– hen kae-kaesa de goltrei gwizimdin niye. Sap zen desa hen Alap sam gwesik gwibirida– san de dombasa de tru tasik gweblanna kiye.
¹⁷ Men zen Kristen zini emsa nol neibirida gwenan, emki betek gwibirida gwen hen zeno mae mo ol san em ang ta gwen. Sap zeno mae mo syala, zen eno mae mo ang hap dena, hen zen man anakan tame nul gwenan, “Alap sa ere mo syal eisi de goltreblan hap asa gublula.” Em de kirekam betek gwibirida gwenkam, zen dekam sa isrip-sri naban syal ta gwer. Hwena betek gwibirida gwen sremkam, ki hwena enlala nik sa edowe hana gwer. Hwena zen de enlala dowe hanan naban syal ta gweꞌak, ki hwena waba hap sa ebon mae syal ta gwer.
¹⁸ Ëe, ere mo syal bose walya ban, ano mae mo enho nakon anakare enlalana hom wet so gwenda, “Ëe kareksae ol gwenan.” Zep abe mae hap emki Alapsa abe ta gwen, sap ee zeno syalsae ol gwenan, hen zeno nwenak de tangan edakastin hibe edwam gwe-gwenan.
¹⁹ Ëe in zebe emsa abe tabiꞌin: Abe hap emki hen Alapsa abe ta gwen– ee akakim etan nabakam ebon mae osan dep lwa halzak.
²⁰ Zep angkam, ee a kirekame mo Alapsa ebe mae hap abe ta gwenan, “Bian, Em in Zene zebe mae hap tahana deisu guzimki, hen Em in Zene Bian Yesussu tin nikon ngaya taka. Ëe ama Emsa abe taꞌan: Ano suratna ansa men zen dokwak nuꞌik, Emki zebe mae hap sosonsa gol gwizimdin– zen dekakim ere mo dwam gwibin en san lowehe gwek. Hen Bian, Yesus onakore sosonna dikire zeno mae mo enhonak syal gwe tine gwek– zen dekakim ere mo nwenak etal gwesik. Sap Yesus Zen Zen– asa de domba makan zaho ta gwibin Zi niye. Sap Zen mes ere mo zi niban de ol ziaha-en gunnu hendep denaban sul soneka– te-lidak son nakon kim kala wet soblakke. Ëe zep asa zeno bosena hendep denaban teip ulsuk gweblal. In eiwa.”
²¹ (13:20)
²² Aya-wal oso-wal, ee ama emsa gubiridaꞌan: Ano surat tihisni ansa bahem karatda gunnuk husus gwibin, sap zen emsa dikim dawem san dep titi tabin hip dena, hen ee blal tangankam home ebe mae hap ale gulzimk.
²³ Ëe ama emsa gu sonebiridaꞌan– em de hen etawa gwen hap: Neno mae mo ayana Timotius Bak mes bwi nakon wet soka. Zen de nabakam abon onak hata zankam, ki asa apdekam ebon mae osan dep song ezal.
²⁴ Iwe de Kristen zini eno mae mo nol-nola kip ano mae mo dawem gol sonezimdinni em ayang ulzimk– hen tingare iwe de Alap mo hlil irin zi hipye. Men zen aban mae Italia mo lang nakore wenya awe lowehe gwenan, zen hen dawem ensa ebe mae hap nol sonezimk.
²⁵ Dikire Bian mo kwasang-kwasangna kitak ebon mae onak lwa gwek.