Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Hu ndia de, mai fo teu seluk leo nanoli manamai kala la'eneu da'di touinak nai hataholi kamahehele ka maso'da na dalek, ma boso taoafik neu ka'da ita agama na isi makasososa na. Ita boso ulang seluk nanoli poko ka, nae hataholi a muse ana hahae tao no'i dede'a sosoa ndandaa ta kala, ma muse tamahele neu Manetualain,

² do nanoli pokok la'eneu oe salani ka, do la'eneu lalaa lima ka neu hataholi, do la'eneu mate so, te taso'da falik, do la'eneu huhukuk fo mana ketu basa ta ka.

³ Metema Manetualain bei fe loak soona, mai leona fo teu leo nanoli mana maik ia!

⁴ Nanahu, hataholi mana fali dea basa ka, ta bisa hela-nole fali kana fa. Makahulu na sila nai mangale'dok maneme Manetualai na dalek, ma lame'da lita Manetualain baba'e-papalan so. Sila boeo, Manetualain Dula Dale na koasa nalas so.

⁵ Sila bubuluk neme sila maso'da mandoo fai na mai, nae Manetualain dede'a-kokolan ndia malole, ma lame'da lita baba'e-babati henuk no koasa neme le'do fai fo manamai ka.

⁶ Tehu basa ndia soona, ala fali deak! Masa bole hela-nole fali kasa, soaneu tukatei-saledale seluk leme sala-singo nala mai bai. Nana sila bei lona-nggange seluk Manetualain Ana na, ma lakamumulu-lakamamae kana, nai lea matan.

⁷ Da'e fo mana musi oe u'dak fo nasi'a u'da na kona neu lain, boema nakamomolik bubu'u palusa fo masosoa-ndandaak soaneu hataholi mana bubu'u-palusa nana, Manetualain ba'e-pala dae ndia.

⁸ Tehu metema dae ndia nabuna-naboa fii, ma na'u ai ana madila-nggauk, soona dae ndia sosoa-ndandaan ta, de mahani te, neukose Manetualain soo-supan, fo mate'e na, nanahotu henik.

⁹ Tehu Tolano-tolanoo susue ngala lemin! Leomae ami mafa'da mae leondia, tehu ami mamahele emi. Ami mamahele mae emi sipo basa dede'ak fo malole na lena bai, fo nde baba'e-papalak fo nalupa baba'ek neme emi so'da-molem mai.

¹⁰ Ita Manetualain ta nde Manetualain fo ta mana tao tunga ndoo na fa. Ana ta nafandele heni hata fo emi tao-no'i ba'eneu na fa, ma susue-lalaik fo emi matu'du neun, nai lelek tulu-fali tolano-tolanook fo namahehelek esa, nai makahuhu na ma besak ia.

¹¹ Ami hii manseli fo ela emi esa-esak manggate makandoo losa mate'e na, nalosa emi sipo hata fo emi mamahenak ndia.

¹² Ami ta nau emi da'di manapela-balek fa. Tehu ami hii fo ela emi maso'da sama leo hataholi fo manasipo hata fo Manetualain helu ka, ma nanahu emi mamahele neun, ma emi mahani no ta haelai mamanasa fa.

¹³ Lelek fo Manetualain helu neu Abraham, Ana soo-supa, nae neukose Ana tao natetu hata fo Ana helu ka. Ma hu ka nde ta hapu hata fo dema lena neme Ndia mai, soona Manetualain soo-supa ninik na'de na mesa kana.

¹⁴ Ana nafa'da nae, "Au helu, neukose Au ba'e-pala o, ma Au tao a o tititi-nonosim lamba'u."

¹⁵ Abraham nahani no ta haelai namanasa fa, de ana sipo hata fo Manetualain helu ka.

¹⁶ Metema hataholi a soo-supa soona, ana soo-supa ninik hataholi fe'ek fo dema lena neme ndia mai, soona soo-supak ndia, ana tao nakamate basa nale'a-napilik lala'ena.

¹⁷ Manetualain kokolak no mahelek neu hataholi-hataholi mana sipo hala hehelu na, nae neukose Ana ta nasafali dale tutu'u na fa. Hu ndia de, Ana tama seluk soo-supak neu hehelun ndia.

¹⁸ Dede'ak dua ta hapu lasafali fa: Tao leo bee o Manetualain ta nasapepeko la'eneu hala hehelu na, ma soo-supan fa. Hu ndia de, ita fo tasulu-tahapa basa neu Manetualai na, nanafe manggate balakaik soaneu ho'u tahehele neu namahenak, fo nanabetubalak nai ita mata na.

¹⁹ Ita namahenan ndia, sama leo naka fo nana pa'ak dema na seli nai oe dale, ma nalupa hoho'u matea, ma nee-nee-lino-linok, ba'eneu ita so'da na. Namahenak ndia, ana tola seli tema maloa manai Kama Malalao ka, nai Manetualain Uman manai nusa so'da ka.

²⁰ Yesus oti basa enok leo mamanak ndia soaneu ita, ma Ana masok basa leo naa neu fo Ana da'di ita Imam Matua Inan losa dodoo na, sama leo Imam Melkisede ka.

Ibrani

Video Ibrani 06

Ikuti Kami:

KONTAK | PARTISIPASI | DONASI