Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 (1-12) Hatahon ma hubani saninamu, ʻAmmiʼ (Bangsangku), ampa hubani botoumu, ʻRuhamaʼ (Na hihaholongan).
2 (2-1) “Gilai ma inangnima, gilai ma! ai seng be parinangon-Ku ia, anjaha Ahu pe seng be paramangonni, ase ipadaoh hun lobeini parriah-riahonni ai ampa parbangkisonni ai humbani bagod-bagodni.
3 (2-2) Anggo lang Hupasalang ma ia, Hubahen ma ia songon sanggah tubuh ia, Hubahen ma ia songon tanoh halimisan, songon tanoh dorging-dorging, anjaha Hubahen ma ia matei horahan.
4 (2-3) Bani anakni pe seng holong uhurmu, ai anak salong-salongan do ai.
5 (2-4) Ai boru jalang do inang ni sidea, situbuhkon sidea ai butak do parlahouni. Nini do, ʻHuihut-ihut ma na mangkaholongi ahu, na mambere bangku sipanganonku pakon siinumonku, wol ampa bonang, minak ampa siinum-inumon.ʼ
6 (2-5) Halani ai runggaon-Ku do dalanni bani duri-duri, anjaha pajongjongon-Ku tembok mangolatsi, ase ulang be ibotoh dalanni.
7 (2-6) Iparayak do na mangkaholongisi, tapi seng dapotsi, Pindah-pindah do ia bani sidea, tapi seng jumpahsi. Jadi nini ma, ʻLaho ma ahu, mulak hubani paramangonku hinan, ai sonangan do ahu ijia ase sonari.ʼ
8 (2-7) Seng dong ibotoh, paboa Ahu do ai, na mambere bani gandum, anggur ampa minak, anjaha na manlayak-layakkon bani buei pirak ampa omas, ai ma na pinakei ni sidea paulihon Baal.
9 (2-8) Halani ai buaton-Ku ma mulak gandum-Hu bani panorangni ampa anggur-Hu bani musimni; anjaha wol-Hu ampa hiou pe sontapkonon-Ku do, ai ma na manrungkub hatalanjangonni hinan.
10 (2-9) Anjaha patalagon-Ku do hailaonni i lobei ni na mangkaholongisi, anjaha seng dong na boi paluahkonsi humbani tangan-Ku.
11 (2-10) Parontihonon-Ku do haganup malas ni uhurni, pesta-pestani, poltak ni bulanni, ari Sabatni ampa haganup ari rayani.
12 (2-11) Parsedaon-Ku do hayu anggurni ampa hayu arani, ai ma na hinatahonni ai, ʻOn do upah bangku, na binere ni na mangkaholongi ahu bangku.ʼ Gabe harangan do ai bahenon-Ku, anjaha binatang na i talun ai do manggagati ai.
13 (2-12) Marlulu do Ahu bani halani pesta-pesta bani Baal, ai ma na manutung dahupa ia bani Baal, ipajagar dirini marhitei tintinni ampa omas-omasni, iirik-irik na mangkaholongisi, tapi Ahu ihalupahon do,” nini Jahowa.
14 (2-13) “Tapi huajar-ajari ma ia anjaha huboan ma ia hu halimisan, anjaha lamlam do parsahap-Ku bani.
15 (2-14) Ijai berehonon-Ku ma bani pohon anggurni, anjaha bahenon-Ku do habungan Ahor gabe horbangan pangarapan. Anjaha ijai tangihononni ma Ahu, songon bani panorang haposoonni, songon sanggah na tangkog ai ia hun Masir.”
16 (2-15) “Bani ari ai,” nini Jahowa, “goranonmu ma Ahu, ʻParamangonku,ʼ lang be ʻBaalhu.ʼ
17 (2-16) Padaohon-Ku do goran Baal humbani pamanganmu, ase ulang be isobut-sobut halak goranni ai.
18 (2-17) Bahenon-Ku do bannima bani ari ai padan pakon binatang harangan ampa manuk-manuk na i awang-awang ampa sagala na manjulur i tanoh in; masabkonon-Ku do sior, podang ampa porang hun tanoh in, anjaha Bahenon-Ku do hanima sonang marianan.
19 (2-18) Riridon-Ku do ho gabe tunangan Bangku sadokah ni dokahni; riridon-Ku do ho marhitei hapintoron, uhum, idop ampa holong ni uhur.
20 (2-19) Riridon-Ku do ho Bangku ibagas habujuron, gabe tandaonmu ma Jahowa.
21 (2-20) Bani panorang ai,” nini Jahowa, “tangihonon-Ku ma langit, tangihonon ni langit ma tanoh on,
22 (2-21) anjaha tangihonon ni tanoh on ma gandum, anggur ampa minak, anjaha ganup ai manangihon Jesreel,
23 (2-22) anjaha tidahkonon-Ku ma ia Bangku i tanoh in. Marholong ni uhur ma Ahu bani si Lo-Ruhama (Na so hinaholongan) anjaha hatahonon-Ku ma hubani si Lo-Ammi (Seng bangsangku), ʻBangsang-Ku do ho,ʼ anjaha ia mangkatahon, ʻHam do Naibatangku.ʼ”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA