Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Piga-piga dekah kenca si e, eme tupung rani gandum, Simson lawes ndahi ndeharana. Ibabana sada anak kambing man luahna. Nina Simson man mamana, "Kudahi ateku anakndu ku kamarna." Tapi la ipediat mamana.
2 Nina man Simson, "Kuakap kin mbarenda elem-elem atendu kempak ia, emaka kuserehken ia man dilaki si deban, eme temanndu jine. Tapi jilen kap agina. Banci ia buatndu jadi gantina."
3 Nina Simson, "Genduari la aku ersalah erkiteken kai si sikubahan man kalak Pilisti!"
4 Emaka itangkapna telu ratus serigala. Tiap dua serigala ipudunkenna ikurna, janah itamakenna sada obor ku je.
5 Kenca bage isaganina obor e, jenari ipulahina ku juma kalak Pilisti. Emaka meseng kerina gandum si nggo iperani. Gandum si langa iperani ras kebun anggur pe keri kerina meseng.
6 Kenca isungkuni kalak Pilisti ise kalakna si ngelakoken si enda, ibegina maka Simson si ngelakokenca erkiteken mamana kalak Timnah nggo nerehken ndehara Simson man teman Simson jine. Erkiteken si e lawes kalak Pilisti nutung diberu e ras kerina isi rumah bapana seh keri.
7 Jenari nina Simson kempak kalak Pilisti e, "Erkiteken bagenda perbahanendu, ersumpah aku maka la aku sinik adi langa aku erbalas man bandu kerina."
8 Simson merangi kalak Pilisti alu kejam dingen munuh nterem kalak. Jenari lawes, dingen ringan ia bas gua i datas sada deleng batu i Etam.
9 Reh kalak Pilisti erkemah i Juda, jenari iserangna kota Lehi.
10 Nungkun kalak Juda nina, "Ngkai maka kami iserangndu?" Jabap kalak Pilisti, "Kami reh ku jenda lako nangkap Simson, gelah banci ilakoken kami bagi pengelakona kempak kami."
11 Emaka lawes 3.000 kalak Juda ku gua deleng batu i Etam. Nina man Simson, "O Simson, la kin ietehndu maka kalak Pilisti ngkuasai kita? Nehenlah uga jadina perbahanenndu e man kami!" Ngaloi Simson nina, "Kubahan man bana bagi perbahanenna man bangku."
12 Nina kalak Juda, "Kami reh ku jenda nangkap kam dingen ngendeskenca man kalak Pilisti." Nina Simson, "Erjanji kam lebe maka la munuhndu aku."
13 "Ue," nina kalak Juda. "Ate kami pe nangkap kam ngenca dingen ngendeskenca kempak kalak Pilisti. Labo ate kami munuh kam." Kenca bage iketna Simson alu dua tinali si mbaru denga, jenari ibabana ndarat i bas gua e nari.
14 Kenca seh i Lehi, reh kiam kalak Pilisti ngalo-ngalosa janahna ersurak-surak. Rempet reh kuasa TUHAN mereken gegeh man bana. Tinali si ngiket tanna iretapina, tempa meseng ipan api.
15 Kenca bage idahna tulan isang kalde si mbaru denga. Ibuatna alu e ibunuhna 1.000 kalak Pilisti.
16 Emaka rende Simson, "Alu isang kalde kugudam 1.000 kalak, alu isang kalde kupegun-gun bangke-bangkena."
17 Kenca bage iambekkenna tulan isang kalde e. Eme sabapna ibahan gelar ingan e Ramat-Lehi.
18 Kenca bage muas kal Simson, emaka erlebuh ia man TUHAN, "O TUHAN, e denga kal IberekenNdu kemenangen si mbelin man bangku. Genduari arus kin aku mate muas, seh maka itangkap kalak Pilisti si la nandai Kam e aku?"
19 Emaka ipulka TUHAN lubang i bas uruk batu i Lehi e. Minem Simson, kenca bage senang ka iakapna. Eme sabapna sumbul lau e ibahan gelarna Lau Hakor. Sumbul e lit denga genduari i Lehi.
20 Dua puluh tahun dekahna Simson merentah kalak Israel, tupung e Israel ikuasai kalak Pilisti.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA