Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Iaminne pasang Napa’nyataya Batara mae ri Na’bi Habakuk.
2 O Batara, sa’ge siapapi salloku musti akkio’ appala’ tulung mae ri Katte? Angngapapi nampa laKipilangngeri siagang Kipasalama’ ikambe battu ri tau anjallakkanga?
3 Angngapa Kicini’-cinikia’ anciniki kaja’dallang kammaya anjo jaina? Angngapa naKiattahang kamma anciniki gau’ sala oloang kammaya jaina? Kemae-kemae nia’ nicini’ kaancurang siagang katerassang, passiba’jiang, siagang passisala-salang.
4 Hukkunga nibawang-bawangngangi siagang kaadelanga tale’bakai nipaenteng. Tau ja’dalaka ammetai mae ri tau lambusuka, siagang kaadelanga niputara’ baleki.
5 Nampa Nakanamo Batara mae ri umma’Na, "Parhatikangi bansa-bansaya ri tammulilinu, nanulalannasa’ siagang latakkajannang. Nasaba’ ri jammannu nia’ apa ero’ laKugaukang, tenaya nalanupatappa’ punna poro nicarita bawang mae ri kau.
6 Bansa Babel sekkeka siagang pallaka laKupa’jari bansa makoasa. A’barrisiki ke’nanga assulu’ battu ri pa’rasanganna nampa najappai sikontu linoa untu’ ambetai bansa-bansa maraenga.
7 Kemae-kemae ke’nanga appakamalla’; tampoi ke’nanga antolla’ kabusuki sikontu hukkunga pantaranganna situruka siagang ero’na ke’nanga.
8 Jaranna la’bi gassingi lari na macanga, siagang la’bi sekkeki na serigala cipuruka. Pasukang a’jaranna battui ri pa’rasangang-pa’rasangang bellaya; battui ke’nanga rapang balangkoa’ antamberoi apa najakkalaka.
9 Tantarana majui untu’ anggaukangi katerassanga; malla’ kabusuki taua anciniki nia’ battu ke’nanga. Teai sipato’ jaina tau natahanga ke’nanga.
10 Nacau-caui ke’nanga karaeng-karaenga siagang nakakkali pagawe-pagawe tinggia. Nagampangangi sikamma pattahangnganga siagang natambungi butta nampa naalle anjo pattahangnganga.
11 Nampa linta’ kamma anging a’lampa ngaseng anjo tau ampare’ rewatayai kagassingang kalenna."
12 O Batara, battu rioloji naiKatte Allata’ala. IKatte Allata’alaku matangkasaka siagang mannannunganga. O Batara, Allata’alaku siagang pa’la’langangku, anjo bansa Babel Kipilei siagang Kipa’jari kassaki untu’ anghukkungi ikambe.
13 Mingka antekamma bateTa akkulle attahang anciniki tau ja’dala’ palla’ kammaya anjo? Sai iKatte sanna’ matangkasatTa untu’ anciniki kaja’dallanga? Sai iKatte lanreki anciniki gau’ tenaya naadele’? Jari, angngapa natena apa-apa Kikana ri wattunna niancuru’ tau bajika ri tau dorakaya?
14 Angngapa rupataua naKikanai sangkamma juku’ ri tamparang, siagang rapang kaluara tenaya pamimpinna?
15 Bansa Babel najakkalaki taua siagang pekang, rapang angkana anjo ke’nanga juku’. Anjo taua nare’resangi lalang jala siagang sannang-sannammi anjo tu Babel lanri anjo wassele’ nagappaya ke’nanga.
16 Nampa anjo jalaya nasombai ke’nanga siagang nasarei koro’bang, nasaba’ lanri iaminjo jalaya nanggappamo ke’nanga dalle’ alla’bi-la’bi siagang a’jari kalumanynyang.
17 Masakang tulusu’ lanabi’buki ke’nanga pa’danna siagang nabuno bansa-bansaya, tena pangngamaseanna?
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA