Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Allah emot ka Ennoh ban sakabbinna keban se badha e paraona, laju madhateng angen; daddi aeng pas molae nyorot.
2 Somberra aeng e dhalem bume ban jalanna aeng e langnge’ etotop kabbi, daddi ojanna se derres laju terrang;
3 banjir jareya nyorot saellana olle saratos saeket are.
4 E tanggal petto bellas bulan petto’ parao jareya kandhas e sala settongnga konco’na pagunongan Ararat.
5 Aeng sajan nyorot terros, ban e tanggal settong bulan sapolo, konco’na nong-gunong molae katon.
6 Saellana olle pa’ polo are abidda, Ennoh mokka’ candhelana parao jareya settong,
7 laju ngocol mano’ dhangdhang settong. Dhangdhang jareya ta’ abali pole, terros ngabber adel-peddel sampe’ aengnga banjir jareya asat.
8 Sabatara jareya Ennoh ngocol dara, terro ngagaliya apa banjirra la asat.
9 Tape sarrena tana gi’ katotoban aeng, dara jareya ta’ nemmo panengga’an, laju abali ka paraona; Ennoh makalowar astana dhari candhelana paraona, darana pas nongko’ ka astana jareya, laju epamaso’ ka paraona.
10 Ennoh anante’ pettong are aggi’, pas ngocol pole dara gella’.
11 E baja sar-asar dara jareya abali, ngeba dhaunna jaitun se cengngar e cocco’na. Daddi Ennoh ngagali ja’ banjirra la nyorot.
12 Ennoh anante’ pettong are aggi’, darana pas eocol pole; dara jareya tadha’ abali.
13 E naleka yuswana Ennoh nem atos settong taon, e tanggal settong bulan settong, aeng la asat onggu. Ennoh mokka’ ata’na paraona, ngoladi san-kassannagi, laju ngagali ja’ tana la molae kerreng.
14 E tanggal petto lekor bulan dhuwa’ bume reya la ce’ kerrengnga.
15 Allah adhabu ka Ennoh,
16 "Mara sateya ba’na ban binena, na’-ana’na ba’na ban binena na’-ana’na jareya kalowar dhari paraona.
17 Pakalowar no’-mano’ ban kebanna kabbi, me’ olle padha adhu’-budhu’ mossa’e bume."
18 Daddi Ennoh laju kalowar dhari paraona, abareng ban rajina, tra-pottrana ban binena tra-pottrana jareya.
19 Bariya keya keban ban no’-mano’ padha kalowar dhari parao jareya abareng ban bangsana bang-sebang.
20 Ennoh laju abadhi mezba kaangguy kennengnganna kabakteyan ka PANGERAN. Saellana jareya laju mondhut no’-mano’ sarta ban-keban laenna se halal, eatorragi ka PANGERAN menangka kurban obbaran e attassa mezba jareya.
21 Bauna tor-ator jareya masenneng panggaliyanna PANGERAN. PANGERAN adhabu e dhalem panggaliyanna, "Sengko’ ta’ abastowa bume reya pole pera’ polana kasala’anna manossa, maske Sengko’ tao ja’ molae gi’ kene’ manossa reya la juba’ pekkeranna. Sengko’ ta’ mateyana sakabbinna mahlok se odhi’ e bume reya pole akantha se gi’ buru reya.
22 Saabidda bume reya gi’ badha, bakal terrosa badha mosemma oreng namen ban mosem anye, mosem cellep ban mosem panas, mosem nemor ban mosem nembara’, seyang ban malem."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA