Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mingka Rahel tena memampa nanggappa ana’. Lanri kammana angngiri matami ri daenna. Nampa nakanamo ri Yakub, "Sarema’ ana’. Punna tena lamatea’ kusa’ring."
2 Larromi Yakub ri Rahel na nakana, "Inakke anne teaiya’ Allata’ala. Iami ampa’jariko tanggappaya ana’."
3 Nakanamo Rahel, "Anne suroku Bilha; sikatinroang mako sollanna ammana’. Lanri kammana akkullema’ a’jari amma’ battu ri ia."
4 Nampa napassareammo Bilha mae ri bura’nenna, nampa assikatinroammo Yakub siagang anjo suroa.
5 Attianammi Bilha nampa allassukang sitau ana’ bura’ne.
6 Nakanamo Rahel, "Nagaukammi adeleka Allata’ala untu’ kaparalluangku. Napilangngeri pappalakku na Nasarema’ sitau ana’ bura’ne." Nampa naaremmo anjo anaka Dan.
7 Attianammi pole Bilha nampa allassukang sitau ana’ bura’ne.
8 Nakanamo Rahel, "Usahama’ sipakkulle-kulleku angngewai daengku, nakuammetamo." Jari naaremmi anjo anaka Naftali.
9 Naassennamo kalenna Lea angkanaya takkulleami anggappa pole ana’, napassareammi surona iamintu Zilpa, mae ri Yakub untu’ a’jari bainenna.
10 Allassukammi Zilpa sitau ana’ bura’ne.
11 Nakanamo Lea, "Upa’ma’," nampa naaremmo anjo anaka Gad.
12 Allassukammi pole Zilpa sitau ana’ bura’ne,
13 na nakanamo Lea, "Teai sipato’ sungguna pakkasiakku! Kamma-kamma anne sikontu bai’-bainea lanakanamo sunggua’." Lanri kammana naaremmi anjo anaka Asyer.
14 Ri wattu pakkattoang gandung, a’lampai Ruben mae ri paranga, nanggappamo sirupa ruku’ akkullea nipare’ pa’balle, nampa naerammo anjo mae ri amma’na, Lea. Nakanamo Rahel ri Lea, "Sare tonga’ sike’de’ anjo ruku’ pa’balle nagappaya ana’nu."
15 Appialimi Lea angkana, "Tanggannakapika nuallena bura’nengku? Kamma-kamma anne ba’lalo erokko pole angngallei ruku’ pa’balle nagappaya anakku." Nakanamo Rahel, "Punna nusarea’ anjo ruku’ pa’ballena ana’nu, akkulleko sikatinroang siagang Yakub anne bangngia."
16 Ammotere’na Yakub ri balla’ anjo karuenga, niruppaimi ri Lea na nakana, "Inakke nuagang assikatinroang anne bangngia, lanri le’ba’mi kubayara’ anjo siagang ruku’ pa’ballena anakku." Jari assikatinroammi Yakub siagang ia anjo bangngia.
17 Niturukiammi pappala’na Lea ri Allata’ala, sa’genna attianammo nampa allassukang ana’ makalima.
18 Nakanamo Lea, "Nasarema’ pa’balasa’ Allata’ala, lanri kupassareanna Zilpa mae ri bura’nengku." Lanri kammana naaremmi anjo anaka Isakhar.
19 Attianammi pole Lea nampa nalassukang ana’na makaannanga.
20 Nakanamo, "Nasarema’ Allata’ala hadia sannaka ga’gana. Kamma-kamma anne lanabilang lompoma’ bura’nengku, lanri allassukanga’ annang ana’ bura’ne." Lanri kammana naaremmi anjo anaka Zebulon.
21 Le’baki anjo allassukammi Lea sitau ana’ baine naarenga Dina.
22 Nampa Nau’rangimo Allata’ala Rahel. Naturukiammi pappala’ doanna siagang nasaremi pangngellai untu’ allassukang ana’.
23 Jari attianammi Rahel nampa allassukang sitau ana’ bura’ne. Nakanamo Rahel, "Napela’mi Allata’ala katunaangku.
24 Poro Nasare laloa’ pole Batara sitau ana’ bura’ne." Lanri kammana naaremmi anjo anaka Yusuf.
25 Le’ba’na nalassukang Rahel anjo Yusuf, nakanamo Yakub ri Laban, "Kellaima’ a’lampa ammotere’ mange ri pa’rasangangku.
26 Kellaima’ a’lampa nakuerang ruaya bainengku siagang sikamma anakku. Kugappami ke’nanga lanri anjamaku ri katte purina. Kiassengi purina angkana le’ba’ma’ anjama terasa’ sikali."
27 Nakanamo Laban ri ia, "Pilangngeri rolong. Anggappa’ pakkasia’ angkanaya nibarakkakia’ ri Batara lanri ikau.
28 Pau mami angkana siapa jaina nupala’."
29 Appialimi Yakub angkana, "Kiassengi purina angkanaya le’ba’ma’ anjama sanna’ terasa’na siagang katambammi jaina olo’-olotta lanri inakke amparakai.
30 Ri tenanapa kubattu tena nasiapa barang-baranta, mingka kamma-kamma anne kalumanynyang maki’ purina. Nabarakkaki maki’ Batara lanri inakke. Kamma-kamma anne narapi’mi wattunna sollangku anjama untu’ kalenna kaluargaku."
31 Nakanamo Laban, "Jari apa musti kupassareang mae ri kau?" Appialimi Yakub angkana, "Tea’ maki’ sareia’ apa-apa purina. Tuli lakuparakaina olo’-olotta purina, assala’ kisitujui anne pappalakku:
32 Kikellaia’ anne alloa a’jappa ri tangnga-tangngana sikontu bembeta siagang gimbalatta, siagang kualle sikamma ana’ gimbala’ le’lenga bulunna, kammayatompa sikamma bembe rungka a’ballanga yareka a’batti’-battika. Iaji anjo bawang pa’balasa’ kukaerokia.
33 Ri allo ri boko akkullei kiasseng angkanaya apaka lambusukka’ lalang ri jama-jamangku. Punna battuki’ untu’ amparessai sawalakku, nampa nia’ kicini’ bembe tena na’batti’ yareka tena na’ballang, yareka gimbala’ tenaya nale’leng, akkullemi kiasseng purina, angkanaya anjo olo’-oloka apa kulukka’."
34 Appialimi Laban angkana, "Situjua’! Baji’mi nanigaukang anjo pappala’nu!"
35 Mingka anjo alloa nasa’la’mi Laban sikontu bembe laki a’battika yareka a’ballanga, kammayatompa sikontu bembe gana a’ballanga, a’batti’-battika, yareka ia niaka ra’masa’na kebo’na. Nasa’la’ tommi sikontu gimbala’ le’lenga bulunna. Nampa nasuro ana’-ana’na angngurusuki sikamma anjo olo’-oloka.
36 Nampa a’lampa ke’nanga siagang sikamma olo’-oloka ampakabellai battu ri Yakub, kira-kira tallungallo bellana nijappai. La’binna anjo sikamma bembena siagang gimbala’na Laban niparakai ri Yakub.
37 Nampa angngalle Yakub tangke-tangke kayu moncong buloa battu ri poko’ kayu niarenga hawara’, poko’ badang siagang poko’ berangang, nampa nabi’bi’ sipa’gang kuli’na sa’genna a’ballang-ballang.
38 Napadongko’mi anjo tangke-tangke kayua ri dallekanna pa’rappunganna anjo bembea, ilalang ri tampa’ pangnginunganna, lanri nangai anjo olo’-oloka a’laki ri wattu ero’na angnginung.
39 Jari punna a’laki anjo sikamma bembea ri dallekanna anjo tangke-tangke kayua, a’ballangi yareka a’batti’-battiki sallang ana’na.
40 Nampa naalle Yakub sikamma gimbalaka nampa napa’dalle’ mange ri bembe-bembe a’ballanga siagang le’lenga. Kammaminjo carana nanggappamo sipa’rappungang olo’-olo’ untu’ kalenna nampa nasa’la’ battu ri pa’rappunganna olo’-olo’na Laban.
41 Punna sitabang a’laki olo’-olo’ gassinga, napadongko’mi Yakub anjo tangke-tangke le’baka nabi’bi’ ri dallekanna ke’nanga, ilalang ri tampa’ pangnginunganna.
42 Mingka tena napadongkoki anjo tangke-tangke kayua ri dallekanna olo’-olo’ lammaya. Jari, sikontu anjo olo’-olo’ keboka lammai, nampa iaminjo olo’-olo’na Laban. Na ia sikontu olo’-olo’ le’lenga, a’ballanga siagang a’batti’-battika gassing ngasengi, nampa iaminjo Yakub pata.
43 Kammaminjo na’jari sanna’mo kalumanynyanna Yakub. Jai sikalimi bembena, gimbala’na, untana, keledaina, siagang tunisuro-surona.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA