Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri se’reang allo, ri wattu toanamo Ishak siagang buta tommi pole, nakio’mi Esau, ana’na toaya, nampa nakana ri ia, "Ana’!" Appialimi Esau angkana, "Iye’, bapa’."
2 Nakanamo Ishak, "Nuassemmi angkanaya toama’ siagang tenamo kapang nakusallo attallasa’.
3 Jari allemi pananu siagang anronna, a’lampamako mange assoso’ olo’-olo’ ri paranga.
4 Bajiki palluna situru’ pallu-pallu kungaia, nampa nuerang mae ri nakke. Punna le’baki kukanre, lakusareko barakka’ lalang tenanapa kumate."
5 Anjo passibicaranna Ishak siagang Esau nilangngereki ri Ribka. Jari ri wattu a’lampanamo Esau mange assoso’,
6 nakanamo Ribka ri Yakub, "Silalonna kulangngere’ sipa’bicara manggenu siagang Esau angkana,
7 ‘Mange mako assoso’ siagang angngondang mako sikayu olo’-olo’ nampa nupalluang bajikka’. Punna le’ba’ kukanre, lakusareko barakkakku ri dallekanNa Batara ilalang tenanapa kumate.’"
8 Nakanamo pole Ribka, "Jari kamma anne na’, pilangngeri siagang gaukangi anne kanangku.
9 A’lampako mange ri tampa’na gimbalatta, nanupilei ruang kayu bembe co’moka, sollanna kupallu sangkamma pallu-pallu nangaia manggenu.
10 Nampa nuerang mange ri ia nanakanre. Na punna le’baki anjo lanasare mako barakka’na ilalang tenanapa namate."
11 Mingka nakanamo Yakub ri amma’na, "Amma’, sai anjo kalenna Esau a’bului, nampa kalengku nakke tena?
12 Gassingka nata’galakka’ bapakku nampa naasseng angkanaya kuballe-ballei. Gassingka tena nanabarakkakia’ passangalinna natunraja’."
13 Appialimi amma’na angkana, "Teako batai, na’. Inakkepa antanggongi pattunrana. Gaukang mami kanangku. A’lampamako angngallei anjo bembea."
14 Jari a’lampami Yakub angngallei anjo bembea na naerang mae ri amma’na. Nampa napallu Ribka a’jari pallu-pallu pangngainna Ishak.
15 Nampa naalle Ribka bajunna Esau kaminang bajika, niaka naboli’ ri balla’, na napipakeang mae ri Yakub.
16 Napikalukiang tommi limanna siagang kallonna Yakub anjo tenaya na’bulu siagang kukkulu’ ana’ bembe.
17 Nampa nasare Yakub anjo pallu-pallu nyamanga siagang roti le’baka napare’.
18 Le’baki anjo a’lampami Yakub mae ri manggena na nakana, "Bapa’!" Appialimi Ishak angkana, "Iyo’. Inai kontu, Esau yareka Yakub?"
19 Appialimi Yakub angkana, "Esau, ana’ toata. Le’ba’mi kugaukang pasanta. Ammempo maki’ siagang angnganre maki’ dageng kugappaya kusoso’ anne, sollanna akkulleki’ ambarakkakia’."
20 Nakanamo Ishak, "Linta’ sikaliko anggappa na’." Appialimi Ishak angkana, "Lanri nitulunga’ ri Karaeng Allata’ala kisombaya."
21 Nakanamo Ishak ri Yakub, "A’reppe’-reppesekko mae sollannu akkulle kuta’gala’. Maka Esau tojengko?"
22 A’reppese’mi Yakub mae ri manggena. Nita’gala’mi ri manggena na nakana, "Sa’rannu sangkammai sa’ranna Yakub, mingka limannu sangkammai limanna Esau."
23 Tena niassengi Yakub ri Ishak lanri a’bului limanna sangkamma limanna Esau. Mingka ri wattu lanabarakkakina Yakub,
24 akkuta’nang inji sikali pole nakana, "Maka Esau tojengko?" Appialimi Yakub angkana, "Tojeng."
25 Nakanamo Ishak, "Sareamma’ anjo dagenga. Punna le’ba’ kukanre nampa mako lakusare barakkakku." Napassareammi Yakub anjo dagenga mae ri ia siagang sike’de’ anggoro’ untu’ nainung.
26 Nampa nakanamo manggena ri ia, "A’reppesekko pole nupila’ ambani na’, nampa nubaua’."
27 Ri wattunna a’reppese’ Yakub na nabau, naara’mi Ishak rasa bajunna Esau, nampa nabarakkakimo. Nakana Ishak, "Rasa bau’na anakku sangkammai rasa bau’na parang le’baka Nabarakkaki Batara.
28 Poro Nasareko Allata’ala saliu’ battu ri langi’, nampa napa’jari coppong sikamma kokonnu! Poro Nasareko gandung siagang anggoro’ alla’bi-la’bi!
29 Poro a’jari atannu ngaseng sikamma bansa-bansaya, siagang tundu’ ngaseng suku bansaya mae ri kau. Poro nukoasai ngaseng sikamma bija pammanakannu, siagang su’ju’ ri kau turunganna amma’nu. Poro nitunra ngasengi sikamma tau antunrayako, siagang poro nibarakkaki ngaseng sikamma tau ambarakkakiako."
30 Tena nasallo le’ba’na napassareang barakka’na Ishak siagang a’lampanamo Yakub, nia’mi Esau ammotere’ battu assoso’.
31 Appallu tommi kanre-kanreang nyamang, nampa naerang mange ri manggena. Nakana, "Ammempo maki’ Bapa’, siagang angnganre maki’ dageng kueranga untu’ ikatte, sollanta akkulle ambarakkakia’."
32 Akkuta’nammi Ishak angkana, "Inaiko antu?" Appialimi Esau angkana, "Esau, anatta toaya."
33 Appakkaramulami annekkere’ sibatu kalenna Ishak, siagang akkuta’nammi angkana, "Punna kamma, inai anjo sumpadeng battua assoso’ nampa naerang mae ri nakke? Le’ba’mi kukanre ri tenanapa nubattu. Nampa le’ba’mi kupassareang barakkakku kala’busanga mae ri ia, nakamma-kamma anne iami pata anjo barakkaka sa’genna satunggu-tungguna."
34 Nalangngere’na Esau anjo, angngarru’ lompomi, nateai sipato’ pa’risi’na nyawana. Nampa nakanamo, "Barakkaki tonga’, Bapa’!"
35 Nakanamo Ishak, "Le’ba’mi battu mae andi’nu amballe-balleia’. Le’ba’mi naalle barakka’ eroka sitojenna kupassareang ri kau."
36 Nakanamo Esau, "Iaminne makapinruangku naballe-ballei. Siratangi niareng Yakub. Naallemi ha’ ana’ bungasakku, nampa kamma-kamma anne naalle tommi barakka’ lamangea ri nakke. Apaka tenamo barakkatta maraeng Bapa’?"
37 Appialimi Ishak angkana, "Le’ba’mi kupa’jari anjo andi’nu a’jari karaennu, siagang sikamma bija pammanakannu la’jari ngasengi suro-surona. Le’ba’mi kusare gandung siagang anggoro’. Kamma-kamma anne tena sikalimo apa-apa akkulle kugaukang untu’ ikau, Na’!"
38 Tenamo ammarina Esau appala’ ri manggena. Nakana, "Apaka se’reji bawang barakkatta? Barakkaki tonga’ Bapa’!" Nampa appakkaramulamo angngarru’ pole.
39 Nampa nakanamo Ishak ri ia, "Talaniakka saliu’ battu ri langi’ untu’ ikau, tena niakka koko lacoppong untu’ ikau.
40 Lattallasakko lanri battu ri pa’dannu, mingka la’jari suronako andi’nu, mingka punna angngewako, lata’lappasakko battu ri kakoasanna."
41 Jari a’jari birisi’mi Esau mae ri Yakub, lanri le’ba’na napassareang barakka’na manggena mae ri anjo andi’na. Nakanamo nawa-nawana, "Tenamo nasallo namate bapakku. Punna le’ba’ ta’lappasa’ allo kasusaanga, lakubunoi anjo Yakub!"
42 Nalangngere’na Ribka anjo rancanana Esau, nakio’mi Yakub nampa nakana ri ia, "Pilangngeri anne. Eroki daennu Esau ampa’balassiko siagang erokko nabuno.
43 Jari gaukangi anne kanangku. A’lampako linta’ mange ri daengku Laban ri Haran,
44 nampa ammantang mako siagang ia siapa are sallona, sa’genna ammari larrona daennu mae ri kau,
45 na nakaluppaimo anjo apa le’baka nugaukang mae ri ia. Nampa lakusuro sallang taua angngerangko ammotere’ mae anrinni. Taeroka’ tappela’ rua anakku lalang se’rea allo."
46 Nakanamo Ribka ri Ishak, "Lanrema’ siagang birisi’ma’ anciniki anjo sikamma bainenna Esau battua ri bansa maraeng. Punna a’bunting todong Yakub siagang tulolo battua ri bansa Het, bajikangngang mate mama’."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA